شىعاراتىن زاۋىت كونۆەيەرىندە تولاس جوق
«اگروماشحولدينگ» زاۋىتىنىڭ الىپ تسەحتارى ءوندىرىس الاڭىنان گورى كورەرمەنىن كۇتىپ وتىرعان كورمەگە كوبىرەك ۇقسايدى. جۇمىسى تەمىرمەن, تەحنيكامەن بايلانىستى تسەحتاردىڭ شىبىن تايىپ جىعىلاتىن تازالىعىن ەكىنىڭ ءبىرى كوزگە ەلەستەتە الماس ەدى. «سارىارقااۆتوپروم» زاۋىتىنىڭ جاپوندىق Toyoto Fortuner جانە وڭتۇستىككورەيالىق Ssang Yong Nomad جۇردەك ماشينالارىن قۇراستىرىپ جاتقان اينالاسى اتشاپتىرىم تسەحىن ارالاعان كىسى ونىڭ قۋاتتىلىعىن اسەمدىككە باعالايدى. بىردەي كوك ءتۇستى جۇمىس كيىمىن كيىپ العان جۇمىسشى جىگىتتەردىڭ قولى ىسكە جاتتىعىپ, ماشينا قۇراستىرۋدىڭ قىر-سىرىن ۇيرەنىپ قالعانى بايقالادى. تەحنيكادان اۋىلى الىس ادامعا نە ەكەنى بەلگىسىز, بۇراندالى تەمىرلەر جەلىنىڭ اياعىنا كەلگەندە جۇتىنعان تەمىر تۇلپار بولىپ شىعادى. ونى تەكسەرىپ, قابىلداپ الاتىن تسەح شەبەرى ۇلانبەك سارسەنوۆ ەكى جىلدىڭ ىشىندە ءوزىنىڭ بىلىكتىلىگىن دە, قىزمەتىن دە ءوسىردى. قۇراستىرۋ تسەحىنىڭ باستىعى رومان گلۋششەنكو مامان-جۇمىسشىلار قاڭقاسىن قۇراپ الماي, الەمدىك برەندتى ساپقا قويۋدى مەڭگەرە المايتىنىن سەزدى. العاشقى ايلاردا تسەحقا جۇمىسقا كەلگەندەر تۇراقتامادى. ويتكەنى, كونۆەيەردەگى جۇمىستى يگەرۋ وڭاي ەمەس. رومان مەن ۇلانبەكتىڭ ەكەۋى دە وڭتۇستىك كورەياداعى كونۆەيەردە جۇمىس ىستەۋدى ۇيرەنىپ, شەتەلدىك ماشينالاردى قۇراستىرۋدىڭ بۇگە-شىگەسىن قالدىرماي ۇيرەنگەن جىگىتتەر. ەندى ولار قوستانايلىق جۇمىسشىلاردى ۇيرەتۋدە. ءبىز قازىر كەرەكتى جۇمىسشىلارىمىزدى جاساقتاپ الدىق. بارلىعى دا وسى ىسكە جۇرەك قالاۋىمەن كەلگەن جىگىتتەر. ولاردىڭ ءبىرازى قوستانايداعى اۆتوموبيل جولدارى كوللەدجىن بىتىرگەن, ءبىرازى تەحنيكا جوندەۋ ورىندارىنان كەلگەن. ەڭ باستىسى, ماشينا قۇراستىرۋ ىسىنە ىنتىزار, دەيدى تسەح شەبەرى ۇلانبەك سارسەنوۆ. ونىڭ ءوزى دە وسى ىسكە ىنتىزاردىڭ ءبىرى. جاسىنان تەحنيكاعا اۋەس بولىپ وسكەن ول اسكەري بورىشىن وتەگەن سوڭ ەشقايدا بۇرىلماي, وسىندا كەلىپ باعىن سىنايدى. جۇمىسقا قابىلدانعان وعان قازىر قوستانايداعى ز.الدامجار اتىنداعى تەحنيكالىق-الەۋمەتتىك ۋنيۆەرسيتەتىنەن العان ءبىلىمى دە جاقسى كومەك بولدى. جوعارى ءبىلىمىنىڭ ارقاسىندا كومپيۋتەردىڭ قۇلاعىندا وينايدى, وتە جەتىك. ۇلانبەك جۇمىسشىلارىن تويوتو ماشيناسىنىڭ قاسىنا جينادى. جاپوندىق برەندتى ساپقا قويعان وسى جىگىتتەردى ءبىز سۋرەتكە ءتۇسىرىپ الدىق. تسەح شەبەرى جارتى جىلدىڭ ىشىندە جۇمىستى ءۇيىرىپ العان جىگىتتەرى ءۇشىن كەۋدەسىن ماقتانىش سەزىمى كەرنەيتىنىن دە جاسىرمادى. سەرجان احمەتوۆتەن, ۆلاديمير ساۆيچەۆتەن, نۇربول ىسقاقوۆتان تسەح شەبەرىنىڭ ءۇمىتى مول. وتە تياناقتى جاستار. ال قۇراستىرۋ تسەحىنىڭ باستىعى رومان گلۋششەنكو ۇلانبەكتىڭ ماقتانىشىن تولىق قولدايدى ەكەن. سەبەبى, ول ادام بالاسىنىڭ ىستەگەن ءىسى تالپىنعاننىڭ قولىنان كەلەدى دەپ بىلەدى. – ءبىزدىڭ «اگروماشحولدينگتىڭ» ءوندىرىس الاڭى وڭتۇستىك كورەياداعى برەند ماشينالار قۇراستىرىلىپ جاتقان زاۋىت تسەحتارىنان ەش كەم ەمەس. ءتىپتى, ارتىق دەر ەدىم. ويتكەنى, بىرىنشىدەن, ءبىزدىڭ تسەحتارىمىز وتە كەڭ, بيىك, جارىق. جابدىقتارىنىڭ بارلىعى جاڭا, سىردىڭ ءيىسى شىعىپ تۇر. ال وڭتۇستىك كورەيا تسەحتارى تارلاۋ, جابدىقتارى دا جاڭا ەمەس ەكەنى كورىنىپ تۇر. ال ءبىزدىڭ ماماندار ءالى-اق ولاردىڭ قاتارىنا جەتىپ الادى, – دەيدى رومان ۆاسيلەۆيچ. ءبارىن ايت تا, ءبىرىن ايت, قوستانايداعى «سارىارقااۆتوپروم» ماشينا قۇراستىرۋ زاۋىتى قازاقستانداعى وسى سالانىڭ بىرەگەي نىسانى. ويتكەنى, ماشينا جاساۋ سالاسىنداعى وزگە زاۋىتتارداعىداي ەمەس, مۇنداعى جۇمىستاردىڭ 40 پايىزىنان استامى قوستانايلىق ماماندار مەن جۇمىسشىلاردىڭ قولىنان وتەدى. الىپ تسەحتا جۇمىستار نەگىزىنەن ۇلكەن ءۇش بولىككە بولىنەدى. الدىمەن ماشينا قورابى ءبىر تسەحتا دانەكەرلەنەدى, ەكىنشى تسەحتا ارنايى جابدىقتارمەن بويالادى, سوسىن بارىپ ەڭ كۇردەلى جۇمىس ۇلكەن تسەحتا باستالادى, قۇراستىرىلادى. ۇلانبەكتىڭ جىگىتتەرى وسى قۇراستىرۋ ءىسىنىڭ ءار تەتىگىن جاتقا بىلەدى. زەرگەرلىك جۇمىستان ارتىق-كەمى جوق. جىگىتتەردىڭ كۇنىنە ون ەكى ماشينانى ساپقا قويۋعا شامالارى جەتەدى. – ماشينانى ساپقا قويعاننان ونى سىناقتان وتكىزۋ ۇدەرىسى وڭاي ەمەس. العاشقى كەزدە ماشينالاردىڭ اقاۋى دا شىعىپ ءجۇردى. ويتكەنى, ول كەزدە جىگىتتەردىڭ قولى ءالى دە جاتتىعا قويماعان ۋاقىت قوي. ونداي ماشينالاردى قايتا تسەحقا اكەلىپ, قاتە كەتكەن جەرىنىڭ بارلىعىن جۇمىسشىلار مەن ماماندار تالقىلايتىنبىز, قايتا كورسەتەتىنبىز. ءبىر جاعىنان ولاردى مۇنداي جۇمىس ءتارتىبى پىسىتا ءتۇستى, – دەيدى رومان گلۋششەنكو. قازىر تسەحتا اقاۋلى ماشينالار جونىندە ءسوز ءتىپتى از بولادى. سوندا دا ماشينا تسەحتا دا, سىرتتاعى جولدا دا سىناۋ ۇدەرىستەرىنەن ابدەن تياناقتى وتكەن سوڭ عانا, ساتۋ سالونىنا قويىلادى. مىسقالداي ءمىن تابىلماۋى ءتيىس. قازاقستاندىق Ssang Yong Nomad تا, Toyoto Fortuner دە جۇتىنىپ تۇرادى. «سارىارقااۆتوپروم» جاۋاپكەرشىلىگى شەكتەۋلى سەرىكتەستىگىنە 2013 جىلى ەلباسىنىڭ «يندۋستريالاندىرۋ كوشباسشىسى» ساناتىنداعى «التىن ساپا» سىيلىعىن الىپ بەرگەن وسى تسەحتان شىققان قارلىعاش Ssang Yong Nomad بولاتىن. ول ەۋرازيالىق ەكونوميكالىق وداق ەلدەرىنە شىعارىلادى. ال Toyoto Fortuner الدىمەن قازاقستاندىق نارىقتى قامتاماسىز ەتۋگە باعىتتالعان. وتكەن جىلى جازدا قوستانايدا قۇراستىرىلعان تويوتو ماشيناسىنىڭ تۇساۋكەسەرى بولعاندا ەلباسى نۇرسۇلتان نازارباەۆتىڭ ءوزى كەلىپ, الەمدىك برەند قوس تۇلپاردىڭ قورابىنا ءوزىنىڭ قولتاڭباسىن قالدىردى. اينالدىرعان بەس جىلدىڭ ىشىندە قازاقستاندا ماشينا قۇراستىرۋ ءىسىنىڭ ورتالىعى بولىپ ۇلگەرگەن قوستانايداعى «اگروماشحولدينگ» زاۋىتىندا ماشينا قۇراستىرۋ ءىسىنىڭ مۋزەيى اشىلادى دەگەن بولجام بار. ەلباسىنىڭ قولتاڭباسى بار قوس تۇلپار سول مۋزەيدىڭ باستى جادىگەرى بولارىنا ءسوز جوق. ولار قازىر ساقتاۋلى تۇر. ارينە, وسى تسەحتىڭ العاشقى باسشىلارى, العاشقى ماماندارى مەن جۇمىسشىلارى – ۇلانبەك پەن رومان باستاعان جىگىتتەردىڭ سۋرەتى دە مۋزەيدەن ورىن الار بالكىم. قازىردە رەسپۋبليكاداعى ماشينا شىعارۋ ءوندىرىسىنىڭ كولەمىندە قوستاناي وبلىسىنىڭ ۇلەسى 17 پايىزدى قۇرايدى. «سارىارقااۆتوپروم» زاۋىتى 2014 جىلدىڭ كوكتەمىنەن باستاپ 500-گە تارتا تويوتونى ساپقا قويدى. ەلىمىز وندىرىسىندەگى جاڭا سالا – ماشينا قۇراستىرۋدىڭ كولەمى 2010 جىلدان 2013 جىلعا دەيىن 90 ەسە وسكەن. مىسالى, 2010 جىلى 77 ماشينا قۇراستىرىلسا, 2013 جىلى بۇل سان 7 مىڭنان اسىپ كەتكەن. الداعى ۋاقىتتا جىگىتتەردىڭ قولى كانىگى زەرگەردەي ماشينا قۇراستىرۋ ىسىنە ەپتەلە, ۇيرەنە تۇسەدى. زاۋىت تولىق قۋاتىنا كوشكەندە جىلىنا 3000 تويوتونى ۇسىناتىن بولادى. دالانى جول تاڭدامايتىن تۇلپارلار كەزەدى. ءنازيرا جارىمبەتوۆا, «ەگەمەن قازاقستان». قوستاناي.
