وقۋشىلار اراسىندا ءابىش شىعارمالارىنداعى ماڭعىستاۋ تاقىرىبىن ناسيحاتتاۋ, جاستاردىڭ كىتاپ وقۋعا قىزىعۋشىلىعىن ارتتىرۋدى كوزدەيتىن ءىس-شاراعا مۇنايلى اۋدانى تۇرعىندارىنىڭ باسىم بولىگى بولىپ تابىلاتىن شەتتەن كەلگەن قانداستاردىڭ بالالارى كوبىرەك تارتىلدى. ناقتىراق ايتقاندا, وسىناۋ رۋحاني بايگەگە اۋدانداعى 14 مەكتەپتەن 43 وقۋشى قاتىستى.
بايقاۋ شارتى بويىنشا قاتىسۋشىلار ءابىش كەكىلباي ۇلىنىڭ «قۇس قاناتى», «اۆتوموبيل», «باسەكە», «بايگەتورى» حيكايالارىن ءبىر اي بويى وقىپ الدىن الا دايىندالدى. ءبىرىنشى كەزەڭدە ەكى شىعارما بويىنشا وقۋشىلار تەست تاپسىردى, ودان سۇرىنبەي وتكەندەر تاعى ەكى كۇن دايىندالىپ, ەكىنشى كەزەڭدە تاعى ەكى شىعارما بويىنشا تەست سۇراقتارىنا جاۋاپ بەردى. ەكىنشى كەزەڭنىڭ سىنىنان وتە العان جۇيرىكتەر ءۇشىنشى كەزەڭدە ء«ا.كەكىلباەۆتىڭ «شىڭىراۋ» پوۆەسىنىڭ يدەيالىق-كوركەمدىك ەرەكشەلىكتەرى» تۋرالى ەسسە جازىپ, تاقىرىپتىڭ اشىلۋى, ادەبي تالداۋ ءادىسى, سىني ويلاۋ داعدىسى, گرامماتيكالىق ساۋاتتىلىعى مەن ءستيلى تۇرعىسىنان سىنعا ءتۇستى.
پروفەسسور, فيلولوگيا عىلىمدارىنىڭ دوكتورى ادىلەت قابىلوۆ باستاعان قازىلار قۇرامىنا جۇزدەن جۇيرىكتى انىقتاۋ وڭايعا تۇسپەگەن. جەڭىمپازداردى ماراپتتاۋ اقتاۋ قالاسىنداعى وبلىستىق كىتاپحانا عيماراتىندا ءوتتى. كىتاپقۇمار قۇربىلارىنىڭ قۋانىشىنا ورتاقتاسقان مۇنايلى اۋداندىق ونەر مەكتەبىنىڭ شاكىرتتەرى مىڭ بۇرالا بيلەپ, ءان مەن كۇيدى توگىلتتى.
«بۇل ءىس-شارانى ۇلتتىق رۋحانياتىمىز بەن مەملەكەت ىسىندە وشپەس ءىز قالدىرعان كەمەڭگەر تۇلعا, زاڭعار جازۋشى ءابىش كەكىلباي ۇلىن ەسكە الىپ, ونىڭ ءتول ادەبيەتىمىزدىڭ پوەزيا, پروزا, دراماتۋرگيا, سىن, پۋبليتسيستيكا جانە اۋدارما جانرلارىنا قوسقان وراسان ۇلەسىن, جالپى شىعارماشىلىق جولى مەن ازاماتتىق بولمىسىن ناسيحاتتاۋعا ارناپ وتىرمىز. ءبىزدىڭ باستامامىزدى قولداپ, اتالعان بايقاۋدى ءوز اۋماعىندا وتكىزۋگە كەلىسىم بەرگەن مۇنايلى اۋدانى اكىمدىگىنە العىس بىلدىرەمىز. جاستار – ەلدىڭ بولاشاعى, ولاردىڭ ۇلتتىق ونەرگە, مادەنيەت پەن ادەبيەتكە تەرەڭ قانىعا وسۋىنە جاعداي تۋعىزۋ – بىزگە مىندەت. بۇل وسى ماقساتتا تۋىنداعان وي ەدى, مۇنايلىلىق بالالاردىڭ ىنتاسىن, قۇلشىنىسىن كورىپ قۋانىپ تۇرمىز. بۇل باعىتتاعى جۇمىسىمىز جالعاسىن تابا بەرەدى, كىتاپ وقۋشىلار باسەكەسىن قىزعىلىقتى فورماتتا وتكىزۋ ارقىلى قازاق ادەبيەتى كورنەكتى وكىلدەرىنىڭ ءومىرى مەن شىعارماشىلىعىن وقۋشىلار اراسىنا ناسيحاتتاي بەرەتىن بولامىز», دەگەن «Qazaqstan Constrauction Holding» جشس ديرەكتورى, ء«ابىش وقۋلارى» بايقاۋى يدەياسىنىڭ اۆتورى جانە دەمەۋشىسى نۇرالحان كۋلچيكوۆ جەڭىمپاز جەتكىنشەكتەرگە باعالى سىي-سياپات تاپسىرىپ, مۇنايلى اۋداندىق كىتاپحاناسىنا تارتۋ رەتىندە وننان استام ۇستەل مەن ورىندىق بەرىلەتىنىن جەتكىزدى.
ءوڭىردىڭ زيالى قاۋىم وكىلدەرى جاستاردى كىتاپ وقۋعا شاقىرعان بايقاۋدىڭ ءمانى مەن ماعىناسىن, ۇيىمداستىرىلۋىن جوعارى باعالادى.
ماڭعىستاۋ وبلىسى
