وقيعاعا بايلانىستى ماڭعىستاۋ وبلىستىق اكىمدىك جانىنان جەدەل شتاب قۇرىلىپ, قارقىندى جۇمىسقا كىرىستى. دەنساۋلىق ساقتاۋ باسقارماسى تاراپىنان شاقىرتۋلارعا دەرەۋ قىزمەت كورسەتۋگە وبلىستىق جەدەل جانە شۇعىل مەديتسينالىق كومەك ستانساسىنىڭ 12 نەگىزگى جانە 4 قوسىمشا بريگاداسى جۇمىس ىستەسە, مۇنايلى ورتالىق اۋداندىق اۋرۋحاناسىنىڭ شاقىرۋلارعا قىزمەت كورسەتۋدىڭ 4 ساناتتى 4 بريگاداسى جانە اقتاۋ قالاسىنىڭ 4 ساناتتى 7 بريگاداسى جۇمىلدىرىلدى. سونداي-اق وبلىستاعى ەمحانالاردىڭ پسيحولوگتەر توبى اتا-انالار مەن بالالارعا قاجەتتى كومەك كورسەتۋگە كىرىستى.
اۋرۋحاناعا ارنايى بارعان ءوڭىر باسشىسى نۇرداۋلەت قيلىباي وبلىستىق اۋرۋحانادا جاتقان وقۋشىلاردىڭ جاي-كۇيىن كورىپ, اتا-انالارىنا بالالارىنىڭ تەزىرەك ساۋىعىپ كەتۋىن تىلەدى جانە سالا, اۋرۋحانا باسشىلارىنا ۋلانعان بالالارعا قاجەتتى بارلىق كومەكتى كورسەتۋدى, اۋرۋحاناداعى جۇمىس كەستەسىن كۇشەيتۋدى تاپسىردى. جەكسەنبى كۇنى 300-گە جۋىق بالا ءوز ۇيىندە دارىگەر قاداعالاۋىندا قالدىرىلىپ, 67 بالا اۋرۋحاناعا جاتقىزىلدى, ال جاعدايى اۋىرلاۋ ەكى بالا جانساقتاۋ بولىمىنە ورنالاستىرىلدى.
– اۋرۋحانادا ءتيىستى ەم-دوم كورسەتىلىپ جاتىر. ءدارى-دارمەك پەن توسەكتىك ورىندار جەتكىلىكتى. ءدال قازىر ەڭ باستىسى – وقۋشىلاردىڭ دەنساۋلىعى. ناۋقاستاردىڭ تەز جازىلىپ كەتۋىنە بارلىق جاعدايدى جاساۋىمىز قاجەت. كەيىن وسى جاعدايعا بايلانىستى ءتيىستى شارالار مەن شەشىمدەر قابىلدايمىز, – دەدى نۇرداۋلەت قيلىباي.
اتالعان وقيعا بويىنشا مۇنايلى اۋداندىق پب-ءنىڭ سدتبت-نە قر قك-ءنىڭ 304-بابى 1-بولىگىمەن №244750031000356 قىلمىستىق ءىس تىركەلىپ, سوتقا دەيىنگى تەرگەپ-تەكسەرۋ جۇمىسى باستالدى. سونداي-اق جاعدايدىڭ سەبەبىن انىقتاۋ ماقساتىندا ماڭعىستاۋ وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتى دە تەكسەرىس جۇرگىزۋگە كىرىستى.
جەكسەنبى كۇنى كەشكە ماڭعىستاۋ وبلىستىق دەنساۋلىق ساقتاۋ باسقارماسى باسشىسى بەكبولات ءىزباساروۆ دەنساۋلىعى جاقسارعان بىرقاتار بالانىڭ ۇيىنە قايتارىلىپ جاتقانىن حابارلادى. باسقارما باسشىسىنىڭ ايتۋىنشا, مۇنايلى اۋدانىندا مەكتەپ اسحاناسىندا تاماقتان ۋلانعان بالالاردىڭ جاعدايى جاقسارىپ كەلەدى. جالپى, احۋال تۇراقتانعان. وبلىستىق اۋرۋحانانىڭ جانساقتاۋ بولىمىندە جاتقان ەكى بالانىڭ بەتى بەرى قاراعان. بۇگىن-ەرتەڭ جالپى پالاتاعا اۋىستىرىلۋى مۇمكىن.
– دەر كەزىندە باستالعان ەمنىڭ سەپتىگىمەن بالالاردىڭ ومىرىنە قاۋىپ جوق. بارلىق قاجەتتى مەديتسينالىق كومەك كورسەتىلىپ جاتىر. توسەكتىك ورىن مەن ءدارى-دارمەك قورى تولىقتاي جەتكىلىكتى, – دەدى ب.ءىزباساروۆ.
قۇزىرلى ورىنداردىڭ قاتىسۋىمەن وقيعانىڭ سەبەبى انىقتالىپ, ناقتى مالىمەت حابارلانادى.
ماڭعىستاۋ وبلىسى
