سونىڭ ىشىندە قازاقتىڭ جانىنا جاقىن سپورتتىڭ ءبىرى – ساداق اتۋ سايىسى. بۇل شىن مانىندە قازاق ءۇشىن تەك سپورت ەمەس, ول – ونەر, سالاماتتى ءومىر سالتى جانە اسا كيەلى سايمان. الەمدە توعىزىنشى ورىن الاتىن اۋماعىمىزدى ءبىز وسى ساداق پەن نايزانىڭ ارقاسىندا قورعاپ قالدىق.
«ارعىماق» ات-سپورتتىق ساۋىقتىرۋ كەشەنىندە ءداستۇرلى ساداق اتۋدان ءۇشىنشى جارىس كۇنى سپورتشىلار 30 مەتر قاشىقتىقتان جامبى اتۋدان ءوزارا كىم مىقتىنى انىقتادى. بۇل جارىسقا جالپى سانى 120 ساداقشى قاتىستى. ءبىزدىڭ ەل اتىنان جانىبەك قۇلمىرزاەۆ پەن باقبەرگەن ءسالىموۆ, ماقسات ابدىكەرىموۆ پەن قانات قاسىمحان جانە ەربول تاپەنوۆ جارىس جولىنا شىعىپ, نامىستى قولدان بەرمەۋگە تىرىستى. ايتا كەتسەك, ەربول تاپەنوۆ كەشەگى جارىستا كۇمىس مەدال ەنشىلەگەن بولاتىن.
تۇسكە دەيىن وتكەن ىرىكتەۋ جارىسىندا جانىبەك قۇلمىرزاەۆ پەن باقبەرگەن ءسالىموۆ سىننان سۇرىنبەي ءوتىپ, فينالدىق كەزدەسۋلەرگە شىققان بولاتىن. سول كەزدە ءبىز باقبەرگەن سالىموۆكە جولىعىپ, شەشۋشى سىن الدىنداعى كوڭىل كۇيى مەن پىكىرىن بىلدىك. ونىڭ ايتۋىنشا, وسى سپورت تۇرىمەن 3 جىلدان بەرى اينالىسىپ كەلەدى ەكەن. ول بۇگىنگىدەي سايىستى ۇيىمداستىرىپ, ەلدىڭ مەرەيىن تاسىتىپ وتىرعان پرەزيدەنتىمىزگە, باسقا دا جاۋاپتى تۇلعالارعا ءوزىنىڭ شىنايى العىسىن ءبىلدىردى. ءبىز وعان الداعى سىننان سۇرىنبەي ءوتىپ, كەلەسى جولى التىن مەدال تاعىنىپ تۇرىپ سۇحبات بەرۋدى ءناسىپ ەتسىن دەپ تىلەكتەستىك بىلدىردىك.
دەگەنمەن, جارىستىڭ اتى – جارىس. دۇنيەجۇزىلىك كوشپەلىلەر ويىندارىنا وسال سپورتشى كەلمەيدى. ءداستۇرلى ساداق اتۋدان ناعىز تارتىستى سايىستار تۇستەن كەيىن باستالدى. ويتكەنى ول كەزدە جارىس جولىندا كىل مىقتىلار قالعان ەدى.
30 مەتر جەردە ءىلۋلى تۇرعان جامبىنى قاعىپ ءتۇسىرۋ – قيىننىڭ قيىنى. ونىڭ ۇستىنە بۇل كۇنى اۋا رايى دا جەلدى بولىپ, جامبىنى ءارى-بەرى شايقايدى. بۇل جولى سپورتشىلارعا تەك قارسىلاستارىمەن عانا ەمەس, استانانىڭ ادۋىندى جەلىمەن دە ارپالىسۋعا تۋرا كەلدى.
تارتىسقا تولى سايىس ناتيجەسىندە ەرلەر اراسىندا باس جۇلدەنى رۋمىنيا ەلىنىڭ وكىلى الين ميحاي تۋدوران ەنشىلەدى. جۇلدەلى ەكىنشى ورىن رەسەي ەلىنەن كەلگەن گافۋر راحمانگۋلوۆقا بۇيىردى.
ال ۇزدىك ۇشتىكتى قاتارىنان ەكى قازاق سپورتشىسى جانىبەك قۇلمىرزاەۆ پەن باقبەرگەن ءسالىموۆ تۇيىندەدى. ءۇشتىڭ ءوزى – كۇش! قازاق ەلىنە كەزەكتى ەكى بىردەي قولانى سىيلاعان سپورتشىلارىمىزعا العىستان باسقا ايتارىمىز جوق.
ءدال وسى كۇنى ايەلدەر دە «جامبى» نىساناسى بويىنشا 30 مەتر قاشىقتىقتان ءداستۇرلى ساداق اتۋ سىنىندا ءوزارا كىل مىقتىنى انىقتاعان بولاتىن. قاتىسۋشىلار قاتارىنا كوز سالساڭ, كوشپەلىلەردىڭ ۇرپاقتارىن دا, كوشپەلى ەمەس ەلدەن كەلگەن سايىپقىرانداردى دا كەزدەستىرەسىڭ. مۇحيتتىڭ ارعى بەتىنەن كەلگەن مەكسيكالىقتاردان باستاپ, ىقىلىم زاماندا ءبىزدىڭ ولكەدەن ەۋروپانىڭ ورتاسىنا قونىس اۋدارعان ماجار حالقى وكىلدەرىنە دەيىن بار. جالپى, سانى ساداق ونەرىن بەس ساۋساعىنداي مەڭگەرگەن 60 ارۋ ءوزارا سىنعا ءتۇستى. سونىڭ ىشىندە ەلىمىز اتىنان ايكوركەم باتيحان, فاريزا سابىرحان, اجار تولەۋحانوۆا, دينارا جاقسىلىقوۆا دا ءوز ونەرىن كورسەتتى.
وكىنىشكە قاراي, ءبىزدىڭ سايىپقىران قىزدارىمىز جۇلدەلى ورىننان كورىنە المادى. التىن مەدالدى تۇركيا ەلىنەن كەلگەن دەميرباگ ايسەگۇل يەلەنسە, كۇمىس مەدال ماجارستاندىق نۋنينە دوموكوسقا بۇيىردى. ال قولا جۇلدەنى يندونەزيالىق سۋري رەنو مەن رەسەيلىك اننا الەكسەەۆا جەڭىپ الدى.
ايتا كەتسەك, بۇعان دەيىن «پۋتا» نىساناسى بويىنشا ايەلدەر اراسىندا قازاقستاندىق ايكوركەم باتيحان قولا جۇلدەگە يە بولعان ەدى. ال ەرلەر اراسىندا قاسىمحان قانات قولا مەدال يەلەنسە, جانىبەك قۇلمىرزاەۆ التىن مەدال الدى. «قالقان» نىساناسى بويىنشا وتكەن جارىستا قاسىمحان قانات قولا جۇلدە السا, ەربول تاپەنوۆ كۇمىس جۇلدە يەلەندى.
