جاس تالانت حالىقارالىق كونكۋرستا قازاقستان اۆتورلارىنىڭ شىعارمالارىن فورتەپيانودا ورىنداپ, شەتەلدىك قازىلاردىڭ جوعارى باعاسىنا يە بولعان. ايتا كەتەيىك, ابىلاي – استاناداعى جۇمابەك تاشەنوۆ اتىنداعى مەكتەپ-گيمنازيانىڭ 9-سىنىپ وقۋشىسى. سونداي-اق روزا باعلانوۆا اتىنداعى №2 مۋزىكالىق مەكتەپتە ءبىلىم الادى. زاعيپ بولسا دا ونەرگە قۇشتار. ءبىرىنشى توپتاعى مۇگەدەك ادامنىڭ مۇمكىندىگى شەكسىز دەپ
سانايدى.
ەسكە سالساق, جاس ونەرپاز بۇعان دەيىن «حابار» تەلەارناسىنان كورسەتىلگەن «جۇلدىزاي» بايقاۋىندا لاۋرەات اتانسا, بۇگىن حالىقارالىق ونەر دوداسىندا توپ جاردى. «جەڭىمپاز بولىپ جاتقانىما باقىتتىمىن. مۇمكىندىك بەرگەنى ءۇشىن مۋزىكالىق مەكتەپ مۇعالىمى ولەسيا يۆانوۆناعا, انام مەن اكەمە راحمەت», حالىقارالىق بايقاۋدىڭ باس جۇلدەگەرى.
ابىلاي ەسەپكە دە جۇيرىك. گەرمانيا, تۇركيادا مەنتالدى اريفمەتيكادان وتكەن وليمپيادادا توپ جارىپ, جۇلدەلى ورىنعا يە بولعان. جاس ورەن بولاشاقتا IT سالاسىنىڭ مامانى بولۋدى قالايدى.
سونداي-اق اتالعان ونەر دوداسىندا الماتىلىق سۋرەتشى اسەمگۇل سۇلەيمەنوۆا دا باس جۇلدەنى جەڭىپ الدى.
«مەنىڭ باستى ماقساتىم – قازاقى ناقىشتاعى سۋرەتتەرىمدى الەمگە تانىتۋ. ءبىزدىڭ ەلىمىزدە دە ونەر ادامدارى كوپ ەكەنىن, بار ەكەنىن بىلدىرگىم كەلەدى», دەيدى اسەمگۇل سۇلەيمەنوۆا.
اتالعان بايقاۋعا ەلىمىزدەن بارعان ۇمىتكەرلەر كوپ. اتاپ ايتساق, اعايىندى گ ۇلىماي, دىنمۇحاممەد, نۇرباقىت تالاپ ساحناعا شىعىپ, ۇلتتىق ونەرىمىزدى ايگىلەدى. دومبىرادا قازاق كۇيىن كۇمبىرلەتتى. دوداعا بالالارمەن قاتار كاسىبي مۋزىكانتتار دا قاتىستى. «بىرىنشىدەن, ۇرلەمەلى اسپاپ كۆينتەتىمىزگە بيىل 20 جىل تولىپ وتىر. وسى ورايدا بۇل بايقاۋعا ارنايى كەلدىك. ۇلتتىق ونەردى تانىتىپ, قازاقتىڭ تۇرمىس-سالتىن, سان ءتۇرلى ءداستۇرىن كورسەتۋدى ماقسات ەتتىك», دەيدى قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى جانات ەرمانوۆ.
بيىل ءتورتىنشى جىل قاتارىنان ءوتىپ جاتقان «التىن ۋاقىتتىڭ دارىنى» حالىقارالىق بايقاۋىن ۋكراينا ازاماتتارى ۇيىمداستىرىپ وتىر. ولار مۋزىكا, بەينەلەۋ ونەرى, حورەوگرافيا جانە باسقا دا اتالىمدار بويىنشا ونلاين ىرىكتەۋدەن وتكەن 25 ەلدىڭ وكىلىن ۇلىبريتانياعا شاقىرعان. بايقاۋعا قاتىسۋ اقىلى. ودان بولەك ۆيزا جانە جول شىعىندارى بار. ال قازاق ونەرپازدارىنىڭ لوندونعا بارۋىنا دەمەۋشىلەر قولداۋ كورسەتكەن.
«ۇلكەن دارىن يەلەرىنە ارنالعان ءدۇبىرلى دودا كوپ. ءبىزدىڭ بايقاۋعا ءوزىن ءالى تانىتىپ ۇلگەرمەگەن, بىراق تالانتتى ونەر ادامدارى قاتىسادى. بەس جاستاعى بالادان باستاپ جەتپىستەن اسقان قارياعا دەيىن ساحناعا شىعىپ جاتىر», دەيدى بايقاۋ ۇيىمداستىرۋشىلارى.
جەڭىمپازداردىڭ ەسىمدەرى بايقاۋدىڭ رەسمي سايتىنداعى ۇزدىكتەر تىزىمىنە ەنگىزىلەدى. سونداي-اق وزىق وقۋ ورىندارىنان شاقىرۋلار الىپ, شەتەلدىك كومپانيالار ولارعا قىزمەتتەر ۇسىنۋ مۇمكىندىكتەرى دە كەزدەسەدى. قاتىسۋشىلار دارىندىلار ۆيزاسىنا يە بولىپ, ۇلىبريتانيا مەن اقش-تا ونەرلەرىن شىڭداي الادى.
