اشىق دەرەككوز
اتالعان ءىستى شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قارادى. ەر ادام قر قىلمىستىق كودەكسىنىڭ 99-بابىنىڭ 1-بولىگى بويىنشا ايىپتالعان.
سوتتا بەلگىلى بولعانداي, سوتتالۋشى شىمكەنت قالاسى «نۇرشۋاق» مولتەك اۋدانى جاڭاقۇرىلىس جەر تەلىمىندە قۇرىلىس وبەكتىسىندە بىرگە جۇمىس جاسايتىن ن.-مەن بىرگە سپيرتتىك ىشىمدىك ءىشىپ, ارالارىندا ۇرىس-جانجال تۋىنداعان.
«سونىڭ سالدارىنان ن. ەسىمدى ازامات ە.-ءنىڭ بەتىنە جۇدىرىعىمەن ءبىر رەت سوققى جاساعان. بۇعان قاتتى اشۋلانعان ە. قارسىلاسى ن.-نىڭ قولىنداعى اسحانا پىشاعىن تارتىپ الىپ, موينىنان پىشاقپەن بىرنەشە رەت سوققى جاساعان. سونىڭ سالدارىنان جابىرلەنۋشى العان اۋىر دەنە جاراقاتتارىنان وقيعا ورنىندا قازا بولعان», دەلىنگەن سوت حابارلاماسىندا.
سوت سوتتالۋشىنىڭ جاساعان قىلمىستىق ارەكەتتەرى ءىشىنارا مويىنداۋمەن قاتار, جابىرلەنۋشى وكىلى مەن كۋالەردىڭ جاۋاپتارىمەن, ايعاق زاتتى الۋ حاتتامالارىمەن, سوت ساراپتامالارىنىڭ قورىتىندىلارىمەن جانە دە باستى سوت تالقىلاۋىندا زەرتتەلگەن باسقا دا ءىس ماتەريالدارىمەن تولىق دالەلدەندى.
پروكۋرور ە.-عا 13 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشى وكىلى پروكۋروردىڭ وسى ۇستانىمىمەن كەلىستى.
«سوت سوتتالۋشىنىڭ قىلمىستىق جاۋاپكەرشىلىگىن جەڭىلدەتەتىن ءمان-جايلار رەتىندە كىناسىن ءىشىنارا مويىنداعانىن, جاساعان قىلمىسىنا وكىنەتىنىن, ال اۋىرلاتاتىن ءمان-جايلار بويىنشا جاساعان قىلمىسى اسا اۋىر قىلمىستار ساناتىنا جاتاتىنىن, ە.-نىڭ ءىس-ارەكەتىندە قىلمىستاردىڭ قاۋىپتى قايتالانۋىن تانىعانىن جانە جابىرلەنۋشى وكىلىنىڭ كەشىرىم بەرمەگەنىن ەسكەردى. سوت ە. ەسىمدى ازاماتقا قك-ءنىڭ 99-بابىنىڭ 1-بولىگىمەن 13 جىل مەرزىمگە باس بوستاندىعىنان ايىرۋ جازاسى تاعايىندادى جانە سوتتالۋشىنىڭ ارەكەتتەرىندە قىلمىستىڭ قاۋىپتى قايتالانۋ بەلگىلەرى بار دەپ تانىدى», دەلىنگەن حابارلامادا.
جازانى سوتتالۋشى قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەلەرىندە وتەۋگە بەلگىلەدى.
ۇكىم زاڭدى كۇشىنە ەندى.
