بۇل كەزدەسۋدىڭ ماقساتى – گەرمانيا مەملەكەتىمەن ىنتىماقتاستىقتى دامىتۋ, كاسىبي تاجىريبە الماسۋ. ءىس-شاراعا ۋنيۆەرسيتەت ىشىندەگى ءتورت مەكتەپتىڭ ستۋدەنتەرى قاتىستى.
العاش بولىپ ءسوز سويلەگەن Maqsut Narikbayev University-ءدىڭ باسقارما توراعاسى تالعات نارىكباەۆ ولاف شولتس مىرزاعا كەزدەسۋگە كەلگەنى ءۇشىن العىسىن ءبىلدىرىپ, بۇل وقيعا ۋنيۆەرسيتەت ستۋدەنتتەرى ءۇشىن, جالپى وسىندا وقىپ جاتقان بولاشاق زاڭگەرلەر ءۇشىن ۇلكەن قۋانىش ءارى ءبىلىم الۋ جولىنداعى قۇلشىنىستارىنا سەرپىن بەرەتىنىن اتاپ ءوتتى.
– ءدال وسىنداي ايتۋلى ءىس-شارالار ەكى ەلدىڭ اراسىنداعى ءتۇرلى سالاداعى بەرىك بايلانىستاردى ودان ءارى نىعايتىپ, ستۋدەنتتەردىڭ ءبىلىمىن جەتىلدىرۋىنە ماڭىزدى مۇمكىندىك بەرەدى جانە ۇلكەن ۇلەسىن قوسادى دەپ ەسەپتەيمىن. بۇگىنگى سۇراق-جاۋاپ فورماتىنداعى جۇزدەسۋ ءبىزدىڭ ستۋدەنتتەردىڭ الەمدەگى ءتۇرلى جاعدايلارعا قاتىستى سىني جانە جاھاندىق كوزقاراس تۇرعىسىنان وي قورىتۋعا جەتەلەيتىنىنە سەنىمدىمىن, – دەدى ت.نارىكباەۆ.
كەزدەسۋگە مودەراتورلىق ەتكەن ۋنيۆەرسيتەت باسقارما توراعاسىنىڭ ورىنباسارى اينۇر كاربوزوۆا باسقوسۋدىڭ ماقساتىنا توقتالىپ, وقۋ ورنى جانە كەزدەسۋگە قاتىسىپ وتىرعان ستۋدەنتتەر تۋرالى ايتىپ ءوتتى.
حالىقارالىق قاتىناستار ماماندىعىنىڭ ستۋدەنتتەرى انەل ساپارعاليەۆا مەن ەگور دياچەنكو گەرمانيا فەدەرالدىق كانتسلەرىنە العىسىن ءبىلدىرىپ, ءوزىنىڭ وسى ماماندىقتى يگەرۋ بارىسىندا گەرمانيامەن ورتاق ءتۇرلى سالالارداعى جوبالارعا قاتىسىپ, اسىرەسە كولىك جانە لوگيستيكالىق ىنتىماقتاستىقتى نىعايتۋعا ۇلكەن ۇلەسىن قوسىپ جۇرگەنىن جەتكىزدى.
ال ءوز كەزەگىندە ولاف شولتس كولىك-لوگيستيكا, مۇناي-گاز, اۋىل شارۋاشىلىعى سالالارى مەن ەكولوگيا ماسەلەلەرى ەكى ەل ءۇشىن ماڭىزدى باعىتتار ەكەنىن اتاپ ءوتتى. سونداي-اق ول كەز كەلگەن سالادا وڭ ناتيجە اكەلەتىن باعىتتاردى قاراستىرىپ, ءتيىمدى ۇسىنىستارعا دايىن ەكەنىنە توقتالدى جانە ەكى تاراپ تا ءبىر-بىرىنەن الار تاجىريبەسى كوپ ەكەنىن العا تارتتى.
شىرىن ەسىمدى ستۋدەنت 80 جىلدىق تاريحى بار «Volkswagen» كومپانياسىنىڭ قازىرگى اياقالىسىنا قىزىعۋشىلىق ءبىلدىرىپ, اتاقتى اۆتوكونتسەرننىڭ ەل ەكونوميكاسى مەن كولىك يندۋسترياسىنا تيگىزىپ جاتقان پايداسى تۋرالى سۇرادى.
– ارينە, كەز كەلگەن كومپانيانىڭ ۋاقىت اعىنىمەن جاڭا جوبالارعا بەت بۇراتىنى سياقتى, «Volkswagen» دە ءوزىنىڭ تىڭ باستامالارىن ۇسىنىپ كەلەدى. جاڭا كولىك تۇرلەرىن قامتيتىن جوبالارى ءساتتى جۇزەگە اسىرىلىپ جاتىر. ونىمدەرى الەمگە كەڭىنەن تاراپ وتىر. ياعني بۇل كومپانياسىنىڭ ءبىزدىڭ ەلدى عانا ەمەس, جاھاندىق نارىقتى كولىكپەن قامتاماسىز ەتىپ وتىرعانى ءسوزسىز. كەيىنگى جىلدارى ەلەكتر قوزعالتقىشتى كولىك وندىرىسىنە بەت بۇردى. بۇل الەمدىك سۇرانىس, قوزعالىس بولعاندىقتان ءبىز بۇنى قابىلداۋىمىز كەرەك, – دەدى و.شولتس.
سونداي-اق ستۋدەنتتەردىڭ گەوساياسي احۋال, ەۋروپالىق وداق, حالىقارالىق قۇقىق, ۇلتارالىق قاتىناستار ماسەلەلەرىنە قاتىستى سۇراقتارىنا كەڭىنەن جاۋاپ بەرىپ, بۇرىنعى زاڭگەر رەتىندە ستۋدەنتتەرگە بارىنشا دۇرىس باعىت بەرۋگە تىرىستى.
– گەرمانيا بۇۇ-دان باستاپ, كوپتەگەن بەدەلدى حالىقارالىق ۇيىمعا مۇشە جانە بەلسەندى قاتىسىپ وتىرادى. جالپى, قارىم-قاتىناس ماسەلەسىندە ۇلتتار ءبىر-بىرىنەن قورىقپاۋى كەرەك. بۇل ازاماتتىق قوعام ءۇشىن وتە ماڭىزدى. وسى جەردە مەملەكەت باسشىلارى كەز كەلگەن ماسەلەنى كەڭىنەن قاراۋى كەرەك. شيەلەنىستىڭ تەرەڭدەي تۇسۋىنە كەرى اسەرىن تيگەزەتىن جايتتارعا مۇقيات بولۋ كەرەك, – دەگەن كانتسلەر ۋكراينا مەن رەسەي اراسىنداعى كۇردەلى جاعدايعا قاتىستى ويىن ءبولىستى.
جالپى, ستۋدەنتتەر ءبىلىم, ەكى ەل اراسىنداعى ورتاق مۇددەلەر, سۋ رەسۋرستارىن ءتيىمدى پايدالانۋ, الەمدىك كەلىسىم مەن بەيبىتشىلىك تاقىرىپتارىن قاۋزاپ, وزدەرىن تولعاندىرعان سۇراقتارىنا جاۋاپ الدى.
كەزدەسۋ سوڭىندا ۋنيۆەرسيت باسشىلىعى ولاف شولتسكە قازاقتىڭ ۇلتتىق برەند اسپابى سانالاتىن دومبىرانى تارتۋ ەتىپ, ستۋدەنتتەرمەن بولعان ەمەن-جارقىن اڭگىمەلەسۋى ءۇشىن ىستىق ىقىلاسىن ءبىلدىردى.
