ءبىر قىزىعى, «TaspaLab» ستۋدياسىنىڭ تابالدىرىعىن اتتاعان ادام ۋاقىت ماشيناسىنا ەنگەندەي اسەر الادى. ويتكەنى مۇندا ەڭ الدىمەن سۋرەتكە تۇسۋگە ارنالعان ءتۇرلى تاقىرىپتىق بۇرىشتار كوز تارتادى. مىسالى, قوعالى كول جاعاسىنداعى تابيعات ءمۇيىسى مە, ءداستۇرلى جاساۋلى قازاقتىڭ كيىز ءۇيى مە, بالالارعا ارنالعان ەرتەگى بۇرىش, جاستارعا ارنالعان اسپالى اتكەنشەك پە – ءبارى بار. ال مىنا بولمە كۇنى كەشەگى كەڭەستىك ۇلگىدەگى ءۇيدىڭ كورىنىسى سياقتى: اق-قارا تەلەديدار, قابىرعادا ىلىنگەن فوتوپورترەتتەر, اسپالى ساعات – بىرەۋگە بالالىق شاعىنا ساعىنىشىن وياتسا, ەندى ءبىر ادامعا ستاندارتتى سۇپ-سۇر كەڭەس تىرلىگىن ەسكە ءتۇسىرىپ, ءتۇرلى وي سالىپ تۇر. جالپى, عيماراتتىڭ باس-اياعىندا وسىنداي 13 ءتۇرلى فوتوزونا بار ەكەن.
يدەيا اۆتورلارى «جارقىن ءساتىڭدى تاسپالا!» دەگەن ءسوزدى جاڭا ستۋديانىڭ ۇرانى ەتىپ الىپتى. بۇل جەردە جەلىگە ارنالعان پودكاست نەمەسە ريلس تۇسىرۋگە لايىق الاڭدار دا جاساقتالعان.
– وسىنداي ستۋديا اشۋ تۋرالى يدەيانى العاش ايتقان جانە ديزاين جاعىنان كومەكتەسكەن – بالا كەزدەن بەرى بىرگە كەلە جاتقان قۇربىم اراي ماراتقىزىنا كوپ العىس ايتامىن. سوڭعى ءۇش اي ىشىندە اقتوبەدەن ورالعا جەتى مارتە كەلدى. شىنىمدى ايتسام, وسى عيماراتتىڭ قۇرىلىس جۇمىسى, جوندەۋى تەز اياقتالعانىمەن, ءتۇرلى تاقىرىپقا ساندەۋ, ارلەۋ كوپ ۋاقىت الدى. قازىرگى قوعام سۇرانىسىن بارىنشا تولىق قامتۋعا تىرىستىق, – دەيدى گۇلناز الىمگەرەي.
جاڭا ستۋديادا دىبىس جازۋ ستۋدياسى, جاستارعا ارنالعان ويىن بولمەسى, بي ستۋدياسى, كاسىبي مامانداردىڭ ءتۇرلى تاقىرىپقا شەبەرلىك ساباعىن وتكىزەتىن زاماناۋي اۋديتوريا دا بار ەكەن. ەڭ عاجابى – ءدال وسى اۋديتورياعا اقىن, اعارتۋشى شاڭگەرەي بوكەەۆتىڭ ەسىمى بەرىلگەن.
– قازاق توپىراعىنداعى العاشقى فوتونى 1841 جىلى وردادا جاڭگىر مەكتەبى اشىلعان كەزدە حاننىڭ ارنايى شاقىرۋىمەن كەلگەن فوتوگراف تۇسىرگەن ەكەن. سودان ارادا 60 جىل وتكەندە وسى جاڭگىر حاننىڭ نەمەرەسى شاڭگەرەي بوكەەۆ ءوزى فوتوونەرگە بەت قويادى. ويتكەنى 1901 جىلى بوكەي ورداسىنىڭ قۇرىلعانىنا 100 جىل تولۋىنا وراي پاتشا شاڭگەرەيگە فوتواپپارات سىيلاعان ەدى. بۇگىندە قازاقتان شىققان تۇڭعىش فوتوگراف – شاڭگەرەي بوكەەۆ دەۋىمىزدىڭ ءمانىسى وسى, – دەيدى ورالدىق ولكەتانۋشى ايبولات قۇرىمباەۆ.
تەلەجۋرناليستيكا سالاسىندا 20 جىلدان اسا تاجىريبەسى بار گۇلناز الىمگەرەي وسى جەردە جاستاردى تىلشىلىكتىڭ قىر-سىرىنا باۋليتىن جەكە مەدياورتالىعىن دا اشاتىن ويى بار ەكەنىن ايتادى. ياعني مۇندا كەلۋشى جاستار اكتەرلىك شەبەرلىك, كامەرا الدىندا ءوزىن-ءوزى ۇستاۋ, ت.ب. كاسىبي مامان كەڭەسىن الماق.
باتىس قازاقستان وبلىسى
