سۋرەتتەردى تۇسىرگەن – ەرلان ومار, «ەQ»
2010 جىلدان بەرى تۇراقتى ۇيىمداستىرىلىپ كەلە جاتقان دۇنيەجۇزىلىك كوشپەلىلەر ويىندارىن قابىلداعان استانا ەتنوسپورت الامانىنىڭ ايبىنىن اسىرىپ, داڭقىن ەسەلەپ, كوشەلى ءىستىڭ كوشىنەن كەرۋەن تارتتى. 21 سپورت تۇرىنەن 97 مەدال جيىنتىعى ساراپقا سالىنىپ, 89 ەلدەن سپورتشىلار قاتىستى. ءبىزدىڭ ەلدىڭ ساڭلاقتارى 43 التىن, 34 كۇمىس, 37 قولا مەدال ەنشىلەپ, جالپى ناتيجەدە توپ باستادى.
التى قۇرلىققا ساۋىن ايتىلعان ەتنوسپورت وليمپياداسىن وتكىزۋگە بوي كوتەرگەن «كوشپەلىلەر الەمى» ەتنواۋىلىندا وتكەن جابىلۋ سالتاناتىندا ءبىلال ەردوعان العاۋسىز كوڭىلىن اقتاردى. دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى اۋقىمدى شارانى اۋىرسىنباي ارقالاي بىلگەن قازاق ەلىنە, مەملەكەت باسشىسى قاسىم-جومارت توقاەۆقا زور العىسىن جەتكىزدى. «قادىرلى قوناقتار, باۋىرلاس قازاقستاننىڭ ارداقتى ازاماتتارى! بارشاڭىزعا ىزگى سالەمىم مەن شەكسىز قۇرمەتىمدى جولدايمىن. ماعجان جۇماباەۆ جىرلاعان الىستاعى باۋىرىڭىز رەتىندە تۇركيادان بارشا حالقىمىزدىڭ دۇعاي-دۇعاي سالەمىن اكەلدىم. بۇل تاماشا جەتىستىك سىزدەرگە تيەسىلى, ارداقتى قازاق ەلى. بار بولىڭىزدار, نار بولىڭىزدار! V دۇنيەجۇزىلىك كوشپەلىلەر ويىندارىن وتكىزگەن قازاقستان تۇركى الەمىنىڭ تۋىستاس, باۋىرلاس ەكەنىن, مىزعىماس دوستىعى بەرىكتىگىن دۇنيە جۇزىنە ايگىلەدى. وسىناۋ ەتنوسپورت دوداسىندا تۇركىتىلدەس ەلدەردىڭ باي مۇراسى دارىپتەلىپ, سالت-ءداستۇرى ناسيحاتتالدى. كەلەسى دۇنيەجۇزىلىك ەتنوسپورت قابىلدايتىن قىرعىزستانعا ساتتىلىك تىلەيمىن», دەدى ءبىلال ەردوعان.
تۋريزم جانە سپورت ءمينيسترى ەربول مىرزابوسىنوۆ اپتاعا ۇلاسقان الاماننىڭ اياقتالعان ساتىنە جەتكەنىمىزدى اتاپ ءوتتى. «بايراقتى باسەكە ۇلتتىق سپورتىمىزدى ۇلىقتاپ, سالت-ءداستۇرىمىزدى دارىپتەپ, مادەني مۇرامىزدى تورتكۇل دۇنيەگە ايگىلەگەن بىرەگەي وقيعا رەتىندە تاريحتا قالدى. مەملەكەت باسشىسى قاسىم-جومارت توقاەۆتىڭ تىكەلەي باستاماسىمەن قازاق توپىراعىندا ۇيىمداستىرىلعان كوشپەلىلەر ويىندارى – ءمانى تەرەڭ, مازمۇنى باي بىرەگەي جوبا. ونىڭ تۇركى الەمىنىڭ التىن بەسىگى – قازاق جەرىندە جالاۋىن جەلبىرەتكەنى – ءبىز ءۇشىن زور مارتەبە ءارى شىن ماقتانىش.
بۇل بىزگە ۇلتتىق سپورت تۇرلەرىن دامىتىپ, تانىتۋعا عانا ەمەس, سونداي-اق تۋريستىك الەۋەتىمىزدى جارقىراتا كورسەتۋگە بەرىلگەن تاماشا مۇمكىندىك بولدى. ەڭ باستىسى, قازاقستان ادەتتەگىدەي سپورت ارقىلى مەملەكەتتەر اراسىنداعى بايلانىستى بەكەمدەۋدە ماڭىزدى قادام جاسادى.
وزدەرىڭىز تاماشالاپ, كۋا بولعانداي, دۇنيەجۇزىلىك كوشپەلىلەر ويىندارىنا 89 مەملەكەتتەن 2500-دەن استام سپورتشى قاتىستى. 21 سپورت تۇرىنەن 97 مەدال جيىنتىعى ساراپقا سالىندى. 30-دان اسا مەملەكەتتىڭ سپورتشىلارى مەدال يەلەندى. ونىڭ ىشىندە ايتۋلى الامانداعى باعدارلامانىڭ نەگىزىن قۇراعان كوشپەلىلەر وركەنيەتىنىڭ وكىلدەرىنەن بولەك, فرانتسيا, يتاليا, اۋستراليا, ماجارستان, پولشا, رۋمىنيا سەكىلدى مەملەكەتتەر دە التىن مەدال ولجالادى. جۇلدە العان مەملەكەتتەر قاتارىندا مۇحيت اسىپ كەلگەن كانادا, مەكسيكا سپورتشىلارى دا بار.
استانا تورىندەگى ويىنداردان كەيىن الەمدە ەتنوسپورتقا دەگەن قىزىعۋشىلىق ودان ءارى ارتا تۇسەتىنىنە كامىل سەنەمىن. ءبىز سپورتتان بولەك, مادەني جانە عىلىمي باعدارلاماعا دا ەرەكشە نازار اۋداردىق. مۇنداي الەمدىك اۋقىمداعى وقيعادان عىلىمي ءىز قالۋى قاشاندا ماڭىزدى. ايتۋلى الاماندى ويداعىداي وتكىزۋگە اتسالىسقان بارشاڭىزعا ريزاشىلىعىمدى بىلدىرەمىن. ورتاق ىسكە وڭىرلەر دە ۇلكەن ۇلەس قوسقانىن, ويىنداردىڭ مازمۇنىن بايىتقانىن بولە-جارا اتاپ وتۋگە ءتيىسپىز. قاتىسۋشىلار مەن قوناقتارعا تىكە تۇرىپ قىزمەت كورسەتكەن ەرىكتىلەردىڭ ەڭبەگى دە ەرەن. كەلەسى VI دۇنيەجۇزىلىك كوشپەلىلەر ويىندارىن باۋىرلاس مەملەكەت – قىرعىز رەسپۋبليكاسى قابىلدايدى. قىرعىز ەلىنىڭ الداعى باسەكەنى جوعارى دەڭگەيدە وتكىزۋىنە تىلەكتەسپىن. ەتنوسپورت دوداسىنىڭ بەدەلى بيىكتەي بەرسىن!» دەدى مينيستر.
تورتكۇل دۇنيەنىڭ ديدارىن وزىنە اۋدارعان دۇنيەجۇزىلىك كوشپەلىلەر ويىندارىنىڭ جابىلۋ سالتاناتى اسەم ءان مەن ءتاتتى كۇيمەن كومكەرىلدى. «ناز» مەملەكەتتىك بي تەاترى, «Royal Dance» بالەت شوۋى, ەركەعالي راحماديەۆ اتىنداعى مەملەكەتتىك اكادەميالىق فيلارمونياسى, قىرعىز رەسپۋبليكاسىنىڭ «قامبارقان» فولكلورلى-ەتنوگرافيالىق ءانسامبلى, قازاقستاننىڭ ەڭبەك سىڭىرگەن قايراتكەرى قاراقات ءابىلدينا, قايرات باەكەنوۆ, حالىقارالىق كونكۋرستاردىڭ لاۋرەاتى ءمادي سىزدىقوۆ جانە «مەلومەن» توبى ونەر كورسەتتى.
قورىتىندى شارادا دۇنيەجۇزىلىك كوشپەلىلەر ويىندارىنىڭ ءرامىزى – تورسىق قىرعىز رەسپۋبليكاسىنىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆقا تابىستالدى.
