بىلىكتى عالىمدار باس قوسقان جيىندا ەلىمىزدەگى كولىك ينفراقۇرىلىمىن جاڭعىرتۋعا باعىتتالعان ماسەلەلەر جان-جاقتى تالقىلاندى. سونىمەن قاتار قاتىسۋشىلارعا جول قۇرىلىسىندا ونەركاسىپتىك قاتتى مينەرالدى قالدىقتاردى (ققق) پايدالانۋ تەحنولوگياسى تانىستىرىلدى.
فورۋم بارىسىندا «كازدوريننوۆاتسيا» جشس ديرەكتورى رۋسلان اسماتۋلاەۆ جاڭا قۇرىلىس ماتەريالدارىن جاساۋعا تمق پايدالانۋدى كوزدەيتىن يننوۆاتسيالىق شەشىمدى ۇسىندى. بۇل قۇرىلىستىڭ ەكونوميكالىق تيىمدىلىگىن ارتتىرىپ قانا قويماي, قالدىقتاردىڭ جينالۋىنا بايلانىستى ەكولوگيالىق ماسەلەلەردى دە وڭ شەشەدى.
سونداي-اق جول بەرىكتىگىن ەداۋىر ارتتىراتىن, اسىرەسە كۇردەلى گەولوگيالىق جاعدايلاردا, جول جابىندارىنىڭ بەرىكتىگىن قامتاماسىز ەتەتىن توپىراقتى رەاكتيۆتى ەرىتىندىمەن توسەۋ تەحنولوگياسى دا تاقىرىپ ارقاۋىنا اينالدى.
جيىندا بيزنەسپەن تىعىز ىنتىماقتاستىق ماڭىزىنا ايرىقشا نازار اۋدارىلدى. فورۋمعا قاتىسۋشىلاردىڭ باستى ماقساتى – عىلىمعا ارنالعان تەحنولوگيالاردى دامىتۋ عانا ەمەس, سونىمەن بىرگە بيزنەسكە نەگىزگى سالالىق ماسەلەلەردى شەشۋگە ءتيىمدى كومەكتەسەتىن شەشىمدەردى جاساۋ. بۇل جۇمىستار بيزنەس سۇرانىسىن قاناعاتتاندىرىپ, تۇراقتى دا جوعارى تەحنولوگيالىق ينفراقۇرىلىمدى قۇرۋعا ىقپال ەتەتىن وتاندىق جول ءونىمىن ازىرلەۋگە باعىتتالۋعا ءتيىس ەكەنى باسا ايتىلدى.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىمدارى اسەل جەكسەمباەۆا مەن مارات قونقانوۆ ماتەريالدار قۇرامىن ءدال تاڭداۋ, جاڭا جول تەحنولوگياسىن سىناۋعا نانوقۇرىلىمدار دەڭگەيىندە تەرەڭ زەرتتەۋلەر جۇرگىزۋگە قاتىستى ءوز يدەيالارىن ۇسىندى. ولار وندىرىستىك قالدىقتار نەگىزىندەگى «جاسىل» ماتەريالداردى بەلسەندى پايدالانۋدى ۇسىنىپ, جاقسى ناتيجەگە جەتۋگە بيزنەسپەن بىرلەسىپ جۇمىس ىستەۋگە شاقىردى. سونداي-اق جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ عىلىمي ينفراقۇرىلىمىن نىعايتۋعا ماقساتتى گرانت ءبولۋ تۋرالى دا ايتىلدى. بۇل باستاپقى كەزەڭدە تەرەڭ زەرتتەۋ جۇرگىزۋگە, جاڭا ماتەريالداردىڭ ساپاسىن ارتتىرۋعا مۇمكىندىك بەرمەك.
سونىمەن قاتار جيىندا كادر ماسەلەسى دە ءسوز بولدى. «قازدورعزي» اق قۇزىرەتتەردى دامىتۋ ورتالىعىنىڭ ديرەكتورى گۇلجامال وماروۆا كادرلىق داعدارىستىڭ سەبەپتەرى مەن ونىڭ جاعىمسىز سالدارىنا توقتالدى. شەشىم رەتىندە جول قۇرىلىسىنا يننوۆاتسيالاردى تابىستى ەنگىزۋگە ءبىلىمدى ماماندار دايارلاۋ جۇيەسىن جاقسارتۋ, بىلىكتىلىكتى ارتتىرۋ جانە كاسىبي قۇزىرەتتىلىكتى دامىتۋ ۇسىنىلدى.
قىسقاسى, فورۋم ماڭىزدى وزگەرىستەردىڭ كاتاليزاتورى بولدى. عىلىم مەن بيزنەس ەل ينفراقۇرىلىمىن جاڭارتىپ, قاجەتتى ينۆەستيتسيالاردى تارتاتىن جاڭا وتاندىق ونىمدەر مەن شەشىمدەردى جاساۋ ءۇشىن بىرىگىپ وتىر. ۇلتتىق عىلىم اكادەمياسىنىڭ قولداۋىمەن وتكەن مازمۇندى ءىس-شارا ەلىمىزدەگى جول سالاسىن بولاشاقتا دامىتۋدا ماڭىزدى ءرول اتقارادى.
