قوستانايدا نان قىمباتتايتىن بولدى

قوستاناي. 27 قاڭتار. قوستاناي وبلىسىندا ناننىڭ باعاسى وسەتىن بولدى. بۇل تۋرالى egemen.kz ءتىلشىسى حابارلادى. قوستاناي وبلىسىندا وسى ۋاقىتقا دەيىن ناننىڭ باعاسى رەسپۋبليكا بويىنشا ەڭ تومەن, 42 تەڭگە بولىپ كەلگەن. وبلىستا قۇرىلعان الەۋمەتتىك قوردىڭ ارقاسىندا ناننىڭ باعاسى ءتورت جىل بويى قىمباتتاعان جوق. وبلىس اكىمى نۇرالى سادۋاقاسوۆ وبلىستاعى ناۋبايحانالاردىڭ قارجىلىق كۇردەلى جاعدايىنا بايلانىستى الەۋمەتتىك ناننىڭ ءبىر بولكەسىنىڭ باعاسىن وسىرۋگە تۋرا كەلەتىندىگىن ايتتى. وبلىس اكىمى نۇرالى سادۋاقاسوۆ: «وسى كەزگە دەيىن ءبىز ەڭ تومەن باعانى ۇستاپ كەلدىك. پەتروپاۆلوۆسك پەن كوكشەتاۋدا الەۋمەتتىك ناننىڭ ءبىر بولكەسى 47-48 تەڭگە بولدى. قازىر ەسەپتەۋ جۇمىستارى ءجۇرىپ جاتىر. ەگەر ءبىز ناننىڭ باعاسىن وسىرمەسەك, ديىرمەندەر مەن ناۋبايحانالاردىڭ جاعدايى مۇنان دا تومەندەيدى. سوندىقتان بولكە ناننىڭ باعاسى 3-4 تەڭگەگە كوتەرىلەدى», دەدى. سونىمەن قاتار ايماق باسشىسى مۇنى تۇرعىندار دۇرىس تۇسىنەتىندىگىن دە ايتتى. ءنازيرا جارىمبەتوۆا. دەرەك: egemen.kz. سۋرەت: yvizion.kz.