سۋرەتتى تۇسىرگەن – ەرلان ومار, «EQ»
وسى ۋاقىتقا دەيىن وڭىردەگى 18 بەن 27 جاس ارالىعىنداعى ازاماتتارعا شاقىرتۋ قاعازى جولدانىپتى. قازىر جاستار شاقىرۋ قاعازىندا كورسەتىلگەن مەكەنجايعا كەلىپ, مەديتسينالىق تەكسەرىس پەن كاسىبي-پسيحولوگيالىق ىرىكتەۋدەن ءوتىپ جاتىر. قورعانىس ىستەرى جونىندەگى دەپارتامەنت باستىعىنىڭ ورىنباسارى جاسۇلان شاڭقۇلوۆتىڭ ايتۋىنشا, كۇزگى شاقىرىلىمدا ۇقك شەكارا قىزمەتىنە – 170, ۇلتتىق ۇلانعا – 280, مەملەكەتتىك كۇزەت قىزمەتىنە – 10, ال قارۋلى كۇشتەر قاتارىنا 420 ازامات جىبەرىلەدى.
وبلىستىق جيىن پۋنكتىنە بارعانىمىزدا, ون شاقتى جىگىت مەديتسينالىق تەكسەرىستەن ءوتىپ جاتقانىن كوردىك. جالپى, شاقىرۋ جىبەرىلگەندەردىڭ 70-80 پايىزى كەلەتىن كورىنەدى. ولاردىڭ دەنى جيىن پۋنكتىندەگى مەديتسينالىق ساراپتاما, تەست سىناماسى مەن پوليگرافيالىق تەكسەرىستەن كەيىن اسكەرگە اتتانادى. وسى جىلى كوكتەمگى اسكەرگە شاقىرۋ جوسپارى 103 پايىزعا ورىندالىپتى.
بۇگىندە جۇرت اراسىندا جاۋاپتىلار شاقىرىلعانداردىڭ دەنساۋلىعىن شالا-شارپى تەكسەرىپ, اسكەر قاتارىنا قوسۋعا اسىعادى دەگەن تۇسىنىك قالىپتاسقان. دەگەنمەن قورعانىس ىستەرى جونىندەگى دەپارتامەنت ماماندارى مۇنى جوققا شىعارىپ وتىر.
«شاقىرۋشىلار اراسىندا قىزىلوردا قالاسىنان اسكەرگە بارۋعا ىنتالى جاستار كوبەيىپ وتىرعانى قۋانتادى. اۋدانداردان دا كەلىپ جاتقاندار قاتارى از ەمەس. كوكتەمگى ناۋقاندى جامان اياقتاعان جوقپىز. كۇزدە دە سول دەڭگەيدەن كورىنەمىز دەگەن ءۇمىت بار. شاقىرىلعاندار مەديتسينالىق, پسيحولوگيالىق ىرىكتەۋسىز, پوليگرافيالىق تەكسەرۋسىز اسكەر قاتارىنا الىنبايدى. وسىنىڭ ىشىندە پوليگرافيالىق تەكسەرۋ ارقىلى ازاماتتىڭ جان بالاسىنا ايتا الماي جۇرگەن سىرى, پسيحولوگيالىق جاي-كۇيى انىقتالىپ جاتادى. وتان قورعاۋشىلار ساپىنا قوسقان ساربازدار ساۋلىعى ءۇشىن جاۋاپكەرشىلىك جوعارى. سوندىقتان ولار جان-جاقتى تەكسەرىلەدى», دەيدى قورعانىس ىستەرى جونىندەگى دەپارتامەنت باستىعىنىڭ ورىنباسارى جاسۇلان شاڭقۇلوۆ.
قارماقشىلىق نۇرلان داميروۆ – جاقىندا عانا قورقىت اتا اتىنداعى قىزىلوردا ۋنيۆەرسيتەتىن بىتىرگەن جاس. وتباسىنداعى جالعىز بالانىڭ اسكەرگە بارامىن دەگەن تالابىنا ۇيىندەگىلەر دە قارسى بولا قويماپتى. «اسكەر – جىگىتتى شىڭدايتىن مەكتەپ. ال ونىڭ تالابىنا ءتوزىپ, وتاندى قورعاۋعا ۇلەس قوسۋ – ءار ازاماتتىڭ پارىزى», دەيدى ول.
بولاشاق ساربازدار ءۇشىن كاسىبي پسيحولوگيالىق ىرىكتەۋ جۇمىسىنىڭ دا ماڭىزى زور. ەكىمىڭىنشى جىلدار باسىندا قۇرىلعان بۇل جۇيەگە سايكەس مەرزىمدى اسكەري قىزمەتكە شاقىرۋشىلار, كەلىسىمشارتپەن قىزمەت وتەيتىندەر, اسكەري وقۋ ورنىنا تۇسەتىن ازاماتتار «اقسۇڭقار» پسيحودياگنوستيكالىق كەشەنى بويىنشا قورعانىس مينيسترلىگى بەكىتكەن تەست سۇراقتارىنا جاۋاپ بەرەدى.
«بۇل جاستاردىڭ فيزيكالىق ازىرلىگىنەن بولەك, مورالدىق جانە پسيحيكالىق دايىندىعىن دا زەردەلەۋگە ۇلكەن مۇمكىندىك بەرەدى. ارقايسىسىنان انكەتا الىنىپ, سول ارقىلى ولاردىڭ وتباسىلىق جاعدايىن, اكە-شەشەسىمەن قارىم-قاتىناسىن, اسكەرگە قىزىعۋشىلىعىن انىقتايمىز. وسى كۇنى شەكارا قىزمەتى اسكەري بولىمىمەن جۇمىس ىستەپ جاتىرمىز. ولاردان دا پسيحولوگ, پوليگرافولوگ ماماندار كەلدى. كوپ ۇزاماي تەكسەرىس قورىتىندىسىمەن جاستاردى كاتەگوريا بويىنشا كومانداعا دايىندايمىز. تەستتەن وتپەي قالاتىندار دا تابىلادى. ولاردىڭ قاتارىندا اسكەرگە بارعىسى كەلمەيتىندەر كوپ. سونىمەن قاتار سۇراققا جاۋاپ بەرۋگە ءبىلىم دەڭگەيى جەتپەيتىندەر دە بولادى. ونداي بالالارعا كومەك كورسەتەمىز. ال شاقىرىلۋشىنىڭ اۋرۋى انىقتالعان جاعدايدا مەديتسينالىق كوميسسيا توراعاسى ارقىلى دارىگەر پسيحياترعا جولدامامەن جىبەرەمىز», دەيدى قىزىلوردا وبلىستىق قورعانىس ىستەرى جونىندەگى دەپارتامەنتتىڭ پسيحولوگيالىق قىزمەت باستىعى, مايور نەلليا ىسقاقوۆا.
قىزىلوردا
