سۋرەت: adyrna.kz
جەزقازعان قالاسىندا وتكەن كەزدەسۋگە 300-گە جۋىق ادام قاتىستى. وندا ءوڭىر ەكونوميكاسىنىڭ دامۋ مۇمكىندىكتەرى تالقىلاندى. دامىعان ونەركاسىبىمەن تانىمال ۇلىتاۋ وبلىسى كوپتەگەن ەكولوگيالىق ماسەلەلەرگە تاپ بولىپ وتىر. «Amanat» پارتياسىنىڭ اتقارۋشى حاتشىسى داۋلەت كارىبەكتىڭ ايتۋىنشا, بيىل 6 قازاندا وتانداستارىمىز ەلدىڭ بولاشاعىن ايقىندايتىن تاڭداۋ جاسايدى.
«اتوم ستانساسىن سالۋ تۋرالى سوڭعى شەشىمدى حالىق قابىلدايدى. ءدال وسى ماقساتتا رەفەرەندۋم وتكىزىلەدى. ۇلىتاۋ – بۇل تەك ۇلتتىڭ رۋحاني تىرەگى عانا ەمەس, سونىمەن قاتار ەجەلگى مەتاللۋرگيا جانە تاۋ-كەن ونەركاسىبىنىڭ وشاعى. بۇل ءوڭىردىڭ حالقى مىرىش قۇيىپ, قۇرىش بالقىتۋدىڭ, سونداي-اق شاحتالارداعى ەڭبەكتىڭ ءمانىن جاقسى بىلەدى. ەگەر پرەزيدەنت ايتقانداي, ادىلەتتى قازاقستاندى قۇرعىمىز كەلسە, وندا ءوز تاڭداۋىمىزدى جاساۋىمىز كەرەك. 6 قازاندا وتەتىن رەفەرەندۋم – وسىنداي تاريحي قادامداردىڭ ءبىرى», دەدى د.كارىبەك.
حالىق شتابىنىڭ مۇشەلەرى اەس قۇرىلىسى ماسەلەسىن جالپىۇلتتىق رەفەرەندۋمعا شىعارۋ ەلدەگى دەموكراتيالىق ينستيتۋتتاردىڭ نىعايۋىنىڭ ماڭىزدى كورسەتكىشى, «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ دالەلى ەكەنىن اتاپ ءوتتى.
سونداي-اق وسى كۇنى شتاب مۇشەلەرى ساتباەۆ قالاسىنا بارىپ, گ.وماروۆ اتىنداعى شاحتا قازۋ ترەسىنىڭ شاحتەرلەرىمەن كەزدەستى. تالقىلاۋعا 100-دەن اسا شاحتەر قاتىستى, وندا بولاشاق ەنەرگەتيكا جانە ەڭبەك نارىعىنىڭ نەگىزگى ماسەلەلەرى قوزعالدى. قاتىسۋشىلار ادىلەتتى قازاقستان قۇرۋ شاحتەرلەردىڭ بەلسەندى قاتىسۋىنسىز مۇمكىن ەمەس ەكەنىن اتاپ ءوتتى.
سودان كەيىن شتاب مۇشەلەرى جەزقازعان مىس قورىتۋ زاۋىتىنىڭ مەتاللۋرگتەرىمەن كەزدەستى. ەڭبەك ۇجىمى الداعى رەفەرەندۋمعا بەلسەندى قاتىساتىنىن ايتتى.
