بىلىكتى پەداگوگ – تۇراقتى وركەندەۋدىڭ نەگىزى

ماسەلەنىڭ بۇلاي قاراستىرىلۋى كوبىنە الەمدىك دامۋ ديناميكاسىنا, ۇلتتىق جانە ايماقتىق, سونداي-اق جاھاندىق اۋقىمداعى ەكونوميكالىق دامۋ جاعدايلارىنىڭ تەز وزگەرۋىنە بايلانىستى. اتاپ ايتقاندا, كوپتەگەن حالىقارالىق ساراپشى بۇعان دەيىن وزىق ۇلتتىق ءبىلىم جۇيەلەرىنىڭ الدىندا جاس ۇرپاقتى تسيفرلىق داعدى­لار­عا ۇيرەتۋ مىندەتى تۇرعانىن اتاپ وتكەن ەدى. ال قازىر وقۋشىلارعا جاساندى ينتەللەكتىمەن جۇمىس ىستەۋ داع­دىلارىن ۇيرەتۋ قاجەتتىلىگى تۋىنداپ وتىر. بۇل ءبىلىم جۇيەلەرىنىڭ, سونىڭ ىشىندە ءبىزدىڭ ەلىمىزدىڭ الدىندا جاڭا سىن-تەگەۋرىن ەكەنى ءسوزسىز. جاساندى ينتەللەكت – «تاياقتىڭ ەكى ۇشى» بار ۇدەرىس. ۇلكەن وڭ مۇمكىندىكتەرمەن قا­تار, الاياقتىق, قاۋىپسىزدىك دەڭگەيىنىڭ تومەندەۋى جانە باسقا دا كوپتەگەن تاۋەكەل بار. بۇل سىناققا جاۋاپ, ەڭ الدىمەن, وتاندىق پەداگوگتەردىڭ الەۋەتىن ۇزدىكسىز ارتتىرۋ جۇيەسىن تەرەڭىنەن زەردەلەۋدى تالاپ ەتەدى. پەداگوگتەر ورتاسىندا جاس­تاردى وقىتۋ مەن تاربيەلەۋدىڭ جاڭا داعدىلارىن يگەرۋدىڭ تۇراقتى قاجەت­تىلىگىن قالىپتاستىرۋ ماڭىزدى.

زاماناۋي الەمدە قوسىمشا ءبىلىم قىزمەتىنىڭ نارىعى ءوسىپ كەلەدى. كوپ­تە­گەن ەل جىل سايىن پەداگوگتەردىڭ بىلىك­تىلىگىن ارتتىرۋعا, ەڭ الدىمەن ولار­­­دىڭ قوسىمشا ءبىلىم الۋىنا ميل­ليارد­تاعان قاراجات بولەدى. ەلىمىزدە دە مۇعالىمدەردى تۇراقتى قاي­تا دايارلاۋ جۇيەسىن جەتىلدىرۋ ما­ڭىزدى. پەدا­گوگ­تەر­دىڭ كاسىبي دامۋىنا مەم­لەكەتتىك جانە جەكە ماقساتتى ينۆەس­تيتسيالار قاجەت.

بۇگىندە «ورلەۋ» پەداگوگتەردىڭ بىلىك­تى­لىگىن ارتتىرۋ ۇلتتىق ورتالىعى ساپالى ءبىلىم كونتەنتىن قۇرۋ, پەداگو­­گي­كا­لىق قىزمەتكە ىنتالاندىرۋدى ارتتىرۋ جانە قۇندىلىعىن نىعايتۋ بويىنشا جۇمىس جۇرگىزىپ جاتىر. پەداگوگيكالىق ۇجىمدارعا وتاندىق جانە شەتەلدىك وزەكتى جانە يننوۆاتسيالىق تاجىريبەنى ۇزدىكسىز تاراتۋدى قامتاماسىز ەتىپ وتىر. سونىمەن قاتار پەداگوگتىڭ جاڭا پەداگوگيكالىق داعدىلارعا قاجەتتىلىگى ەسكەرىلەتىن قايتا دايارلاۋدىڭ قولاي­لى فورماتتارىن ىزدەۋ جانە ەن­گىز­ۋ جۇمىستارى جۇرگىزىلىپ جاتىر. قازىرگى ۋاقىتتا «ورلەۋ» باۇو پەدا­گوگ­تەردىڭ بىلىكتىلىگىن ارتتىرۋدىڭ كە­شەندى باع­دار­لاماسىن كەزەڭ-كەزەڭىمەن جۇزە­گە اسىرۋعا كىرىستى. ول وقىتۋدىڭ ءۇش دەڭ­گە­يىن, قاتىسۋشىلاردىڭ كۋرس­تان كەيىنگى قولداۋىن قامتاماسىز ەتەدى. ادىسكەر پەداگوگتەرگە ارنالعان كۋرستار دا وتكى­زىلىپ كەلەدى. «ورلەۋ» باۇو-دا ارالاس (گيبريدتى) وقىتۋدىڭ ءتيىمدى تەحنولوگيالارى قولدانىلادى. وقۋ ۇدەرىسىن دۇرىس جوبالاۋدىڭ جاڭا تاسىلدەرى جان-جاقتى قاراستىرىلىپ جاتىر. العاش رەت ماقساتتى مەكتەپ مۇعالىمدەرىنە ارنالعان ونلاين رەجىمىندەگى بازالىق كۋرستار باستالدى. بۇل ببجم, پيزا, پبب, ۇبت ناتيجەلەرى بويىنشا 1,5 ميلليوننان اسا دەرەكتى تالداۋ نە­گى­­­زىندە ازىرلەنگەن. مۇندا سونداي-اق جان-جاقتى دياگنوستيكالىق جانە قالىپ­تاستىرۋشى باعالاۋ تەحنولوگيا­لارى جيناقتالدى. 40 مىڭنان اسا پەدا­گوگتىڭ پاندىك قۇزىرەتتىلىكتەرى مەن الەۋ­مەتتىك-ەموتسيونالدىق بەيىنى تۋرا­لى الىنعان ۇلكەن دەرەكتەر الداعى ۋا­قىت­تا پەداگوگتەردى وقىتۋدىڭ ءتيىمدى مو­دەل­دە­رىن, الگوريتمدەرى مەن نىساندارىن ازىرلەۋ ءۇشىن وڭدەلەدى.

سونىمەن قاتار قازىر پرەزيدەنت ۇسىنعان «جايلى مەكتەپ» ۇلتتىق جوباسى اياسىنداعى ءبىلىم ۇيىم­دا­رىنىڭ پەداگوگتەرىنە ارنالعان كۋرس­تار­دىڭ ارنايى جۇيەسى ازىرلەنىپ جاتىر. پرەزي­دەنت­تىڭ قازاق­ستان حالقىنا جول­داۋىندا ونى ودان ءارى جۇزەگە اسى­رۋ, جايلى مەكتەپتەر ءۇشىن جەكە باسقارۋ جۇيەسىن قۇرۋ دا ماڭىزدى مەملەكەتتىك پراكتيكالىق مىن­دەت رە­تىن­دە بەلگىلەندى.

مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. ونىڭ ىسكە اسىرىلۋىنىڭ ماڭىزدى قۇرامداس بولىگى ۇلتتىق تەحني­كا­لىق جانە كاسىپتىك ءبىلىمدى رەفورمالاۋ جونىندەگى شارالارى بولاتىنى ءسوزسىز. سونداي-اق قازىرگى زامانداعى ەڭبەك نارىعى ءۇشىن جۇمىسشى مامان­دا­رىن دايارلاۋدىڭ جوعارى ساپاسىن قامتاماسىز ەتەتىن پەداگوگتەردىڭ بىلىك­تىلىگىن ارتتىرۋدىڭ جاڭا جۇيەلى تاسىل­دە­رىن ايقىنداۋ جانە ونى جۇزەگە اسىرۋ ماڭىزدى. «ورلەۋ» باۇو تجكب پەداگوگتەرىنىڭ بىلىكتىلىگىن ارتتىرۋدىڭ بىرقاتار باعدارلاماسىن ىسكە اسىرۋدى, ولاردى وقۋ ۇدەرىسىندە سيمۋلياتورلاردى, ۆيرتۋالدى جانە ناقتى ورتانى, كروسس-پاندىك جانە جوبالىق وقىتۋ قۇزىرەتتەرىن قولدانۋدىڭ ين­نوۆاتسيالىق ادىستەمەلەرىنە وقىتۋ­دى جوسپارلاپ جاتىر.

پەداگوگيكالىق شەبەرلىكتى ۇنەمى ارتتىرۋ جۇيەسىندە «ۇستاز» ۇلتتىق ونلاين-پلاتفورماسى ەرەكشە ءرول اتقا­رۋ­عا ءتيىس. بۇل ەلدەگى پەداگوگيكالىق تا­جىري­بەنىڭ, پەداگوگتەرىمىزدىڭ كا­سىبي جە­تىس­تىكتەرىنىڭ ەلەكتروندىق قاي­نار كوزىنە اينالادى جانە ەلىمىزدىڭ ءاربىر وڭىرىندەگى كەز كەلگەن پەداگوگكە قولجەتىمدى بولادى. پلات­فورمانى قۇرۋ جانە مازمۇنىن تول­تىرۋ بويىنشا جۇمىس بەلسەندى جۇر­گىزىلەدى.

ۇستازدىڭ ۇزدىكسىز كاسىبي دامۋى ەكو­نو­ميكانىڭ, مەملەكەت پەن ۇلتتىڭ تابىس­تى دامۋىنىڭ ستراتەگيالىق اسپەكتىسى ەكەنىن اتاپ ءوتۋ ماڭىزدى. پرەزيدەنتتىڭ قازاقستان حالقىنا جولداۋىندا وسىن­داي مىندەت قويۋ پەداگوگتەردىڭ مار­تەبەسىن ارتتىرادى, ولاردىڭ جاڭا بۋىن دايارلاۋداعى ەرەكشە ءرولىن بىل­دىرەدى. بۇل مەملەكەتتىك ساياساتتىڭ اۋقىمدى باعىتى, ءتيىستى شارالاردى جان-جاقتى, ساپالى قاراستىرىپ جۇ­زەگە اسىرعان جاعدايدا ۇلتتىق ءبىلىم جۇيەسى ءۇشىن عانا ەمەس, بۇكىل ەلدىڭ دامۋى ءۇشىن دە جاڭا مۇمكىندىكتەرگە جول اشادى.

ايدانا شيلىبەكوۆا,

«ورلەۋ» پەداگوگتەردىڭ بىلىكتىلىگىن ارتتىرۋ ۇلتتىق ورتالىعى» اق باسقارما توراعاسى