فوتو: سۋرەتتى تۇسىرگەن: ءالي عالىم
م.اۋەزوۆ اتىنداعى وڭتۇستىك قازاقستان ۋنيۆەرسيتەتى – ەلىمىزدەگى جەتەكشى تەحنيكالىق جوعارى وقۋ ورىنداردىڭ ءبىرى. ونىڭ تۇلەكتەرى ەڭبەك نارىعىندا كەڭ سۇرانىسقا يە. ولار – ەلەكتر ەنەرگەتيكا, ماشينا جاساۋ, فيزيكا, حيميا جانە وزگە دە سالا ماماندارى. اەس سالۋدى قولداۋ جونىندەگى حالىقتىق شتاب مۇشەلەرى وڭىردەگى ستۋدەنتتەرىمەن جانە جاس بەلسەندىلەرمەن كەزدەستى.
ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆ جاستار ۇنەمى جاڭا ۇردىستەردىڭ باسى-قاسىندا جۇرەتىنىن جانە مەملەكەت دامۋىنىڭ باستى قوزعاۋشى كۇشى سانالاتىنىن اتاپ ءوتتى.
«جاستاردىڭ قوعامداعى ءرولى ەرەكشە. ەلىمىزدەگى ەڭ ماڭىزدى شەشىمدەر جاستارمەن اقىلداسىپ قابىلدانىپ جاتىر. بۇل – پرەزيدەنتىمىزدىڭ نەگىزگى ۇستانىمى. سىزدەر, بولاشاق ينجەنەرلەر, الداعى ۋاقىتتا تاۋەلسىز قازاقستان ەكونوميكاسىنىڭ دامۋىنا ءوز ۇلەستەرىڭىزدى قوساسىزدار, جاڭا ءوندىرىس ورىندارىن قولدانىسقا ەنگىزەسىزدەر جانە يننوۆاتسيالىق تەحنولوگيالاردى دامىتاسىزدار. سىزدەر الداعى رەفەرەندۋمدا سانالى تاڭداۋ جاساي الۋ ءۇشىن بۇگىن ءبىز وزدەرىڭىزبەن اتوم ەلەكتر ستانتسياسىنىڭ قۇرىلىسىن تالقىلاۋعا كەلدىك», دەدى ەرلان قوشانوۆ.
بۇدان سوڭ اەس سالۋدى قولداۋ جونىندەگى حالىقتىق شتاب مۇشەلەرى زيالى قاۋىم وكىلدەرىمەن كەزدەستى. ءىس-شارا بارىسىندا اتوم ەنەرگەتيكاسىنا قاتىستى بارلىق ماسەلە بويىنشا جۇرتشىلىقتى كەڭىنەن حاباردار ەتۋدىڭ ماڭىزى جانە حالىق اراسىندا ەرەكشە بەدەلگە يە ادامدار رەتىندە مادەنيەت قايراتكەرلەرىنىڭ بۇل ىستەگى ءرولى تالقىلاندى.
وسى كۇنى شتاب مۇشەلەرى «تاسساي» يندۋستريالىق ايماعىنا بارىپ, كاسىپكەرلەرمەن جانە ەڭبەك ۇجىمدارىمەن كەزدەستى. ولار اتوم ەنەرگەتيكاسىنىڭ مۇمكىندىگى, جاڭا ءوندىرىس ورىندارىن دامىتۋ پەرسپەكتيۆالارى جانە لايىقتى ەڭبەك جاعدايىن جاساۋ جونىندە اڭگىمەلەستى.
