استانادا قازاق-نەمىس مەكتەبىن سالۋ جوباسى قازاقستان پرەزيدەنتىنىڭ 2023 جىلى گەرمانياعا ساپارى اياسىندا قولعا الىنعان. مەملەكەت باسشىسى قاسىم-جومارت توقاەۆ ەكى ەل اراسىنداعى ىنتىماقتاستىقتىڭ ايشىقتى بەلگىسىنە اينالاتىن مەكتەپ سالۋ مۇمكىندىگىن قاراستىرۋدى تاپسىرعان ەدى.
جوبا «ۆوزروجدەنيە» قازاقستان نەمىستەرى بىرلەستىگى مەن «سامۇرىق-قازىنا» ۇلتتىق ءال-اۋقات قورى, استانا قالاسىنىڭ اكىمدىگى, وقۋ-اعارتۋ مينيسترلىگى جانە گەرمانيا ستاندارتتارى بويىنشا ءبىلىم بەرۋ باعدارلامالارىن ازىرلەۋگە جانە ەنگىزۋگە كومەكتەسەتىن گەرمانيا فەدەرالدى سىرتقى ىستەر مينيسترلىگى قولداۋىمەن جۇزەگە اسىرىلادى. مەكتەپ 600 وتاندىق وقۋشىعا نەمىس تىلىندە حالىقارالىق ءبىلىم بەرەتىن شەتەلدەگى نەمىس مەكتەپتەرىنىڭ جاھاندىق جەلىسىنىڭ ءبىر بولىگىنە اينالادى.
استاناداعى قازاق-نەمىس مەكتەبى گەرمانيانىڭ ءبىلىم ستاندارتتارى بويىنشا وقىتاتىن ورتا ازياداعى العاشقى مەكتەپ بولادى. وقۋ باعدارلاماسى تۇلەكتەر قازاقستاندا دا, گەرمانيادا دا مويىندالعان اتتەستات الا الاتىنداي ەتىپ قۇرىلعان. بۇل ولارعا قوسىمشا دايىندىق جانە قابىلداۋ ەمتيحاندارىنسىز گەرمانيانىڭ جوعارى وقۋ ورىندارىندا وقۋدى جالعاستىرۋلارىنا مۇمكىندىك بەرەدى.
جوبا باستاماشىلارىنىڭ ايتۋىنشا, قۇرىلىستى 2025 جىلدىڭ سوڭىنا دەيىن اياقتاۋ جوسپارلانىپ وتىر. ال 2026 جىلى مەكتەپ العاشقى وقۋشىلارعا ەسىگىن ايقارا اشادى. اتالعان جوبا قازاقستاندا ءبىلىم ساپاسىن ارتتىرۋعا عانا ەمەس, ەكى ەل اراسىنداعى مادەنيەت جانە ءبىلىم سالاسىنداعى بايلانىستى نىعايتۋعا دا ىقپال ەتپەك.
ايتا كەتەيىك, جوبا «سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورى ارقىلى قارجىلاندىرىلادى.
