دۇنيەگە جوعارىداعىداي كىناراتپەن كەلگەن بالاقايعا ارتىق ساۋساعى ۇنەمى كەدەرگى كەلتىرىپ, ءجۇرىپ-تۇرۋىن قيىنداتا تۇسكەن, ءسابيدىڭ سول اياعى وڭ اياعىنان بىرنەشە ولشەمگە ۇلكەن بولعاندىقتان, ەكى ءتۇرلى اياقكيىم كيگەن. ماماندار ۋاقىت وتە كەلە بۇل كىنارات بالانىڭ كوڭىل-كۇيىنە دە اسەر ەتىپ, پسيحولوگيالىق كۇيزەلىسكە دۋشار ەتۋى مۇمكىن دەيدى. سوندىقتان دارىگەرلەر حيرۋرگيالىق جولمەن قۇتىلۋ كەرەك دەگەن شەشىمگە كەلگەن ەدى. راسىندا دا, وسكەن سايىن قىز بالانىڭ جاعدايى قيىنداپ, ارتىق باشپايى اياقكيىمگە سىيماي قينالا باستاعان.
باستاپقىدا بالدىرعاننىڭ اتا-اناسى بۇل ماسەلەنى شەشۋدىڭ جولدارىن قاراستىرعانىمەن, وپەراتسيا جاساتۋعا باتىلى بارماعان ەكەن. قىز بالا 10 جاسقا تولىپ, اكە-شەشەسى ءوز تانىستارى مەن دارىگەرلەرىنىڭ كەڭەسىمەن الماتىداعى №2 بالالار قالالىق كلينيكالىق اۋرۋحاناسىنىڭ حيرۋرگتەرىنە جۇگىندى. اۋرۋحانا ماماندارى قايتا-قايتا كەڭەسە وتىرىپ, تەكسەرۋلەردەن كەيىن قىز بالانى قالىپتى ومىرگە ورالتىپ, اياقتاعى انوماليالىق كەمىستىكتەن قۇتىلۋ ءۇشىن وپەراتسيا جاساۋ قاجەت دەگەن قورىتىندىعا كەلدى.
مۇنداي ەرەكشە وپەراتسيا الماتى قالاسىنداعى №2 بالالار قالالىق كلينيكالىق اۋرۋحاناسى مەن «مەيىرىمدىلىك ءۇيى» قق ۇيىمداستىرعان ارنايى حالىقارالىق شەبەرلىك-ءدارىسى شەڭبەرىندە قور سەرىكتەستەرىنىڭ دەمەۋشىلىگىمەن اتقارىلدى. بىرەگەي وپەراتسيا بارىسىندا قازاقستان مەن رەسەي ەلدەرىنىڭ جەتەكشى بالالار حيرۋرگتەرى بىرىگە قيمىلداپ, جاڭا ادىستەمەلەر مەن تەحنولوگيالار قولداندى.
«مۇنداي كۇردەلى حيرۋرگيالىق ارالاسۋدى وتاندىق ورتوپەد-تراۆماتولوگتەر سانكت-پەتەربۋرگتەگى ن.پيروگوۆ اتىنداعى جوعارى مەديتسينالىق تەحنولوگيالار كلينيكاسىنىڭ ارىپتەستەرىمەن بىرگە اتقاردى. وپەراتسيانىڭ قيىندىعى سوندا, ءبىزدىڭ الدىمىزدا ارتىق باشپايدى الىپ تاستاۋ عانا ەمەس, اياقتىڭ كولەمىن قالىپتان تىس ۇلعايتاتىن قوسىمشا مەتاتارسالدى سۇيەك ماسەلەسى دە تۇردى. تەكسەرۋ كەزىندە ميكروسكوپپەن جۇمىس ىستەۋدى تالاپ ەتەتىن جۇيكە مەن قان تامىرلارىنىڭ ورنالاسۋىندا اۋىتقۋ قوسا انىقتالدى», دەيدى №2 بقكا تراۆماتولوگيا ءبولىمىنىڭ مەڭگەرۋشىسى ەرلان سادىربالين.
ال ءدال وسى كۇندەرى قىز بالانىڭ اتا-اناسىنىڭ قۋانىشىن سوزبەن ايتىپ جەتكىزۋ مۇمكىن ەمەس. ولار وپەراتسيانىڭ ءساتتى وتكەنى تۋرالى ەستىگەندە قۋانىشتان كوز جاستارىنا ەرىك بەرىپ, دارىگەرلەرگە العىسىن جاۋدىرۋمەن بولدى. بۇگىندە كىشكەنتاي پاتسيەنتتىڭ جاعدايى بىرتىندەپ دۇرىستالىپ كەلەدى. دارىگەرلەر قىز بالا كوپ ۇزاماي قۇربى-قۇرداستارىنىڭ قاتارىنا قوسىلادى دەپ وتىر.
ءبىر جاعىنان وسىناۋ ەرەكشە وپەراتسيانىڭ تاريحى جوعارىداعى وتباسىن ۇلكەن ۋايىمنان, كەسەلدەن قۇتقارىپ قانا قويماي, وتاندىق زاماناۋي مەديتسينا ءتىپتى ەڭ كۇردەلى جاعدايلاردىڭ ءتۇيىنىن تارقاتا الاتىنىن كورسەتىپ وتىر.
الماتى
