سۋرەت: ru.freepik.com
وسى جولداۋدان كوڭىلگە توقىعان دۇنيەم – پرەزيدەنتتىڭ تاربيە باعىتىنداعى ايتقان سوزدەرى. ەلىمىزدى وركەندەتۋ باعىتىنداعى جوسپار-جوبالاردان ءبىلىم سالاسى دا مەملەكەت باسشىسىنىڭ نازارىنان تىس قالمادى. ەل بولاشاعى جاستاردىڭ قولىندا ەكەنى ايتپاسا دا تۇسىنىكتى, سول سەبەپتى بۇگىنگى وسكەلەڭ ۇرپاققا ۇلتتىق تاربيەمىزدى ءسىڭىرىپ, قۇقىق بۇزۋشىلىققا قارسى رۋحتا تاربيەلەۋ جاعىنا كوپ كوڭىل ءبولىندى. وعان قوسا مەملەكەت تاراپىنان جاستارىمىزدى قولداۋ, الەۋمەتتىك جاعىنان وسال توپقا جاتاتىن وتباسى ماسەلەسى دە مەملەكەتتىك ساياساتتان شەت قالمايتىنىن جەتكىزدى, ۇلتتىق قوردان بالالاردىڭ بولاشاق يگىلىگىنە دەپ قارجى بەرۋ باستاماسىن جانداندىرۋعا ءمان بەرىلدى.
بۇعان قوسا مەملەكەت باسشىسى مەكتەپتەردىڭ جۇمىسىن جاقسارتۋ شارالارىن قولعا العان ءجون ەكەنىن دە اتاپ ءوتتى. بۇل رەتتە مۇعالىمدەردىڭ بىلىكتىلىگىن ارتتىرۋعا, الەۋمەتتىك مارتەبەسىن كوتەرۋگە كوڭىل ءبولۋدى وتە ورىندى ايتتى.
«ۇستازدار – ۇلتتىڭ زياتكەرلىك قۋاتى. ولار ءبىلىمدى ۇرپاق تاربيەلەۋ ارقىلى ەلىمىزدىڭ وركەندەۋىنە جول اشادى. ۇزدىك وقۋ باعدارلاماسى, زاماناۋي مەكتەپتەر, وزىق باسقارۋ جۇيەسى بولسا دا, ۇستاز بىلىكتى بولماسا, ونىڭ ءبارى بەكەر ەكەنى انىق. سوندىقتان پەداگوگيكالىق جوعارى وقۋ ورىندارىنا تالاپتى, قابىلەتتى جاستاردى قابىلداۋعا باسا ءمان بەرۋ كەرەك. جالپى, بۇل باعىتتاعى جۇمىستىڭ بەتالىسى جاقسى, ونى جالعاستىرۋ قاجەت», دەپ مەملەكەت باسشىسى ءبىلىم سالاسىنا بارىنشا كوڭىل ءبولىنىپ وتىرعانىن اڭعارتتى.
ال تۇتاس حالىقتى بىرلىككە ۇيىستىرا العان بەرەكەلى باستاما «تازا قازاقستان» جالپىۇلتتىق ەكولوگيالىق اكتسياسى اياسىندا ەلىمىزدە كوكتەمنەن بەرى كوپ شارۋا اتقارىلدى. پرەزيدەنت جولداۋدا اتالعان اكتسياعا بىرنەشە ايدىڭ ىشىندە 3 ميلليونعا جۋىق ازامات قاتىسقانىن اتاپ ءوتتى. مىڭداعان ءۇيدىڭ اۋلاسى تازارتىلىپ, 1 ميلليون توننادان اسا قوقىس جينالىپتى. بۇل – وتە جاقسى كورسەتكىش. ءالى دە بولسا اكتسيانى توقتاتپاي, وسى رۋحتا جالعاستىرا بەرگەن ابزال. راسىندا, بۇل باستاما بىزدە جاڭا مادەنيەت, جاڭا قوعامدىق ەتيكا ورنىعىپ كەلە جاتقانىن كورسەتەدى.
«حالقىمىزدىڭ بويىندا جاقسى قاسيەتتەر وتە كوپ. مىسالى وزگە ەلدەر ءبىزدى قوناقجاي, اقكوڭىل حالىق رەتىندە بىلەدى. ءدال سولاي تازالىق جۇرتىمىزدىڭ قانىنا, جانىنا سىڭگەن قاسيەت بولۋى كەرەك», دەگەن مەملەكەت باسشىسى «تازا قازاقستاننىڭ» ايماقتاردا ساپالى جۇزەگە اسۋىنا اكىمدەر تىكەلەي جاۋاپتى ەكەنىن شەگەلەپ ايتتى. دەسە دە اكىمدىكتىڭ ۇيلەستىرۋ جۇمىستارىنا جۇمىلىپ, اينالا توڭىرەكتىڭ تازا بولۋىنا ءبىر كىسىدەي اتسالىسۋ – ءاربىر ادامنىڭ ازاماتتىق بورىشى. تازالىق جيناعان جەردە ەمەس, ونى ساقتاعان جەردە بولاتىنى, اتا-بابامىزدان ىقىلىم زاماننان بەرى ونەگە-وسيەت بولىپ كەلە جاتقان قاعيدا ەمەس پە ەدى؟
قورىتا ايتساق, پرەزيدەنتتىڭ تازالىق مادەنيەتىن قالىپتاستىرىپ, «تازا قازاقستان» اكتسياسىن ودان ءارى جانداندىرىپ, تابيعاتقا دەگەن جاناشىرلىعىمىزدى, تازالىققا دەگەن جاقىندىعىمىزدى دا ءبىزدىڭ قوناقجايلىعىمىزبەن قاتار اتالار قاسيەتكە اينالدىرۋ تۋرالى ويى وتە قۇپتارلىق. ارينە مەكتەپتىڭ وقۋ باعدارلاماسىندا وسكەلەڭ ۇرپاقتى تازالىق مادەنيەتىنە باۋلۋ ءىسى كەندە قالىپ جاتقان جوق. ءتۇرلى اكتسيالار, تاربيە ساعاتتارى وتكىزىلىپ تۇرادى. وقۋشىلاردى مۇنداي مەملەكەتشىلدىك باعىتتا تاربيەلەيتىن ۇلكەن باستامالاردان بارىنشا تىس قالدىرماۋعا تىرىسامىز.
سۆەتلانا يساەۆا,
مۇعالىم
تالدىقورعان
