قارجىلىق مونيتورينگ اگەنتتىگى استانا قالاسىنىڭ «مادەنيەت باسقارماسى» مم-ءنىڭ بۇرىنعى باسشىسى مەن مەردىگەر ۇيىم وكىلدەرىنە قاتىستى اسا ءىرى كولەمدە بيۋدجەت قاراجاتىن جىمقىرۋ فاكتىسى بويىنشا سوتقا دەيىنگى تەرگەۋ امالدارىن جۇرگىزىپ جاتىر.
«2016 جىلى استانا كۇنى مەرەكەسىنە وراي سالىنعان «كۇن» («ەسىل وزەنىندەگى جارىق-يلليۋميناتسيالىق جانە وت شوۋى») سۋبۇرقاعىنىڭ قۇرىلىسى كەزىندە مەملەكەتتىك ساتىپ الۋ راسىمدەرى جۇرگىزىلمەي, تىكەلەي كەلىسىمشارتتار جاسالعان», دەلىنگەن حابارلامادا.
سۋبۇرقاق جوبالىق قۇجاتتاماسىز جانە مەملەكەتتىك ساراپتامادان وتپەي سالىنعان.
سونداي-اق قۇرىلىس بارىسىندا تەحنيكالىق سيپاتتامالارعا سايكەس كەلمەيتىن ساپاسىز ماتەريالدار قولدانىلعان.
ناتيجەسىندە اتالعان نىسان 2017 جىلدان باستاپ جۇمىس ىستەمەي, قازىرگى تاڭدا اپاتتى جاعدايدا تۇر.
ۇرلانعان قاراجاتتىڭ كولەمى 1 ملرد تەڭگەدەن اسىپ وتىر.
«استانا قالاسىنىڭ «مادەنيەت باسقارماسى» مم-ءنىڭ بۇرىنعى باسشىسى ۇستالىپ, ۋاقىتشا ۇستاۋ يزولياتورىنا قامالدى. تەرگەۋ اياسىندا ونىڭ 3 كوممەرتسيالىق نىسانى, 2 اۆتوتۇراق ورنى جانە استانا قالاسىندا پرەميۋم ساناتتاعى پاتەرى بار ەكەندىگى انىقتالدى», دەپ حابارلادى قما.
اتالعان ءىس بويىنشا كۇدىكتىلەردىڭ مۇلكىنە جالپى سوماسى 572 ميلليون تەڭگەدەن استام سوماعا شەكتەۋ قويىلدى.
قر قپك 201-بابىنا سايكەس, سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى.
قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.
