قاراعاندى وبلىسىنىڭ ونەر ۇجىمى دا كونتسەرتتىك باعدارلاماسىن ۇسىندى. اتاپ ايتساق, ەسترادا جۇلدىزدارى, قازاقستاننىڭ ەڭبەك سىڭىرگەن قايراتكەرلەرى ماقپال ءجۇنىسوۆا مەن ءجاميلا باسپاقوۆا قۇلاق قۇرىشىن قاندىرىپ ءان شىرقاسا, ق.بايجانوۆ اتىنداعى كونتسەرتتىك بىرلەستىگىنىڭ تاتتىمبەت اتىنداعى اكادەميالىق قازاق حالىق اسپاپتار وركەسترى سۇيەمەلدەپ وتىردى. سونداي-اق س.سەيفۋللين اتىنداعى اكادەميالىق قازاق دراما تەاترىنىڭ ارتىستەرى ارنايى قويىلىم كورسەتتى.
«اققۋ» فولكلورلىق حورەوگرافيالىق ءانسامبلى مەن جەكە ورىنداۋشى سوليستەرى دە باعدارلامادان تىس قالعان جوق.
«Tarlan» ەتنوتوبىنىڭ «جۇمىر قىلىش» كۇيىنە ديزاينەرلەر گۇلنۇر جارىلحانوۆا مەن ءمۇسلام جۇماعاليەۆتىڭ ەتنوكوستيۋمدەرىن «Art line» مودەلدىك اگەنتتىگى حالىققا كورسەتتى. بۇدان بولەك اقتوعاي اۋدانىنان «توقىراۋىن تولقىندارى» حالىقتىق ءان-بي ءانسامبلى, «جارقىن» حالىقتىق حورەوگرافيالىق ءانسامبلى مەن «شولپان» ۇلگىلى حورەوگرافيالىق ءانسامبلى دە ساحناعا شىقتى.
ەتنواۋىلداعى مادەني دۋماننىڭ كوركىن ايتىس اقىندارىنىڭ شاپپا-شاپ ءسوز قاعىسى قىزدىرا ءتۇستى. ورتادا ايتىس ونەرىنە جاڭادان قادام باسىپ كەلە جاتقان جاستار مەن ەلگە بەلگىلى اعا بۋىن ايتىسكەر اقىندار ونەر كورسەتتى. قاراعاندى وبلىسىن وسى ءوڭىردىڭ تۋماسى, «التىن دومبىرا» يەگەرى ماقسات احانوۆ پەن ەركەعالي بەكبولات شارىقتاتا تانىستىردى.
سونداي-اق ەتنواۋىلدا اپتا بويى كۇن سايىن ەلىمىزدىڭ ەڭ ۇزدىك شەبەر-قولونەرشىلەرىنىڭ كورمە-جارمەڭكەسى, ولاردىڭ جۇمىستارى مەن شەبەرلىك ساعاتتارى كورسەتىلىپ جاتىر. كورمەگە قاراعاندى وبلىسىنىڭ ون قولونەر شەبەرى قاتىسىپ, بىلعارىدان, كيىزدەن, اعاشتان جاسالعان بۇيىمدار, قىش جانە زەرگەرلىك بۇيىمداردى ۇسىندى.
ەتنواۋىلدا قاراعاندى وبلىسىنان ءۇش كيىز ءۇي ورناتىلعان. 12 قاناتتى كيىز ۇيدە وبلىستىق ولكەتانۋ مۇراجايىنىڭ ەكسپوناتتارى, ءبىرىنشى سەگىز قاناتتى كيىز ۇيدە س.سەيفۋللين اتىنداعى تەاتر ۇجىمى ادەت-عۇرىپتار مەن سالت-داستۇرلەردى بەينەلەپ كورسەتسە, ەكىنشى سەگىز قاناتتى كيىز ۇيدە قاراعاندى وبلىسىنىڭ ەكونوميكا, مادەنيەت جانە سپورتتىڭ ءتۇرلى سالالارىنداعى جەتىستىكتەرى ۇسىنىلدى. مادەني باعدارلاماعا وبلىستان جالپى سانى 200-گە جۋىق ونەرپاز قاتىسقان.
«بىرلىك كەرۋەنى» تەاترلاندىرىلعان شەرۋگە س.سەيفۋللين اتىنداعى تەاتردىڭ اكتەرلەرى, حورەوگرافيالىق انسامبلدەر, ات سپورتشىلارى, بۇركىتشىلەر, اڭشىلار تازىسىمەن قاتىستى.
