اقتوبەدە ۇزدىك اۋداندىق سوت انىقتالدى

اقتوبە. 27 قاڭتار. وڭىردەگى ون ءتورت اۋداندىق سوت اراسىنان اقتوبە وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى «جىلدىڭ ۇزدىك اۋداندىق سوتى» كونكۋرسىندا جەڭىمپاز اتانىپ, رەسپۋبليكالىق بايقاۋعا جولداما الدى. بۇل تۋرالى egemen.kz ءتىلشىسى حابارلادى. سوتتىڭ جۇمىسىن دۇرىس دەڭگەيدە ۇيىمداستىرۋ سوت تورەلىگىن ويداعىداي جۇزەگە اسىرۋدىڭ نەگىزى بولىپ تابىلادى. «2014 جىلدىڭ ۇزدىك سوتىن» انىقتاۋ ماقساتىندا قۇرىلعان كوميسسيا بىلتىرعى ون ايىنىڭ جۇمىس قورىتىندىلارى بويىنشا اۋداندىق جانە وعان تەڭەستىرىلگەن سوتتاردىڭ جۇمىستارىن تارازىلاي كەلە, جوعارى كورسەتكىشتەرگە جەتكەن اقتوبە وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىن جەڭىمپاز دەپ تانىدى. وتكەن جىلدىڭ 10 ايىندا اتالعان سوتپەن 268 ازاماتتىق, 124 قىلمىستىق جانە 449 اكىمشىلىك ىستەر قارالعان. سوت وندىرىسىندە قارالعان ىستەردىڭ 2014 جىلدىڭ 10 ايىندا اپەللياتسيالىق ساتىدا 8 ازاماتتىق, 7 قىلمىستىق جانە 1 اكىمشىلىك ىستەر, كاسساتسيالىق ساتىدا 3 قىلمىستىق ءىس قارالعان. ونىڭ ىشىندە, كۇشى جويىلعان نەمەسە وزگەرتىلگەن سوت اكتىلەرى بولعان جوق. سوت كەڭسەسىنىڭ ءىس جۇرگىزۋىنە باعىتتالعان جۇمىستار دا دۇرىس جولعا قويىلعان. اي سايىن «اشىق ەسىك» كۇنىن وتكىزۋ, ءۇن-بەينەجازبا قۇرىلعىسىن پايدالانۋ ارقىلى سوت پروتسەستەرىن جۇرگىزۋ, ەلەكتروندىق تالاپ ارىزداردى قابىلداۋ, بۇقارالىق اقپارات قۇرالدارىمەن ءوزارا جۇمىس جاساۋ ءتيىستى دەڭگەيدە جۇزەگە اسىرىلىپ, ۇيىمداستىرۋشىلىق شارالار جوعارى دەڭگەيدە ورىندالعان. سونىمەن قاتار, سوت تورەلىگىن جۇزەگە اسىرۋ بارىسىندا جانە سوت كەڭسەسى جۇمىسىنىڭ ءتيىمدى ۇيىمداستىرىلۋىن دۇرىس جولعا قويىپ, ايتارلىقتاي كورسەتكىشتەرگە قول جەتكىزگەن قوبدا جانە مارتوك اۋداندىق سوتتارى تيىسىنشە ەكىنشى جانە ءۇشىنشى ورىنداردى يەلەندى. ساتىبالدى ءساۋىرباي. دەرەك: egemen.kz. سۋرەت: akt.sud.kz.