فوتو: ۆيدەودان الىنعان كادر
جول اپاتى بولعان جەردە تۇسىرىلگەن ۆيدەو الەۋمەتتىك جەلىدە تاراپ ءجۇر. ۆيدەو كادرلارىندا اۆتوبۋستىڭ استىندا قالعان زەينەتكەر مەن وعان كومەكتەسۋگە تىرىسىپ جاتقان ادامدار بەينەلەنگەن.
قالالىق پوليتسيا دەپارتامەنتى بۇل جاعدايعا قاتىستى تۇسىنىكتەمە بەردى. پوليتسەيلەردىڭ حابارلاۋىنشا, جول اپاتى 17 قىركۇيەك كۇنى ساعات 13:30-دا بوستاندىق اۋدانىندا بولعان.
«اۆتوبۋس جۇرگىزۋشىسى تيميريازەۆ كوشەسىمەن شىعىس باعىتتا كەلە جاتىپ, سولعا بۇرىلعان كەزدە 1947 جىلى تۋعان ەر ادامدى باسىپ كەتكەن. ول جول بولىگىن باتىس باعىتتا بەلگىسىز جەردە كەسىپ ءوتتى. جول-كولىك وقيعاسى سالدارىنان جاياۋ جۇرگىنشى دەنە جاراقاتىن الىپ, اۋرۋحاناعا جاتقىزىلدى. اپات فاكتىسىن تەرگەۋگە بوستاندىق اۋداندىق پوليتسيا باسقارماسىنىڭ قىزمەتكەرلەرى كىرىستى», دەلىنگەن حابارلامادا.
ال قالالىق قوعامدىق دەنساۋلىق ساقتاۋ دەپارتامەنتى زارداپ شەككەن زەينەتكەردىڭ ورتالىق قالالىق كلينيكالىق اۋرۋحاناعا جەتكىزىلىپ, وعان شۇعىل وتا جاسالعانىن حابارلادى.
«قازىرگى ۋاقىتتا ناۋقاستىڭ جاعدايى اۋىر دەپ باعالانىپ وتىر. ناۋقاس جانساقتاۋ بولىمىندە جاتىر, ول دارىگەرلەردىڭ تۇراقتى باقىلاۋىنا الىنعان», دەپ حابارلادى قالالىق دەنساۋلىق ساقتاۋ باسقارماسىنان.
