بۇل وقۋ-جاتتىعۋ العاش رەت كەشەندى ساباقتارمەن بىرگە ەكىجاقتى فورماتتا وتكىزىلدى. ءىس-شارالار اسكەري باسقارۋ ورگاندارىنىڭ ۇيلەسىمدىلىگىن جەتىلدىرۋگە, اسكەرلەردىڭ دالالىق داعدىلارىن ارتتىرۋعا جانە شتابتار مەن كومانديرلەردىڭ اسكەردى ۇدايى باسقارۋداعى پراكتيكالىق داعدىلارىن دامىتۋعا باعىتتالعان. وعان «شىعىس», «وڭتۇستىك» وڭىرلىك قولباسشىلىقتارىنىڭ بولىمشەلەرى جانە قارۋلى كۇشتەر قۇرلىق اسكەرلەرىنە تىكەلەي باعىناتىن اسكەري بولىمدەر تارتىلدى.
– احۋالدىڭ قۇبىلمالى جاعدايىندا ارتيللەريا, اۆياتسيا, اشقق جانە راديوەلەكتروندىق كۇرەس قۇرالدارىنىڭ كومەگىمەن ءتۇرلى اسكەر تەگى مەن اسكەرلەردىڭ ءوزارا ءىس-قيمىل ماسەلەلەرى ساپالى پىسىقتالدى. اتىستى رەتتەۋ, جەرگىلىكتى مانەۆرلەر جانە پوزيتسيالاردى جىلدام وزگەرتۋ جوعارى دەڭگەيدە ورىندالدى. ءاربىر اسكەري قىزمەتشى بارىنشا اسكەري تارتىپكە ساي, جەدەل جانە قيىن جاعدايدا مىندەتتەردى ورىنداۋعا دايىن ەكەنىن كورسەتتى, – دەدى باس شتاب باستىعى – قارۋلى كۇشتەرى قۇرلىق اسكەرلەرى باس قولباسشىسىنىڭ ءبىرىنشى ورىنباسارى گەنەرال-مايور مەرەكە كوشەكباەۆ.
وقۋ-جاتتىعۋعا بارلىعى 3 مىڭنان اسا اسكەري قىزمەتشى جانە 800-دەن اسا قارۋ-جاراق پەن اسكەري تەحنيكا جۇمىلدىرىلدى. وقۋ-جاتتىعۋدىڭ دىتتەگەن ماقساتتارىنا قول جەتكىزىلدى. جەكە قۇرام دايىندىق دەڭگەيىنىڭ جوعارى ەكەنىن كورسەتتى.
