وبلىستىق پوليتسيا دەپارتامەنتىنىڭ مالىمەتىنشە, جىل باسىنان بەرى قوستاناي قالاسىنىڭ وزىندە كامەلەتكە تولماعاندارعا قاتىستى 1 200-گە جۋىق قۇقىق بۇزۋ دەرەگى تىركەلگەن. ءتارتىپ ساقشىلارى بۇل كەلەڭسىز وقيعالاردىڭ دەنى, ياعني 83 پايىزى تۇنگى ۋاقىتتا تىركەلگەنىن ايتىپ وتىر.
ء«تۇن ورتاسىندا جانىندا نە اتا-اناسى, نە زاڭمەن بەكىتىلگەن قامقورشىسى جوق قاراۋسىز جۇرەتىن جاسوسپىرىمدەر كوبەيىپ كەتتى. مۇنداي بالالاردىڭ كوبى تۇندە اعا-اپكەلەرىنە نەمەسە تۋىستارىنا ەرىپ جۇرە بەرۋگە بولادى دەپ ويلايدى. الايدا كامەلەتكە تولماعانداردىڭ قاۋىپسىزدىگى مەن ءتارتىبىن باقىلاۋدى قامتاماسىز ەتۋ ماقساتىندا زاڭ تۇنگى ۋاقىتتا بالانىڭ قاسىندا زاڭدى وكىلدىڭ ءجۇرۋىن تالاپ ەتەدى», دەيدى پوليتسيا دەپارتامەنتىنىڭ ءباسپاسوز حاتشىسى كارينا بازارباەۆا.
سونىمەن قاتار تۇنگى كلۋبتار مەن ءدامحانالاردا, كومپيۋتەر ورتالىقتارى مەن كينوتەاتر ءتارىزدى ويىن-ساۋىق ورىندارىندا بەيساۋات جۇرگەن 77 بالا ءتارتىپ ساقشىلارىنىڭ نازارىنا ىلىككەن. سوراقىسى سول, بيىل ماس كۇيىندە ۇستالعان 58 ءجاسوسپىرىمنىڭ ءبىرازى ناركولوگيالىق ديسپانسەردىڭ, ءبىرازى پوليتسيانىڭ ەسەبىنە تىركەلگەن. سونداي-اق بالا تاربيەسىنە دۇرىس قاراماعان 83 اتا-انا اكىمشىلىك جاۋاپكەرشىلىككە تارتىلىپ وتىر.
«جاسوسپىرىمدەر اراسىنداعى قۇقىق بۇزۋ فاكتىلەرىنىڭ جيىلەپ كەتۋى كوبىنە وتباسى تاربيەسىنە بايلانىستى. ۇيدە ء«اي دەيتىن اجەنىڭ, قوي دەيتىن قوجانىڭ» جوقتىعىن سەزىنگەن بالا بوس جۇرىسكە سالىنادى, جامان ادەتكە ءۇيىر بولادى. مۇنداي جايتتاردىڭ الدىن الۋ ماقساتىندا جىلىنا بىرنەشە رەت رەسپۋبليكالىق ء«جاسوسپىرىم» جەدەل الدىن الۋ اكتسياسىن وتكىزىپ تۇرامىز. اتالعان ءىس-شارا اياسىندا مەكتەپتەردى ارالاپ, بالالارمەن كەزدەسەمىز. تۇنگى رەيدتەردى كۇشەيتىپ, ويىن-ساۋىق ورىندارىنا باقىلاۋدى كۇشەيتەمىز. سونداي-اق بىزدە تىركەۋدە تۇرعان جاسوسپىرىمدەردىڭ ۇيىنە بارىپ, ولاردىڭ اتا-انالارىمەن بالانىڭ مىنەز-قۇلقى, وقۋ ۇلگەرىمى, بوس ۋاقىتىن قالاي وتكىزەتىنى جونىندە اڭگىمەلەسەمىز», دەيدى يۋۆەنالدى پوليتسيا ماماندارى.
قوستاناي وبلىسى
