فوتو: سۋ رەسۋرستارى جانە يرريگاتسيا مينيسترلىگى
جاڭاداريا كانالى – سىرداريا وزەنىنىڭ سول جاعالاۋىندا ورنالاسقان. قىزىلوردا وبلىسىنىڭ ەگىستىك جەرلەرىن, كوكونىس-باقشا داقىلدارىن, تابيعي جايىلىمدارىن, جەم-ءشوپ القاپتارىن سۋارۋعا ارنالعان. ۇزىندىعى 555,4 شاقىرىم, ونىڭ 535,6 شاقىرىمى تابيعي سۋ ارناسى ارقىلى وتەدى.
ەرتىس-قاراعاندى – ۇزىندىعى 458 شاقىرىم. ونىڭ 272 شاقىرىمى پاۆلودار وبلىسى ارقىلى, 186 شاقىرىمى قاراعاندى وبلىسىنىڭ اۋماعىنان وتەدى. كانالدىڭ نەگىزگى قۇرىلىستارى 22 سورعى ستانتسياسىنىڭ كومەگىمەن سۋ 418 مەترگە, 14 سۋ قويماسى مەن 34 كانالعا كوتەرىلەدى. ءبىر سورعى ستانتسياسى سەكۋندىنا 18 تەكشە مەتر نەمەسە تاۋلىگىنە 1,5 ملن تەكشە مەتر سۋ وتكىزە الادى.
ارىس-تۇركىستان – ۇزىندىعى شامامەن 196 شاقىرىم. «قاراسپان» سۋ قويماسىنان «بوگەن» سۋ قويماسىنا دەيىنگى ارىس كانالىنىڭ ۇزىندىعى – 51 شاقىرىم. «بوگەن» سۋ قويماسىنان باستالاتىن تۇركىستان كانالىنىڭ ۇزىندىعى شامامەن 145 شاقىرىم.
د.قوناەۆ اتىنداعى ۇلكەن الماتى كانالى ىلە وزەنىنىڭ باسسەينىندە ورنالاسقان. كانال سۋى ەگىس القابىن سۋارۋ, ءىرى ونەركاسىپتىك, شاعىن شارۋاشىلىق جانە رەكرەاتسيالىق قاجەتتىلىكتەر ءۇشىن پايدالانىلادى. ۇزىندىعى 168 شاقىرىم. كانال وبلىستىڭ ەڭبەكشىقازاق, تالعار, قاراساي اۋداندارى ارقىلى ءوتىپ, الماتى قالاسىنا جەتەدى.
قىزىلقۇم كانالى – ۇزىندىعى 116,3 شاقىرىم. شاردارا سۋ قويماسىنان باستاۋ الىپ, تۇركىستان وبلىسىنىڭ سولتۇستىك ايماعىنا سۋ جەتكىزەدى. كانال 74,3 مىڭ گەكتاردان استام ەگىس القابىن سۋارۋعا, سونداي-اق شاردارا سۋ قويماسىنىڭ تولىپ كەتۋ قاۋپى تونگەن كەزدە تاسقىن سۋىن وتكىزۋ ءۇشىن پايدالانىلادى.
