اتىراۋداعى «تەڭىز» كەنىشىندە جۇمىسشى قايتىس بولدى

اتىراۋ. 26 قاڭتار. اتىراۋ وبلىسىنداعى «تەڭىز» كەنىشىندە مەردىگەر كومپانيانىڭ ەكى جۇمىسشىسى اۋىرىپ, بىرەۋىنىڭ قايتىس بولعانى بەلگىلى بولدى. بۇل تۋرالى egemen.kz ءتىلشىسى حابارلادى. وسى وقىس وقيعا 26 قاڭتارعا قاراعان تاڭدا تىركەلگەن. «تەڭىز» كەنىشىندەگى مەردىگەر كومپانيانىڭ ءبىرى – «يمستالكوم» سەرىكتەستىگىندە قىزمەت ەتەتىن 1973 جىلى تۋعان ر. ەسىمدى شىعىس قازاقستان وبلىسىنىڭ ازاماتى جۇقپالى دەرتتەن كلينيكادا تاڭعى ساعات 05:15-تە كوز جۇمعان. الايدا, جىلىوي اۋداندىق تۇتىنۋشىلار قۇقىعىن قورعاۋ باسقارماسىنا جەرگىلىكتى ۋاقىتپەن ساعات 09:15 مينۋتتا «تەڭىزشەۆرويل» سەرىكتەستىگىنىڭ ۆاحتالىق قالاشىعىنداعى كلينيكاعا ەكى سىرقاتتىڭ جەتكىزىلگەنى تۋرالى مالىمەت ءتۇسىپتى. كوز جۇمعان ازاماتپەن تىكەلەي قارىم-قاتىناستا بولعان ت. ەسىمدى 1991 جىلى تۋعان شىعىس قازاقستان وبلىسىنىڭ تۋماسىنا ورتالىق اۋرۋحانانىڭ جۇقپالى اۋرۋلار بولىمشەسىندە ەم جاسالىپ, كەيىن وبلىس ورتالىعىنا جىبەرىلدى. دارىگەرلەر ازىرگە «مەنينگيت. مەنينگوكوككتسەميا» دياگنوزىمەن اۋىرعان دەپ بولجام جاساپ وتىر. سىرقاتتىڭ اۋرۋ بەلگىلەرى مىناداي: قىزۋ 37 گرادۋسقا دەيىن كوتەرىلگەن, السىزدىك, دەنەسىندە جانە اياعىندا گەمموراگاتسيالىق بورتپەنىڭ پايدا بولۋى. ونىمەن قارىم-قاتىناستا بولعان 3 ادام «تەڭىزشەۆرويل» سەرىكتەستىگىنىڭ كلينيكاسىندا وقشاۋلانىپ, دارىگەرلەردىڭ قاتاڭ باقىلاۋىنا الىندى. ولاردان ازىرگە اۋرۋ بەلگىلەرى انىقتالعان جوق. «قازىر وبلىستىق دەڭگەيدە قۇرامىندا ينفەكتسيونيست, ەپيدەميولوگ-دارىگەر, ۆيرۋسولوگيا جانە باكتەرياولوگيا زەرتحاناسىنىڭ مەڭگەرۋشىلەرىنەن جاساقتالعان ارنايى بريگادا قۇرىلىپ, جىلىوي اۋدانىنا ىسساپارعا جىبەرىلدى. قاجەتتى شارالار اتقارىلىپ, ەپيدەمياعا قارسى جۇمىستار جاسالۋدا. بارلىق جاعداي ءجىتى باقىلاۋدا», دەپ مالىمدەدى اتىراۋ وبلىسى اكىمدىگىنىڭ ءباسپاسوز قىزمەتى. جولداسبەك شوپەعۇل. دەرەك: اتىراۋ وبلىسى اكىمدىگىنىڭ ءباسپاسوز قىزمەتى. Cۋرەت: egemen.kz.