جانى جومارت ازامات

وسىدان جارتى عاسىر بۇرىن 27 قاڭتاردا اتىراۋ وبلىسىندا مۇنايشى وتباسىندا دۇنيەگە كەلگەن دامير مەديناموۆ ورتا مەكتەپتى ۇزدىك بىتىرگەن سوڭ, العاشقى ەڭبەك جولىن ماقات اۋداندىق كومسومول كوميتەتىندە حاتشى بولىپ باستادى. 1986-1988 جىلدار ارالىعىندا كەڭەس ارمياسى قاتارىندا ءجۇرىپ, ينتەر­ناتسيونالدىق بورىشىن اۋعان­ستانداعى وت پەن وقتىڭ اراسىندا اتقارعان بوزبالا جىگىت دامير ەرجۇرەكتىگى ءۇشىن «قىزىل جۇلدىز» وردەنىن  الدى. بۇرىنعى كسرو ەلدەرىنە تارايتىن اسكەري گازەتتەردە قازاقستاندىق سولدات دامير تۋرالى ماقالالار جاريالانىپ,  ونىڭ باتىلدىعى مەن اسكەري شەبەرلىگى ما­داقتالدى. ول 1989 جىلى سول كەزدەگى قازاق­ستانداعى ەڭ تاڭداۋلى جوعارى وقۋ ورنى بولىپ سانالاتىن س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا ءتۇسىپ, قازاق ءتىلى مەن ادەبيەتى ءپانىنىڭ  وقىتۋ­شىسى ماماندىعىن الىپ شىعادى. ۋنيۆەرسيتەتتى بىتىرگەن 1995 جىلى قازاق­ستان رەسپۋبليكاسىنىڭ ءباسپاسوز جانە بۇقارالىق اقپارات ىستەرى جونىندەگى ۇلتتىق اگەنتتىگىنە قىزمەتكە ورنالاسادى. مىنە, سودان بەرى تابانى كۇرەكتەي جيىرما جىل بويى كەيىننەن مينيسترلىك بولىپ وزگەرگەن وسى ورگاننىڭ بۇقارالىق اقپارات قۇرالدارى  سالاسىنداعى قۇرىلىمدىق بولىمشەسىندە قىزمەت اتقارىپ كەلەدى. 1997 جىلعى ماۋسىم ايىندا اگەنتتىكتىڭ قۇرامىندا دامير مەدي­ناموۆ  جاڭا استانا – اقمولا قالاسىنا كوشىپ كەلدى. ارينە, بۇل ايتۋعا عانا وڭاي دۇنيە بولاتىن. قالعان 11 ارىپتەسى اقمولاعا پويىزبەن كەلىپ جاتقاندا, جاسى 30-دان جاڭا اسقان جىگىتتىڭ اگەنتتىكتىڭ بۇكىل دۇنيەسىن ءبىر ءوزى جۇك كولىگىمەن استاناعا اكەلۋى وڭايعا تۇسپەدى. ونىڭ قولىنان كەلمەيتىن ءىسى جوعىن, «سەگىز قىرلى, ءبىر سىرلى» ەكەنىن, قاشان دا كومەككە ءازىر تۇراتىنىن قىزمەتكەرلەردەن سان رەت ەستىدىم. سول 1997 جىلى اگەنتتىكتىڭ بۇكىل عيماراتىنا ەلەكتر سىمدارىن جۇرگىزىپ, بارلىق تەحنيكاسىن ىسكە قوسىپ, شارۋاشىلىق ماسەلەلەرىمەن دە دامير اينالىستى. ءداميردىڭ ادامدىق, ازاماتتىق قاسيەت­تەرى جونىندە كوپ ايتۋعا بولادى. وعان ءوزىم دە سان رەت كۋا بولدىم. مينيسترلىكتە جۇمىس ىستەيتىن قىزمەتكەرلەردىڭ باسىم كوپشىلىگى جاستار بولعاندىقتان, ولاردىڭ ماسەلەلەرىن شەشۋگە دە دامير كومەكتەسەتىن. ەڭبەكتە دە ەرىنبەي-جالىقپاي, ىزدەنىپ جۇمىس اتقاراتىن دامير مەديناموۆ تالاي جاسقا تالىمگەر دە بولىپ, ءتالىمدى تاربيە بەردى. وسىنداي يگى ىستەرى, جاقسى ەڭبەگى, كاسىبي بىلىكتىلىگى لايىقتى باعالانىپ «قازاقستان رەسپۋب­ليكاسىنىڭ مادەنيەت قايراتكەرى» اتاعىمەن, «استانا قالاسىنا – 10 جىل» مەدالىمەن جانە ماقتاۋ گراموتاسىمەن اتالىپ ءوتتى. بۇگىنگى تاڭدا جىگىت اعاسى دامير زايىبى گۇلبارجان ەكەۋى ەكى ۇل ءوسىرىپ, ۇلكەنى باۋىر­جاندى ۇيلەندىرىپ, نەمەرە ءسۇيىپ وتىر. ءوزىمىز دە وتباسىمىزبەن 2007 جىلعى ءساۋىر ايىندا استانا قالاسىنا مادەنيەت جانە اقپارات مينيسترلىگىنە قىزمەتكە اۋىسىپ كەلگەلى بەرى, مەديناموۆتار وتباسىمەن جاقسى ارالاسىپ كەتتىك. وعان دا دانەكەر بولعان دامير ەدى.  استانا بولعاندىقتان, پاتەر ماسەلەسى قيىن ەكەنى بارشاعا ءمالىم. 2008 جىلعى اقپان ايىندا پاتەردەن-پاتەرگە وتباسىمىزبەن كوشىپ-قونىپ جۇرگەنىمىزدە, دامير مەن گۇلبارجان ەكەۋى اباي كوشەسىندەگى ۇيدەگى  3 بولمەلى پاتەرىنە ءبىزدى تۇرعىزدى. جولىمىز بولىپ سول جىلعى تامىز ايىندا ءبىز دە 3 بولمەلى پاتەرگە قول جەت­كىزدىك. جاسىم جەر ورتاسىنا جەتىپ, قينالعان ساتتە قول ۇشىن سوزعان ءداميردىڭ ازاماتتىعىنا ابدەن ءتانتىمىن. قازىر دامير مەن گۇلبارجاننىڭ نەمەرەسى دياردىڭ كىندىك شەشەسىمىن. ءيا, وسى وتباسىنىڭ بۇكىل اعايىن-تۋعانى, قۇدا-جەگجاتى ءبىزدىڭ دە تۋىستارىمىز بولىپ كەتتى. ناعىز جانى جومارت ازامات, مىنە, وسىنداي بولسا كەرەك-ءتى! گۇلماھيرا نۇربەكقىزى. استانا.