جابىرلەنۋشىگە دەرەۋ العاشقى كومەك كورسەتىپ, جەدەل جاردەم مەن پوليتسيا قىزمەتكەرلەرىن وقيعا ورنىنا شاقىرعان. سونداي-اق بەينەباقىلاۋ كامەرالارىنىڭ كومەگىمەن وقيعا ورنىنان قاشىپ كەتكەن كۇدىكتىنىڭ باعىتىن انىقتاعان. شۇعىل حابارلاما العان اسكەري جاساق باستىعى, سەرجانت نۇرسۇلتان قايراتبەك, پاترۋلدەۋشى ساربازدار باقىتجان بورانباەۆ پەن ياروسلاۆ فيكس جەدەل ىزدەستىرۋ شارالارىن ۇيىمداستىرىپ, كوپ ۇزاماي كۇدىكتىنى قاراساي باتىر كوشەسىندە قولعا تۇسىرەدى.
كەشە ۇلتتىق ۇلاننىڭ ەلورداداعى اسكەري قالاشىعىندا قىزمەتىن قالتقىسىز اتقارعان اسكەري قىزمەتشىلەر ىشكى ىستەر ءمينيسترىنىڭ ورىنباسارى, ۇلتتىق ۇلاننىڭ باس قولباسشىسىنىڭ بۇيرىعىمەن «ۇلتتىق ۇلان قىزمەتىنىڭ ۇزدىگى» توسبەلگىسىمەن ماراپاتتالدى. ماراپاتتى جاۋىنگەرلەرگە ۇلتتىق ۇلان باس شتاب باستىعىنىڭ ورىنباسارى – جەدەل باسقارۋ باس باسقارماسىنىڭ باستىعى ەرلان جاقىپوۆ تابىستادى.
– قالا تىنىشتىعىن ساقتاۋ – ءبىزدىڭ باستى مىندەتىمىز. باس قالادا ءوتىپ جاتقان اۋقىمدى ءىس-شارا كەزىندە تۇرعىندار مەن قوناقتاردىڭ قاۋىپسىزدىگىن قورعاۋعا ەرەكشە ءمان بەرىلگەن. سوندىقتان كەز كەلگەن جاعدايعا دايىنبىز, – دەيدى ساربازدار.
بۇگىندە قالا كوشەلەرىندە تىكەدەن تىك تۇرىپ, تاۋلىك بويى تىنىشتىقتى ساقتاۋعا اتسالىسىپ جۇرگەن اسكەري جاساقتاردىڭ ارقاسىندا جوعالعان جاندار جاقىندارىنا تابىستالىپ, تابىلعان زاتتار يەلەرىنە قايتارىلدى. ءتۇرلى قىلمىستىڭ الدىن الدى. ساربازداردىڭ قىراعىلىعى كۇن سايىن ءتۇرلى قىلمىستىق وقيعاعا توسقاۋىل قويىپ, ەسىرتكىمەن, قارۋمەن جۇرگەن قوعامعا قاۋىپتى ازاماتتار قولعا ءتۇسىپ, زاڭ الدىندا جاۋاپقا تارتۋعا سەپتىگىن تيگىزىپ جاتىر. ادام ومىرىنە اراشا تۇسكەن جاعدايلار دا از ەمەس. بۇگىندە باس قالانىڭ تىنىشتىعىن ساقتاپ, تۇرعىنداردىڭ قاۋىپسىزدىگىن قورعاۋعا ۇلتتىق ۇلاننان كۇن سايىن مىڭنان اسا اسكەري قىزمەتشى جۇمىلدىرىلادى.
