وتىرىستى اشقان ماۋلەن اشىمباەۆ بيىلعى جولداۋ مەملەكەت باسشىسى جۇرگىزىپ وتىرعان رەفورمالاردىڭ قيسىندى جانە دايەكتى جالعاسى ەكەنىن اتاپ ءوتتى. سونداي-اق سەنات توراعاسى ەكونوميكالىق رەفورمالاردىڭ ماڭىزىنا توقتالىپ, كەيىنگى بەس جىلدا رەسپۋبليكالىق بيۋدجەتتىڭ كىرىسى 80 پايىزعا ارتقانىن العا تارتتى. الايدا بۇل وڭ ءۇردىس بيۋدجەت شىعىستارىنىڭ وسۋىمەن سايكەس كەلمەيدى. ياعني شىعىستار كىرىستەردەن ەكى ەسە كوپ.
«پرەزيدەنت قاسىم-جومارت توقاەۆ جولداۋدا ەكونوميكالىق بلوكقا باسا ءمان بەردى. اتاپ ايتقاندا, مەملەكەتتىڭ اقشا-نەسيە جانە فيسكالدى ساياساتى اراسىنداعى ۇيلەسىمسىزدىكتى جويۋ ماسەلەسىنە ەرەكشە توقتالدى. بۇل باعىتتا ءبىز كورپەگە قاراي كوسىلۋىمىز كەرەك. الداعى كەزەڭگە ارنالعان باستى مەسسەدج وسى بولۋعا ءتيىس. سوندىقتان بىزگە كىرىستەردى تەڭگەرىمدى ۇلعايتۋ قاجەت», دەدى م.اشىمباەۆ.
تالقىلاۋ بارىسىندا سپيكەر بيۋدجەت شىعىستارىن ۇلتتىق قور قاراجاتى ەسەبىنەن جابۋ ماسەلەسىنە الاڭداۋشىلىق ءبىلدىردى. سەنات توراعاسى سالىق بازاسىن دامىتۋ جانە ارتتىرۋ ءۇشىن جاڭا ىنتالاندىرۋ شارالارى قاجەت ەكەنىن ايتا كەلە, پالاتا مەن ساراپشىلاردىڭ وسى سالاداعى بىرلەسكەن جۇمىسىنىڭ باسىم باعىتتارىنا نازار اۋداردى.
«سالىق كودەكسىن ازىرلەۋ كەزىندە جەكە تابىس سالىعىنىڭ سارالانعان مولشەرىن ەنگىزۋ جانە سالىق جەڭىلدىكتەرىن وڭتايلاندىرۋ مۇمكىندىگىن قاراستىرۋ كەرەك. بارلىق سايكەسسىزدىك پەن ولقىلىقتى دەر كەزىندە جويۋ قاجەت. ويتكەنى بيزنەس ناقتى ويىن ەرەجەلەرىن تالاپ ەتەدى. سوندىقتان جازالاۋ تاسىلىنەن باس تارتۋ جانە تاۋەكەلدەردى باسقارۋ جۇيەسىن جەتىلدىرۋ ماڭىزدى. بۇل بيزنەستى ودان ءارى دامىتۋعا جانە سالىق بازاسىن ۇلعايتۋدى ىنتالاندىرۋعا مۇمكىندىك بەرەدى. ەكونوميكالىق دامۋ ءۇشىن ءتيىستى, ونىڭ ىشىندە ەنەرگەتيكالىق ينفراقۇرىلىم قاجەت. بۇل رەتتە ەنەرگەتيكا كوزدەرىن جاڭعىرتۋدىڭ ءمانى زور. اەس سالۋدىڭ قانشالىقتى وزەكتى ەكەنى دە وسىنداي ماسەلەلەردەن تۋىندايدى», دەپ م.اشىمباەۆ مۇددەلى تاراپتاردى پالاتانىڭ زاڭ شىعارۋ جۇمىسىنا قاتىسۋعا شاقىردى.
ءوز كەزەگىندە قارجى ءمينيسترى ءمادي تاكيەۆ ۇلتتىق ەكونوميكالىق الەۋەتتى دامىتۋ, بيۋدجەت تاپشىلىعىن ازايتۋ جانە قازىرگى وزەكتى پروبلەمالاردى ەڭسەرۋدى كوزدەيتىن كەشەندى شارالار تۋرالى ايتتى. سونداي-اق ول ۇلتتىق قور اكتيۆتەرىن ۇلعايتۋ بويىنشا جۇرگىزىلىپ جاتقان جۇمىستارعا جانە مەملەكەتتىك بيۋدجەتتىڭ ءتيىمسىز جۇمسالۋىنا قارسى كۇرەس جۇرگىزۋ باعىتىندا قولعا الىنعان تەتىكتەرگە توقتالىپ ءوتتى.
كەزدەسۋ بارىسىندا سەنات جانىنداعى ساراپشىلار كلۋبىنىڭ مۇشەلەرى – «Zertteu Research Institute» كوممەرتسيالىق ەمەس ۇيىمىنىڭ تەڭ قۇرىلتايشىسى جانە اتقارۋشى ديرەكتورى شولپان ايتەنوۆا, «NAC Analytica» كورپوراتيۆتىك قورىنىڭ باسقارما توراعاسى راسۋل رىسمامبەتوۆ, ەكونوميكالىق زەرتتەۋلەر ينستيتۋتى توراعاسىنىڭ ورىنباسارى ءادىل قۇسمانوۆ, قارجى سالاسىنىڭ اناليتيگى اندرەي چەبوتارەۆ جانە م.لومونوسوۆ اتىنداعى ممۋ قازاقستانداعى فيليالى ەكونوميكا كافەدراسى مەڭگەرۋشىسىنىڭ ورىنباسارى يۋليا باەۆا ءسوز سويلەپ, جولداۋدا جۇكتەلگەن مىندەتتەردى ىسكە اسىرۋ جونىندە ءوز ۇسىنىستارىن ايتتى. ءىس-شارادا قابىلدانعان زاڭنامالىق شارالاردىڭ ناتيجەلەرى مەن قولدانىستاعى جوبالار جانە قازىرگى زامانعى سىن-قاتەرلەردى ەسكەرە وتىرىپ, باسقا ەلدەردىڭ تاجىريبەسىنە نازار اۋدارۋ ماسەلەسى دە ءسوز بولدى.
