كوزبوياۋشىلىق

ۇكىمەت بولگەن قاراجاتتى دىمكاس جانداردىڭ قاجەتىنە جۇم­ساۋ­دىڭ ورنىنا ءوز قالتاسىنان شىعار­عان­داي «ۇنەمدەپ» قالۋعا تىرىساتىن شەنەۋنىكتەر وبلىستا جوق ەمەس. ونسىز دا تاعدىردىڭ اۋىر تاۋ­قى­مەتىن جاستايىنان تارتىپ, جىعىلعان ۇستىنە جۇدىرىق سياقتى ءومىردىڭ اۋىر ازابىن ارقالاپ كەلە جاتقان قيىن دا قيلى جان ازابى ولاردى تۇك ويلاندىرماعان ءتارىزدى. ادامگەرشىلىك اسىل قاسيەتتەرمەن ءۇش قايناسا سورپاسى قوسىلمايتىن مۇنداي باسسىزدىق ارەكەتتەر پروكۋراتۋرا تاراپىنان اشكەرەلەنبەگەندە «جانى اشىماستىڭ قاسىنداعى باسى اۋىرماس» قىلىق ءالى دە جالعاسا بەرەرى كادىك ەدى. وبلىستىق پروكۋراتۋرانىڭ قوعامدىق كەڭەس وتىرىسىندا كەل­تىرىلگەن مالىمەتتەرگە سۇيەنسەك, مۇگەدەكتەرگە «مۇسىركەي» قاراۋ­شىلىق اۋدانداردا جاپپاي سيپات العانىن بايقاۋ قيىن ەمەس. سوعان قاراعاندا, ءتيىستى مەكەمەلەر تاراپىنان باقىلاۋ-ءتارتىپتىڭ بوساڭسىعانى ما, الدە مەملەكەت قازىناسىن «قاعۋدىڭ» ءبىر قيتۇرقى جولى ما دەگەن ويعا ەرىكسىز كەلەسىڭ. ماسەلەن, ەسىل اۋدانىنىڭ تۇ­ر­ع­ىنى ك.بەكقوجين ەكىنشى توپتاعى مۇگەدەك رەتىندە ءبىر جىل بويى تيەسىلى 12 ارنايى گيگيەنالىق قۇرالدىڭ ورنىنا 2-ءۋىن عانا العان. ءبىر عاجابى, اۋدانداعى مۇگەدەكتەردىڭ كوپشىلىگى دەنساۋلىققا اۋاداي قاجەتتى وسىن­داي مەديتسينالىق پرەپاراتتارمەن قامتاماسىز ەتىلمەگەن. م.جۇ­ماباەۆ اۋدانىن­دا وڭىردەگى ءدىم­كاس جانداردىڭ تورتتەن ءبىرى تۇرا­تى­نىنا قاراماستان جوعارىداعىداي فاكتىلەردىڭ تىركەلگەنىن بىلاي قويايىق, ساناتوري-كۋرورتتىق ەم-دومدارعا قاتىستى جەڭىلدىكتەردەن قاعىلعانى تاڭداندىرماي قويمايدى. ال تايىنشا اۋدانىنىڭ لاۋازىمدى تۇلعالارى تىرەك-قيمىل مۇشەلەرى زاقىم­دانعان جانە كوزى ناشار كورەتىن عارىپ ادام­دارعا تيفلوتەحنيكالىق قۇرالداردى ۋاقتىلى جەتكىز­بەۋىنە ەش وكىنبەيتىن سياقتى. ويتكەنى, مۇن­داي جاعىمسىز جايتتار بىرنەشە مارتە ورىن العان. «ءبىر اپامنان ءبىر اپام سوراقى» دەگەندەي, شال اقىن اۋدانى شەنەۋ­نىكتەرىنىڭ مىنا كوزبوياۋ­شى­لىعى ايدى اسپاننان ءبىر-اق شىعارعانداي اسەر قالدىرادى. كورۋ قابىلەتى ناشار گ.كوستەلەوۆا دەگەن مۇگەدەككە ارنايى قولساعات بەرىلىپتى. ءتىپتى, العانى جونىندە قول دا قويعان كورىنەدى. ال تەكسەرىس بارىسىندا قولساعات اۋداندىق جۇمىسپەن قامتۋ ءبولىمى باسشىسىنىڭ سەيفىنەن سوپاڭ ەتىپ شىعا كەلگەن. ءبىر اۋداننىڭ ورتان قولداي ءبىر مامانى جۇرمەك تۇگىل ورنىنان ازەر قوزعالاتىن مۇگەدەك­تى كۋرەرلىك جۇمىسقا «ورنا­لاس­تىرىپ», «ساقالشى-ساقالشى دەگەنگە ءوز ساقالىن بويايدىنىڭ» كەرىن كەلتىرىپ تىنعان. مىنە, وسىنداي دەرەكتەرگە قاراپ-اق مۇددەلى ۆەدوموستۆولار مەن ولار­دىڭ قاراۋىنداعى قىزمەت­كەرلەردىڭ ءوز مىندەتتەرىنە قالاي قاراي­تىنىن باعامداي بەرۋگە بولادى. جاقىندا قۇزىرلى ورگاندار تاعى ءبىر باسشى­نىڭ جالعاندى جالپاعىنان باسىپ كەلگەن ادىمىن اشتىرمادى. سويتسە, ول جۇيكە اۋرۋىنا شالدىققان بالالار ديسپانسەرىنە جەتەكشىلىك ەتكەن تۇستا جورگەكقاپتاردى 3-4 ەسە ارتىق باعاعا پۇلداپ, 3 ميلليون تەڭگەنىڭ كوزىنە سۋ قۇيعان. تىقىر تايانعانىن سەزىسىمەن تابانىن جالتىراتقان. ءومىر ەسقالي, «ەگەمەن قازاقستان». سولتۇستىك قازاقستان وبلىسى.