سۋ تاسقىنىنان قۇلسارى قالاسى ەڭ قاتتى زارداپ شەكتى. 17 داۋىس بەرۋ ۋچاسكەسىنىڭ ۇشەۋى (№100, 237, 238) سۋ باسقان اۋماقتا ورنالاسقان ەدى. مۇنىڭ ەكەۋى تولىعىمەن قالپىنا كەلتىرىلدى, ۇشىنشىسىندە جوندەۋ جۇمىسى جالعاسىپ جاتىر. سوندىقتان اۋماقتىق كوميسسيا ۋچاسكەنى باسقا قولايلى عيماراتقا كوشىرۋ تۋرالى شەشىم قابىلدادى. بۇل ۋچاسكەلەردىڭ بارلىعى تەكسەرىلدى. داۋىس بەرۋ كۇنىنە وراي قالاداعى بارلىق 17 ۋچاسكە دايىن بولادى.
ساپار اياسىندا اتىراۋ جانە قۇلسارى قالالارىندا اۋماقتىق رەفەرەندۋم كوميسسيالارى مۇشەلەرىنىڭ, جەرگىلىكتى اتقارۋشى جانە وكىلدى ورگاندار وكىلدەرىنىڭ, پوليتسيا, حالىقتى الەۋمەتتىك قورعاۋ دەپارتامەنتى باسشىلارىنىڭ, پروكۋراتۋرا ورگاندارىنىڭ, باق وكىلدەرىنىڭ قاتىسۋىمەن سەمينار-كەڭەستەر وتكىزىلدى. سول جيىندار بارىسىندا رەفەرەندۋمعا دايىندىق تۋرالى اقپارات تىڭدالدى.
بۇل رەتتە ورك باسشىسى بارلىق دەڭگەيدەگى كوميسسيالاردىڭ قىزمەتى قولدانىستاعى زاڭنامانى قاتاڭ ساقتاۋعا, سايلاۋ ۇدەرىسىنىڭ اشىقتىعى مەن ايقىندىعىن قامتاماسىز ەتۋگە نەگىزدەلۋگە ءتيىس ەكەنىن ەرەكشە اتاپ ءوتتى. بۇعان قوسا ول «رەسپۋبليكالىق رەفەرەندۋم تۋرالى» كونستيتۋتسيالىق زاڭعا ەنگىزىلگەن وزگەرىستەر مەن تولىقتىرۋلاردى ءتۇسىندىردى. ۇلتتىق جانە حالىقارالىق بايقاۋشىلاردىڭ, شەتەلدىك باق وكىلدەرىنىڭ قۇقىقتارى مەن مىندەتتەرى, بۇقارالىق اقپارات قۇرالدارىنىڭ رەفەرەندۋمدى ازىرلەۋ مەن وتكىزۋ بارىسىن جاريالاۋ ءتارتىبى, سونداي-اق قوعامدىق پىكىرگە ساۋال سالۋ جۇرگىزۋدىڭ نەگىزگى اسپەكتىلەرى سياقتى تۇزەتۋلەرگە ەگجەي-تەگجەي توقتالدى.
سەمينارعا قاتىسۋشىلاردىڭ ەرەكشە نازارى ازاماتتاردى اقپاراتتاندىرۋ ماسەلەلەرىنە ارنالدى. جەرگىلىكتى اتقارۋشى ورگانداردىڭ وكىلدەرى وسى باعىتتا اتقارىلعان جۇمىس تۋرالى جان-جاقتى باياندادى. وبلىستا «109» بىرىڭعاي Call-ورتالىعى ىسكە قوسىلدى, وندا ازاماتتار رەسپۋبليكالىق رەفەرەندۋم تۋرالى بارلىق قاجەتتى اقپارات پەن كەڭەستى الا الادى. مىسالى, وسى Call-ورتالىققا حابارلاسىپ, رەفەرەندۋمعا قاتىسۋعا قۇقىعى بار ازاماتتار تىزىمىندە ءوزىڭىزدى تەكسەرۋگە, سونداي-اق ءوز ۋچاسكەڭىزدىڭ ءنومىرى مەن مەكەنجايىن ناقتىلاۋعا بولادى. «2GIS» قوسىمشاسىندا وڭىردەگى رەفەرەندۋمنىڭ بارلىق 274 ۋچاسكەسىنىڭ ناقتى ورنالاسقان مەكەنجايلارى قوسىلدى. ادام ەڭ كوپ جينالاتىن جەرلەرىندە 130 اقپاراتتىق باننەر جانە 13 LED-ەكران ورنالاسقان. الەۋمەتتىك جەلىلەردە دە ءتيىستى اقپاراتتىق جۇمىس جۇرگىزىلەدى, تەلەگرامم-بوت ىسكە قوسىلدى, ونىڭ كومەگىمەن تۇرعىندار سايلاۋشىلار تىزىمىندە وزدەرىن تەكسەرە الادى.
ورك باسشىسى كوميسسيالاردى ءۇي ارالاۋ, سايلاۋشىلارعا جەكە شاقىرۋ قاعازدارىن تاپسىرۋ قاجەتتىلىگىنە باعىتتاي وتىرىپ, الداعى رەسپۋبليكالىق رەفەرەندۋم تۋرالى ازاماتتاردى جۇيەلى جانە ۋاقتىلى حاباردار ەتۋدىڭ ماڭىزىن اتاپ ءوتتى. ول مۇگەدەكتىگى بار ازاماتتاردىڭ سايلاۋ قۇقىقتارىن قامتاماسىز ەتۋگە ەرەكشە نازار اۋداردى.
جەرگىلىكتى جەرلەردە وقىتۋ ساپاسىن باقىلاۋ ماقساتىندا اۋماقتىق كوميسسيا مۇشەلەرىنىڭ رەفەرەندۋم تۋرالى زاڭنامانى قانشالىقتى بىلەتىنى تەستىلەۋ ارقىلى تەكسەرىلدى. سونىڭ ناتيجەلەرىنە سايكەس ن.ءابدىروۆ سايلاۋ ۇدەرىسىن ۇيىمداستىرۋشىلاردى وقىتۋ جونىندەگى جۇمىستى كۇشەيتۋدى تاپسىرىپ, كوميسسيالاردىڭ بارلىق مۇشەسىن قامتۋعا ءتيىس ەكەنىن ايتتى. بۇل رەتتە ناۋقاندى اقپاراتتىق سۇيەمەلدەۋ, قوعامدىق بىرلەستىك وكىلدەرىن اككرەديتتەۋ, رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرىن ناقتىلاۋ, داۋىستاردى ساناۋ جانە رەفەرەندۋم قورىتىندىلارىن شىعارۋ سياقتى ماسەلەلەرگە ەرەكشە نازار اۋدارۋ قاجەت. سودان كەيىن ورك باسشىسى اتىراۋ وبلىستىق اۋماقتىق رەفەرەندۋم كوميسسياسىنىڭ جۇمىسىمەن تانىستى.
ن.ءابدىروۆ جىلىوي اۋدانىنىڭ جاستارىمەن كەزدەسۋ وتكىزىپ, جاستارعا 2022 جىلعى كونستيتۋتسيالىق رەفورما مازمۇنىنداعى ەلدىڭ جاڭارتىلعان سايلاۋ جۇيەسىنىڭ ەرەكشەلىكتەرى, رەسپۋبليكالىق رەفەرەندۋم تۋرالى زاڭناماداعى جاڭالىقتار, سايلاۋ سالاسىنداعى وزەكتى ترەندتەر مەن حالىقارالىق تاجىريبە تۋرالى ايتىپ, باسقا ەلدەردەگى سايلاۋلار مەن رەفەرەندۋمداردى حالىقارالىق بايقاۋعا قاتىسۋدان العان اسەرىمەن ءبولىستى.
جاستار ءوز پىكىرىن ءبىلدىرىپ, قىزىقتىرعان سۇراقتارىن قويدى. «كەڭ جىلىوي» گازەتىنىڭ جاس ءجۋرناليسى ەرناز احمەتكارىموۆ سايلاۋشىلاردىڭ بەلسەندىلىگىنە اسەر ەتەتىن نەگىزگى فاكتور رەتىندە اۋىل اكىمدەرىن سايلاۋ تۋرالى حالىقتىڭ حاباردارلىعىن ارتتىرۋ تاقىرىبىن قوزعادى. كەزدەسۋ سوڭىندا جاستار ەلەكتورالدىق سالانىڭ وزەكتى ماسەلەلەرى بويىنشا ءداستۇرلى ونلاين-ساۋالناماعا قاتىستى.
ساپارعا ورك مۇشەسى شاۆحات وتەمىسوۆ پەن اپپاراتتىڭ جاۋاپتى قىزمەتكەرلەرى قاتىستى. كەلەسى كەزدەسۋلەر باتىس قازاقستان وبلىسىندا وتەدى.
