ينفوگرافيكانى جاساعان – زاۋرەش سماعۇل ,«EQ»
مەملەكەتتىك باسقارۋ ءىسىنىڭ تيىمدىلىگىن ارتتىرۋ ماسەلەسىن مەملەكەت باسشىسى العاش 2019 جىلعى جولداۋىندا كوتەرىپ, «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنعان ەدى. بۇل يدەيا «ادام مەملەكەت ءۇشىن ەمەس, مەملەكەت ادام ءۇشىن» دەگەن ىرگەلى قاعيدا اياسىندا كورىنىس تاپتى. جولداۋدىڭ سەگىزىنشى باعىتىنداعى ايتىلعان پىكىرلەر دە وعان ايقىن دالەل.
پرەزيدەنت جولداۋىندا «قازاقستان حالقى قازىر مۇلدە جاڭا ساياسي جاعدايدا ءومىر ءسۇرىپ جاتىر. كەيىنگى 5 جىلدا اۋقىمدى رەفورمالار جاسالدى. ەلىمىزدىڭ ساياسي جۇيەسى تۇبەگەيلى وزگەردى. جۇرتتىڭ سانا-سەزىمىندە بەتبۇرىس بولىپ جاتىر. حالىقتىڭ قۇقىقتىق مادەنيەتى ارتىپ كەلەدى», دەدى.
«حالىق ۇنىنە قۇلاق اساتىن مەملەكەت» تۇجىرىمداماسى مەملەكەتتىك اپپاراتتىڭ حالىققا بەت بۇرۋىنا ىقپال جاساپ, ەلىمىزدە جاڭا ساياسي مادەنيەتتىڭ قالىپتاسۋىنا جول اشقان, مەملەكەت باسقارۋ ىسىندە ساپالى وزگەرىسكە باستاعان ماڭىزدى يدەيا بولعانىن كورىپ وتىرمىز. پرەزيدەنت باستاماسىمەن قازىر مەملەكەتتىك اپپاراتتىڭ جۇمىسى اشىق, ءادىل, ادامعا باعدارلانعان سيپاتتا تۇراقتى جاڭعىرتىلىپ جاتىر.
جولداۋدا قوعام مەن بيلىك قۇرىلىمدارى اراسىنداعى قارىم-قاتىناس مادەنيەتىنىڭ وزگەرگەنى, مەملەكەتتىك قىزمەتشىلەردىڭ ازاماتتارمەن تىكەلەي سويلەسۋى قالىپتى جاعدايعا اينالعانى, مەملەكەتتىك قىزمەتشىلەر مىنەز-قۇلقىنىڭ جاڭا مودەلى قالىپتاسقانى, ولار جاۋاپكەرشىلىكپەن, پرواكتيۆتى, اشىق جانە ءتيىمدى جۇمىس ىستەي باستاعانى ايتىلدى. بۇل مەملەكەتتىك قىزمەتشىلەرگە الداعى ۋاقىتتا دا اشىقتىق, ادىلدىك قاعيداتىن ۇستانۋدىڭ ماڭىزدىلىعىن كورسەتەدى.
وسى ورايدا مەملەكەت باسشىسىنىڭ «مەملەكەت پەن قوعام اراسىنداعى ديالوگتىڭ ساپاسىن ودان ءارى ارتتىرا ءتۇسۋ ءۇشىن ءبارىمىز ادال ءارى ءادىل بولۋىمىز, تەك زاڭ اياسىندا ارەكەت ەتۋىمىز, بەرگەن ۋادەمىز بەن ءىسىمىز ءۇشىن جاۋاپ بەرە ءبىلۋىمىز كەرەك» دەگەن پىكىرىنىڭ مەملەكەتتىك قىزمەتشىلەرگە ماڭىزى زور.
وسى باعىتتا مەملەكەتتىك قىزمەتتى ءارى قاراي جۇيەلى تۇردە دامىتۋ ءۇشىن بيىل شىلدە ايىندا ەلىمىزدە مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسى بەكىتىلدى. اگەنتتىك مۇنى جۇزەگە اسىرۋ اياسىندا «مەملەكەتتىك قىزمەت تۋرالى» جاڭا زاڭ ازىرلەۋدى كوزدەپ وتىر. ول مەملەكەتتىك قىزمەتتىڭ ميسسياسى, مىندەتتەرى مەن تالاپتارىن جاڭاشا ايقىندايدى. بۇل زاڭ قازىرگىدەي ەڭبەك قاتىناستارىن, ياعني مەملەكەتتىك قىزمەتكە كىرۋ, وتكەرۋ جانە توقتاتۋ ماسەلەلەرىن رەتتەۋمەن شەكتەلمەي, ەڭ باستىسى مەملەكەتتىك قىزمەتشىلەردىڭ مىنەز-قۇلقىنىڭ ادامعا باعدارلانعان ۇلگىسىن بەكىتەدى. ياعني ەندى مەملەكەتتىك قىزمەتشىلەردىڭ ازاماتتاردىڭ تالاپ-تىلەكتەرىنە قۇلاق اسىپ, ادامعا باعدارلانۋى زاڭمەن مىندەتتەلەدى. بۇل مەملەكەتتىك قىزمەتشىلەر مەن ازاماتتاردىڭ قارىم-قاتىناس مادەنيەتىن جاڭا دەڭگەيگە كوتەرۋگە سەپتىگىن تيگىزەدى. سونىمەن قاتار مەملەكەت ۇسىناتىن يگىلىكتەر مەن قىزمەتتەردىڭ بيۋروكراتياسىز, اۋرە-سارساڭسىز قولجەتىمدىلىگىن قامتاماسىز ەتەدى. وسىنىڭ بارلىعى اشىقتىق, ادىلدىك قاعيداتتارىنىڭ قوعامدىق سانادا ءارى قاراي تەرەڭ ورنىعۋىنا جول اشادى.
ءبىز مەملەكەتتىك باسقارۋ ءىسىنىڭ تيىمدىلىگىن باعالاۋدا مەملەكەت باسشىسىنىڭ ء«اربىر شەشىم, ءاربىر جوبا ەڭ الدىمەن ەلگە پايدالى بولۋى قاجەت» دەگەن پىكىرىن ەسكەرۋىمىز قاجەت. سەبەبى حالىق ءۇشىن ەڭ باستىسى – ناتيجە.
جولداۋدا مەملەكەتتىك ورگانداردىڭ ازاماتتاردىڭ وتىنىشتەرىن قاراۋىنا قاتىستى ولاردى تالداۋ قاجەتتىلىگى ۇسىنىلدى. بۇل تۋرالى جولداۋدا وتىنىشتەردى قاراۋعا قاتىستى جۇمىستىڭ بىرىڭعاي ەكوجۇيەسى قالىپتاسا باستاعانىنىڭ ماڭىزدىلىعى, مۇنىڭ حالىقتىڭ قاجەتتىلىگى مەن تالاپ-تىلەگىن ناقتى ءبىلىپ وتىرۋعا مۇمكىندىك بەرەتىنى, وسى ورايدا مەملەكەتتىك ورگاندار ءوز جۇمىسىن جەتىلدىرۋ ءۇشىن ازاماتتاردىڭ وتىنىشتەرىن تالداۋعا كوبىرەك نازار اۋدارۋعا ءتيىس ەكەنى ايتىلعان.
ازاماتتاردىڭ وتىنىشتەرىنە تۇراقتى تالداۋ جۇرگىزۋ – قوردالانعان تۇيتكىلدى ماسەلەلەردى جۇيەلەپ, ولاردى رەتتەۋگە, بولدىرماۋعا جانە سول ارقىلى ناقتى شەشىمدەر قابىلداۋعا جول اشادى. ياعني قوردالانعان ماسەلەلەردىڭ سالدارىمەن عانا كۇرەسىپ قويماي, ولاردىڭ سەبەبىن انىقتاۋعا مۇمكىندىك بەرەدى. تالداۋ جۇرگىزۋدىڭ ماڭىزى دا وسىندا.
مەملەكەت باسشىسى جولداۋدا مەملەكەتتىك قىزمەتشىلەردىڭ بىلىكتىلىگىن ارتتىرۋ ماسەلەسىنىڭ ءالى دە وزەكتىلىگىن, ۇمىتكەردى قىزمەتكە تاعايىنداعان كەزدە ونىڭ كاسىبي جانە مورالدىق قاسيەتتەرىن مۇقيات ەسكەرۋ قاجەتتىگىن, ونىڭ بۇرىنعى جۇمىسىن قالاي اتقارعانى دا قاپەردە بولۋى كەرەكتىگىن نازارعا الدى. اگەنتتىك بۇل باعىتتا تۇراقتى جۇمىس جۇرگىزەدى.
دارحان جازىقباي,
مەملەكەتتىك قىزمەت ىستەرى اگەنتتىگىنىڭ توراعاسى
