سۋرەت: inbusiness.kz
وسى رەتتە قىزىلوردا وبلىسىنىڭ پوليتسيا دەپارتامەنتىندە مەملەكەت باسشىسى العا قويعان مىندەتتەردىڭ ساپالى ورىندالۋى مەن ەلىمىزدە زاڭ ۇستەمدىگى مەن ادىلدىكتى ساقتاۋ باعىتىنداعى جۇمىستار جۇيەلى اتقارىلىپ جاتقانىن ايتا كەتكەن ءجون.
بۇگىندە وڭىردە جاعداي تۇراقتى. قوعامدىق ورىندار مەن كوپقاباتتى ۇيلەر اۋلاسىندا قىلمىس پەن قۇقىق بۇزۋشىلىقتىڭ الدىن الۋ باعىتىنداعى جۇمىستار كۇشەيتىلگەنى كوزگە كورىنىپ تۇر. وسىنىڭ ناتيجەسىندە بيىلعى 8 ايدىڭ قورىتىندىسىمەن قۇقىق بۇزۋشىلىق 6%-عا, ونىڭ ىشىندە قىلمىس 11%-عا, اۋىر ساناتتاعى قىلمىس تۇرلەرى 12 پايىزعا تومەندەدى. 10 مىڭ تۇرعىنعا شاققانداعى قۇقىق بۇزۋشىلىق دەڭگەيى 5,8% ازايدى.
وسىنداي جۇيەلى جۇمىستار ارقىلى سىر ءوڭىرى رەسپۋبليكا بويىنشا قاۋىپسىز ايماقتار كوشىن باستاپ تۇر. قىلمىستاردى بولدىرماۋ باعىتىندا جىل باسىنان «ەسەپتەگى ادام», «تۇرمىس», «ەسەپتەگى ەلەمەنت», «كۆادرات», «كورشى باقىلاۋى», «ۋچاسكە», «زورلىق-زومبىلىقسىز قوعام» جەدەل-پروفيلاكتيكالىق ءىس-شارالارى جانە «اۋلا ىشىندە قابىلداۋ» اكتسياسى وتكىزىلدى.
«2024-2026 جىلدارعا ارنالعان ۇرلىققا قارسى ءىس-قيمىل» باعدارلاماسى نەگىزىندە بىرقاتار ءتيىستى پروفيلاكتيكالىق شارا ۇيىمداستىرىلدى. وسىنىڭ ناتيجەسىندە بوتەننىڭ مۇلكىن ۇرلاۋ قىلمىسىنىڭ تىركەلۋى 27%-عا ازايىپ, اۋىر تۇرلەرىنىڭ اشىلۋى 18,8%-عا جاقسارۋىنا قول جەتكىزىلدى. پوليتسەيلەردىڭ جەرگىلىكتى اتقارۋشى ورگاندارمەن بىرلەسكەن قىلمىسقا بەيىم تۇلعالاردى قالىپتى ومىرگە قايتا بەيىمدەۋ باستاماسى دا جەمىسسىز ەمەس. وسى باعىتتاعى جۇمىس ناتيجەسىندە بۇرىن سوتتى بولعان 201 ادام تۇراقتى جۇمىسپەن قامتىلىپ, 93-ءى ءتۇرلى كاسىپتىك وقۋ كۋرستارىنا قابىلداندى.
«مەملەكەت باسشىسىنىڭ حالىققا جولداۋىنداعى تاپسىرمالارىن ىسكە اسىرۋ باعىتىندا كەشەندى جوسپارلاردى ورىنداۋعا كىرىستىك. پرەزيدەنتتىڭ ەلىمىزدى قاۋىپسىز ءارى جايلى ەلگە اينالدىرۋ ۇستانىمى جاۋاپكەرشىلىكتى ۇستەي تۇسەدى. وڭىرىمىزدەگى قىلمىس سانىنىڭ ازايعانى قىزمەتكەرلەرىمىزدىڭ ەلدىك مۇددە جولىندا ايانباي ەڭبەك ەتۋىنىڭ ناتيجەسى دەپ بىلەمىز. ءبىزدىڭ قاتارىمىزدا قىزمەتىنىڭ قىر-سىرىن جەتىك مەڭگەرىپ, ادامدىق بولمىسىمەن ەڭبەك ەتىپ جۇرگەن كاسىبي, باتىل ماماندار از ەمەس», دەيدى قىزىلوردا وبلىستىق پوليتسيا دەپارتامەنتىنىڭ باسشىسى, پوليتسيا گەنەرال-مايورى ماحسۋدحان ابلازيموۆ.
قىزىلوردا
