سولتۇستىك قازاقستاندا 92 تاپانشا, 24 مىلتىق تاركىلەندى

پەتروپاۆل. 27 قاڭتار. ۇستىمىزدەگى جىلدىڭ 1 قاڭتارىنان باستاپ گازبەن زاقىمداۋ قارۋلارىن ساتىپ الۋ رەسپۋبليكالىق اكتسياسى باستالعالى سولتۇستىك قازاقستان وبلىسىندا قارۋدى ءوز ەرىكتەرىمەن تاپسىرۋشىلاردىڭ قاتارى ءوسىپ كەلەدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. بۇگىنگە دەيىن جەكە تۇلعالاردان «وسا», «ستراجنيك», «ەگيدا» ماركالى گازبەن زاقىمدايتىن 92 تاپانشا پەن 24 تەگىس وقپاندى جانە ءيىر ويىقتى اڭشى مىلتىعى الىنعان. «قارۋدىڭ تەحنيكالىق جاعدايىنا سايكەس ءۇش سانات بويىنشا بەرىلەتىن وتەماقى ونىڭ قۇنىنىڭ 50-90 پايىزىن قۇرايدى. ماسەلەن, ۇڭعىماسىز «وسا» قارۋى ءۇشىن 20-30 مىڭ تەڭگە تولەنەدى. اكتسيانى جۇزەگە اسىرۋعا رەسپۋبليكالىق قازىنادان 22 ميلليون تەڭگە ءبولىندى», دەيدى ليتسەنزيالىق رۇقسات بەرۋ جۇيەسى ءبولىمىنىڭ جەتەكشىسى ەركىن حامزين. ۇكىمەت قاۋلىسىنا سايكەس گازبەن زاقىمداۋ قارۋلارىن ەرىكتى تۇردە تاپسىرۋدان باس تارتقان ازاماتتار 2016 جىلعى 1 قاڭتاردان باستاپ قىلمىستىق جاۋاپكەرشىلىككە تارتىلاتىن بولادى. ءومىر ەسقالي. دەرەك: سولتۇستىك قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: aikyn.kz.