باسقوسۋدا مەملەكەتتىك كەڭەسشى V دۇنيەجۇزىلىك كوشپەلىلەر ويىندارىنا قاتىسقانى ءۇشىن تۇركيادان كەلگەن مارتەبەلى مەيمانعا العىس ايتىپ, دۇنيەجۇزىلىك ەتنوسپورت كونفەدەراتسياسىنىڭ بۇل جارىستى ۇيىمداستىرۋعا جانە تابىستى وتكىزۋگە ايرىقشا ۇلەس قوسقانىن اتاپ ءوتتى. سونىمەن قاتار 89 ەلدىڭ 3000-عا جۋىق سپورتشىسى قاتىسقان مۇنداي اۋقىمدى ءىس-شارانى وتكىزۋ ۇلتتىق سپورت تۇرلەرىن دامىتۋعا جانە دارىپتەۋگە مۇمكىندىك بەرەتىنىن ايتتى.
ءوز كەزەگىندە ءبىلال ەردوعان V دۇنيەجۇزىلىك كوشپەلىلەر ويىندارىن جوعارى دەڭگەيدە ۇيىمداستىرعانى ءۇشىن قازاقستان تاراپىنا جانە مەملەكەت باسشىسى قاسىم-جومارت توقاەۆقا ريزاشىلىعىن ءبىلدىردى. سونداي-اق كونفەدەراتسيا پرەزيدەنتى بۇل شارا قاتىسۋشى مەملەكەتتەر, سونىڭ ىشىندە قازاقستان مەن تۇركيا اراسىنداعى مادەني قارىم-قاتىناستاردى ودان ءارى نىعايتۋعا ىقپال ەتەتىنىن تىلگە تيەك ەتتى.
كەزدەسۋ سوڭىندا ەرلان قارين مەن ءبىلال ەردوعان دۇنيەجۇزىلىك كوشپەلىلەر ويىندارى ۇلتتىق سپورت تۇرلەرىنىڭ ءورىسىن كەڭەيتىپ قانا قويماي, ەلدەرىمىزدىڭ تاريحي مۇراسىن ساقتاپ, مادەني بايلانىستاردى دامىتاتىن الاڭعا اينالىپ كەلە جاتقانىن اتاپ ءوتتى.
