سۋرەت: ru.freepik.com
راسىندا, قازىر الەمدە ينۆەستيتسياعا دەگەن تالاس قاتتى بەلەڭ العان. وسىنداي كەزدە سىرتتان كەلەتىن ينۆەستورلاردىڭ جولىن توسىپ وتىرا بەرمەي, ەلگە قارجى تارتۋعا پرەزيدەنت جولداۋدا اتاپ وتكەن ء«دال وسى جەردە جانە ءدال قازىر» قاعيداسىمەن ارەكەت ەتكەنىمىز ءجون. سول سەبەپتى ۇكىمەت جانىنداعى ينۆەستيتسيا شتابىنىڭ قۇزىرەتىن كەڭەيتۋ ناقتى قادام بولىپ وتىر.
بۇل شەشىم مەتالدى تەرەڭدەتە وڭدەۋ, مۇناي-گاز-كومىر حيميا, تۋريزم, ەنەرگەتيكا جانە ماشينا جاساۋ سياقتى ستراتەگيالىق ماڭىزدى سالالارداعى جوبالاردى جۇزەگە اسىرۋدى جىلدامداتادى. ول جاڭا تەحنولوگيالاردى ەنگىزۋدى جەڭىلدەتىپ قانا قويماي, مىڭداعان جۇمىس ورنىن اشىپ, ەل ەكونوميكاسىنىڭ وسۋىنە ىقپال ەتەدى.
ينۆەستورلاردى تارتۋ بيلىكتىڭ بارلىق تارماعىنىڭ ورتاق مۇددەگە بەلسەندى قاتىسۋىن تالاپ ەتەدى. ۇكىمەت ءوز جۇمىسىن تابىسقا قول جەتكىزۋ باعىتىنا قاراي بەيىمدەپ, بۇل ىسكە تەك ورتالىق ورگاندار عانا ەمەس, جەرگىلىكتى اتقارۋشى بيلىكتىڭ تە بەلسەندى قاتىسقانى ماڭىزدى. اسىرەسە حالىقارالىق قارجى ينستيتۋتتارىمەن بىرلەسىپ, مەملەكەت-جەكەمەنشىك ارىپتەستىگى جوبالارىن ساپالى دايىنداۋعا ەرەكشە نازار اۋدارۋ قاجەت. جولداۋدا مەملەكەت باسشىسى ۇكىمەتكە حالىقارالىق قارجى ۇيىمدارى مەملەكەت-جەكەمەنشىك ارىپتەستىگى تاسىلىمەن قارجىلاندىرىپ, تولىق جۇزەگە اسىراتىن اۋقىمدى جوبالاردىڭ ءتىزىمىن جاساۋدى تاپسىردى.
جالپى, مەملەكەت-جەكەمەنشىك ارىپتەستىگى ارقىلى قارجىلاندىرىلاتىن اۋقىمدى جوبالاردى انىقتاۋ, ىسكە قوسۋ قاراجاتتى تيىمدىرەك پايدالانۋدى قامتاماسىز ەتەدى جانە ءمانى بار باستامالاردى جۇزەگە اسىرۋدى جەدەلدەتەدى. سونداي-اق مەملەكەت باسشىسى شاعىن جانە ورتا بيزنەستى جۇيەلى قولداۋدىڭ ماڭىزدىلىعىن اتاپ ءوتتى. بۇل باستامانى بۇكىل بيزنەس قاۋىمداستىعى قولدايدى.
«ۇسىنىلاتىن جەڭىلدىكتەردىڭ بيزنەس وكىلدەرىنە تۇسىنىكتى بىرىڭعاي ءتىزىمىن ازىرلەۋ قاجەت. شاعىن جانە ورتا بيزنەستى دامىتۋ ءۇشىن فينتەح تاسىلدەرىن پايدالانۋعا بولادى. بۇل ماسەلە بويىنشا ءتيىستى ۇسىنىستار بار», دەدى پرەزيدەنت جولداۋدا.
وسى رەتتە ۇكىمەت شاعىن جانە ورتا بيزنەستى اشۋ راسىمدەرىن وڭتايلاندىرىپ, بار شەكتەۋلەردى الىپ تاستاپ, قولداۋ شارالارى تۋرالى العاشقى اقپاراتتى الۋدى ءىسىن جاڭا باستاعان كاسىپكەرلەر ءۇشىن قولجەتىمدى ەتۋ كەرەك دەپ ەسەپتەيمىن.
ءبىز پارتيا رەتىندە بيزنەس ماسەلەلەرىنەن حاباردار بولۋعا, تىكەلەي اينالىسۋعا قۇقىلىمىز. وڭىرلەرگە شىققان ءىسساپارلارىمىز اياسىندا كاسىپكەرلەرمەن كەزدەسىپ ءجۇرمىز جانە ولاردىڭ ءۇنىن, ءوز ۇسىنىستارىمىزدى ۇكىمەتكە جەتكىزۋگە بارىنشا تىرىسامىز.
«بيىل ەگىس ناۋقانىنا ەكى ەسە كوپ قاراجات ءبولىندى. الايدا اگروونەركاسىپكە بولىنەتىن بۇكىل اقشانىڭ 70 پايىزى – مەملەكەت قارجىسى. بۇل سالاعا كوممەرتسيالىق بانكتەردىڭ قاراجاتىن دا تارتۋ قاجەت. ديقاندارعا ءوسىمى از نەسيە بەرۋ ءۇشىن مەملەكەتتىك قارجى ينستيتۋتتارىن سۋبسيديالاۋ شارالارى قولعا الىندى. بانكتەرگە قاتىستى وسىنداي تاجىريبەنى قولدانۋ كەرەك», دەگەن پرەزيدەنت مەملەكەتتىك قارجى ينستيتۋتتارى ارقىلى نەسيە الۋ ماسەلەلەرىنە ەرەكشە نازار اۋدارۋ قاجەتتىگىن باسا ايتتى. نەسيە شارتتارىن ورىنداۋدا پروبلەمالار ءجيى تۋىندايدى, ال كەپىلدىك تالاپتارى قۇجاتتاردا كورسەتىلگەندەرگە سايكەس كەلە بەرمەيدى. قاجەتتى قۇجاتتار ءتىزىمىن ناقتى رەتتەۋ قاجەت.
جالپى, قولداۋ شارالارىن جۇيەلەۋ جانە تىكەلەي سۋبسيديالاۋدان جەڭىلدەتىلگەن نەسيەلەۋگە كوشۋ – دەر كەزىندە جاسالعان قادام. كاسىپكەرلەرگە جەڭىلدەتىلگەن نەسيەلەندىرۋگە قول جەتكىزۋ ماڭىزدىراق, ال مەملەكەت ءۇشىن بۇل تۇراقتى ەكونوميكالىق وسۋگە ىقپال ەتەتىن ينۆەستيتسيانىڭ قايتارىلۋىن قامتاماسىز ەتەدى.
ايداربەك حوجانازاروۆ,
ءماجىلىس دەپۋتاتى
