جىگىتتەردىڭ قارقىنى جاقسى

دەمەك كوكپاردىڭ تاريحى تەرەڭ. سوندىقتان دا بۇل سايىس ءتۇرى كوشپەلىلەر ويىنىنا ەنىپ وتىر. بۇل جولعى ءدۇبىرلى جارىسقا 9 ەلدىڭ كومانداسى قاتىسىپ, قازىرگى تاڭدا «قازانات» اتشابارىندا ىرىكتەۋ ويىندارىن وتكىزىپ جاتىر.

9 قىركۇيەك كۇنى الاڭعا شىق­قان قوس كوماندا قازاقستان جانە وزبەكستان قۇراماسى بولدى. اتالعان ويىندا قازاقستان قۇراماسىنىڭ كاپيتانى قۇر­مانبەك تۇرعانبەك ويىننىڭ ەكىنشى مينۋتىندا ەسەپ اشتى. وسىلاي سايىس تىزگىنى ءبىزدىڭ جىگىتتەردىڭ قولىنا كوشتى. ەكى تايمعا سوزىلعان دودا كەزىندە قۇرمانبەك تۇرعانبەك ءتورت, ابىلايحان نىشانبەكوۆ پەن ەرنار جارىلقاسىن ارقايسىسى ءۇش-ۇشتەن, ەرنات ءمالىمباي مەن ۇلان بايتورەەۆ ءاربىرى ەكى-ەكىدەن, باقىتجان ءازىمباي, ارمان جامالبەك, ادىلەت مامىت ۇشەۋى ءبىر-ءبىر دۇركىن سالىم سالىپ, ناتيجەسىندە ەلىمىزدىڭ قۇراماسى 16:0 ەسەبىمەن ايقىن جەڭىسكە جەتتى.

كەلەسى ويىن رەسەي جانە قىتاي قۇراماسى اراسىندا ءوتتى. شىن­دىعىندا ەكەۋى دە ورتانقول كوكپارشىلاردان قۇرالعان ەكەن. ويىننىڭ التىنشى مينۋتىندا رەسەيلىك قالىبەك سولتوباەۆ ەسەپ اشىپ, العاشقى تايم 2:0 ەسەبىمەن رەسەيلىك شاباندوزدار پايداسىنا شەشىلدى. ەكىنشى تايمدا قىتايلىق قانداستارىمىز دا ءبىر سالىمعا قول جەتكىزدى. ەسەپ 4:1. رەسەي قۇراماسى – جەڭىمپاز.

ىرىكتەۋ كەزەڭدى ءىرى جەڭىسپەن باستاعان قۇرامانىڭ ءبىرى – ايىرقالپاقتى اعايىندار. ولار موڭعوليا ەلىنىڭ اتىنان ونەر كورسەتۋگە كەلگەن بايولكەلىك قا­زاقتاردى 16:0 ەسەبىمەن تىزە بۇك­تىردى. وسى ناتيجەگە قاراپ-اق قىرعىز اعايىنداردىڭ قان­شالىقتى دايىندىقپەن كەلگەنىن اڭعارۋعا بولاتىن سياقتى.

ءتورتىنشى جۇپ بولىپ الاڭعا شىققان قارت قۇرلىقتان كەلگەن قوس كوماندا ماجارستان مەن تۇركيا كوكپارشىلارى تىم سىلبىر وينادى. العاشقى تايمدا ەسەپ اشىلمادى. ەكىنشى اينالىمدا 7-نومىردە ونەر كورسەتكەن تۇركيالىق شاباندوز Başaran Çağlar ەسەپ اشتى. ناتيجە 1:0. ءبىر قىزىعى, بۇل كورسەتكىش ويىن سوڭىنا دەيىن وزگەرگەن جوق.

جارىستىڭ كەلەسى كۇنى العاش­قى سايىس قازاقستان مەن اقش كوكپارشىلارى اراسىندا باس­تالدى. ويىننىڭ ءبىرىنشى مينۋتىندا ەلىمىزدىڭ كوكپارشىسى ابىلايحان نىشانبەكوۆ سالىم سالىپ ۇلگەردى. قانشا ايتقانمەن قوناقجاي حالىقپىز ەمەس پە, ءبىزدىڭ ۇلاندار مۇحيت اسىپ كەلگەن كوۆبويلارعا ءىلتيپات كورسەتىپ, سالىم سالۋعا مۇمكىندىك تۋعىزدى. ءسويتىپ, العاشقى تايم 5:3 ەسەبىمەن اياقتالدى.

ءبىر كۇن بۇرىن كوك ءبورۇ ويىنىندا قىرعىزداردان 18:0 ەسەبىمەن ۇتىلعان اقش جىگىتتەرىنە بۇل ءبىر جابىرقاعان كوڭىلىنە قۇت قونعانداي اسەر بەردى. بىراق ەكىنشى تايمدا بەل شەشىپ ويناعان باس باپكەر نۇرداۋلەت مومىنوۆتىڭ جىگىتتەرى 12:4 ەسەبىمەن ويىنعا نۇكتە قويدى.

ەكىنشى بولىپ الاڭعا شىققان قىرعىزستان جانە تۇركيا قۇرا­ماسى بولدى. كوكپار مامان­دا­رىنىڭ سوزىنە سەنسەك, تۇركيا­لىقتار العاشقى تايمدا جانىن سالىپ وينادى. ءتىپتى باسقانى قىرىنا ىل­مەيتىن قىرعىزداردىڭ شەڭبەرىنە تۇ­رىك شاباندوزى دەميركول يسا ءبىر رەت سالىم سالدى. بىراق سوڭعى نا­تيجە 15:1 ەسە­بىمەن قىرعىز باۋىر­لاردىڭ ۇلەسىندە.