سابەڭ سىرى مەن عابەڭ عيبراتى

جۋىردا الماتىداعى ءسابيت مۇقانوۆ پەن عابيت مۇسىرەپوۆتىڭ ادەبي-مەموريالدىق مۋزەي كەشەنى­نىڭ ديرەكتورى, حالىقارالىق «الاش» ادەبي سىيلىعىنىڭ لاۋرەا­تى, اقىن ادىلعازى قايىربەكوۆتىڭ «تۇلعالار تاعىلىمى: ءسابيت پەن عابيت» اتتى كىتابى جارىق كوردى. كىتاپقا قازاق ادەبيەتىنىڭ قوس كلاس­سيگى, ومىردە دە, ونەردە دە جۇپ­تارى جازىلماعان جازۋ­شىلاردىڭ عۇمى­رى مەن شىعار­ماشىلىعى, وسكەن ور­تاسى مەن قىزمەت كەزەڭدەرى, ادەبي مۇرا­لارى مەن مۋزەيدەگى جادىگەرلەر, قوعام­­دىق-الەۋمەتتىك, ازاماتتىق-قالام­­گەرلىك تۇلعالارى جان-جاقتى ارقاۋ بولعان. «شاكارىم قاجىنىڭ سابەڭە حاتى», «ميحايل شولوحوۆ پەن ءسابيت مۇقانوۆ», «زار-مۇڭىمدى ۇققان زاتاەۆيچ», «كەنەكەڭ مەن سابەڭ», «عابەڭنىڭ تاعدىرلى ءتورت حاتى», «عاجايىپ عابەڭ», «شوقان شىق­قان شىڭ», «جامبىل-جىردىڭ جاناشىرلارى», «باتىرلار جىرى باۋىرلاستىرعان س.مۇقانوۆ پەن م. عابدۋللين», «بوتاگوز – گۇلفايرۋس», «ب.مايلين مەن ع.مۇسىرەپوۆ: شى­عار­ماشىلىق بايلانىستار», ت.ب. عىلىمي-زەرتتەۋ ماقالالار, ەسسەلەر, وي-تولعامدار, سىر-سۇحباتتار نەگىزگى تاقىرىپ – سابەڭ سىرى مەن عابەڭ عيبراتىنا ءۇيىرىپ الىپ كەلىپ وتىرادى. اۆتور ادەبيەتتىڭ قوس الىبىنىڭ مۋزەيلەرىندەگى قاراپايىم ءجادى­گەرلەردەن, سار­عايعان حاتتار مەن كونە فوتوسۋرەتتەردەن كول-كوسىر اڭگىمە ءوربىتىپ اكەتەدى. عاسىرعا جۋىق عۇمىر كەشكەن, ەل اناسى اتانعان ءماريام مۇقانكەلىنىنىڭ سۇيىكتى جارى تۋرالى, ەل مەن جەر, ادەبيەت پەن الەۋمەت تۋرالى اعىتقان سىرلارى دا قىمبات. كىتاپتىڭ سوڭىن­دا ءاربىر ماقالاعا عىلىمي ءتۇسى­نىك­تەمە بەرىلگەن. اكادەميك-جازۋ­شى­لاردىڭ تۇلعالارىن جاڭا قىر­لارى­نان تانۋدا, قالامگەرلىك قارىم­دارىن وي سۇزگىسىنەن وتكەرۋدە, وزىق ونەگەلەرىن كەلەر ۇرپاققا جەتكىزۋدە بۇل ەڭبەكتىڭ قوسار ۇلەسى قوماقتى. نازگۇل التاەۆا.