فوتو: مادەنيەت جانە اقپارات مينيسترلىگى
مەملەكەت باسشىسى قاسىم-جومارت توقاەۆ وتباسى ينستيتۋتىنىڭ ىرگەسىن بەرىك ەتۋدىڭ ماڭىزىن ءاردايىم ەرەكشە ەكشەيدى. پرەزيدەنتىمىز وتكەن جىلى مەرەكە قارساڭىندا «وتباسى ينستيتۋتى ەڭبەكقورلىق, بىلىمپازدىق, تىلەكتەستىك سىندى «ادال ازاماتقا» ءتان قاسيەتتەردى قوعامدا جان-جاقتى دارىپتەۋ ارقىلى ۇلتتىڭ جاڭا ساپاسىن قالىپتاستىرۋعا ولشەۋسىز ۇلەس قوساتىنىن اتاپ وتكەن ەدى.
ەلىمىزدە شاڭىراقتىڭ شىرايىن كەلتىرىپ, ەڭبەكتە ەرەن اتانىپ, قوعامدا قىراعىلىقتىڭ جارقىن ۇلگىسىن كورسەتىپ جۇرگەن ونەگەلى وتباسىلار جەتەرلىك. ولاردىڭ ۇل-قىزىن ۇلتتىڭ وركەندەۋى جولىندا جۇمىلا جۇك كوتەرۋگە باۋلىپ جۇرگەن جاناشىرلىعى مەن تاتۋ-ءتاتتى تىرلىگىن كوپكە تانىتۋ, ۇزدىك ۇلگى رەتىندە كورسەتە ءبىلۋ ماڭىزدى. وسىنداي قاعيدانى العا تارتقان «مەرەيلى وتباسى» ۇلتتىق بايقاۋىنىڭ بيىلعى جەڭىمپازدارى 6 قىركۇيەك كۇنى استانادا باس قوستى. وسى جىلى 11 رەت وتكىزىلگەن بايقاۋدا ءار وڭىردەن سۋىرىلىپ شىققان 20 وتباسى لاۋرەات اتاندى. مەرەكەلىك ءىس-شارادا ونەگەلى وتباسىلار ەتەنە تانىستىرىلىپ, قىزىل كىلەم بويىمەن ءجۇرىپ ءوتتى. «مەرەيلى وتباسىلاردى» ماراپاتتاۋ كەشىندە سەنات توراعاسى ماۋلەن اشىمباەۆ مەملەكەت باسشىسى قاسىم-جومارت كەمەل ۇلى توقاەۆتىڭ ىستىق ىقىلاسپەن جولداعان سالەمىن جەتكىزىپ, قۇتتىقتاۋ حاتىن وقىپ بەردى.
- «مەرەيلى وتباسى» بايقاۋى – ۇلتتىق قۇندىلىقتاردى جاڭعىرتۋعا جول اشاتىن, وزىندىك ءداستۇرى بار بىرەگەي جوبا. حالقىمىزدىڭ اسىل قاسيەتتەرىن وسكەلەڭ ۇرپاقتىڭ بويىنا ءسىڭىرۋ – بارىمىزگە ورتاق مىندەت. وسى ورايدا ءار وتباسى ايرىقشا ءرول اتقارادى. ەلىمىزدە ادال ەڭبەگىمەن كوپكە ۇلگى بولىپ جۇرگەن ونەگەلى اۋلەتتەر از ەمەس. بۇگىنگى سالتاناتتى كەش – سونىڭ ايقىن دالەلى. بۇل بايقاۋداعى ءاربىر وتباسىنىڭ جەڭىسىن بىرلىگى جاراسقان جۇرتىمىزدىڭ مەرەيلى جەتىستىگى دەپ باعالاۋعا بولادى, - دەلىنگەن پرەزيدەنتتىڭ قۇتتىقتاۋ حاتىندا.
ءوز سوزىندە ماۋلەن اشىمباەۆ پرەزيدەنت ۇلتتىق قۇرىلتايدىڭ وتىرىسىندا جاريالاعان «ادال ادام – ادال ەڭبەك – ادال تابىس» تۇجىرىمى ەل يدەولوگياسىنىڭ ىرگەتاسى رەتىندە ايرىقشا ماڭىزعا يە ەكەنىن تىلگە تيەك ەتتى. وسىدان سوڭ ءسوز العان مادەنيەت جانە اقپارات ءمينيسترى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا دا جەڭىمپازداردى قۇتتىقتاپ, زور قۇرمەتىن جەتكىزدى.
لاۋرەات اتانعاندار اراسىندا مەگاپوليستەگى مىڭداعان وتباسى اراسىنان العا شىققان شىمكەنتتىك سىدىقوۆتار وتباسى دا بار.
قارا شاڭىراقتىڭ يەلەرى انارباي سىدىقوۆ اقساقال مەن اقجاۋلىقتى ايسارا سىدىقوۆا ۋنيۆەرسيتەت قابىرعاسىندا تانىسىپ, سول شاقتان بەرى قول ۇستاسىپ كەلە جاتقانىنا - 48 جىل. انارباي سىدىقوۆ ەڭبەككە ەرتە ارالاسىپ اۋىل شارۋاشىلىعى سالاسىندا قىزمەت ەتسە, ايسارا اجە بەينەتتى عۇمىرىندا ۇزاق جىلدار كىتاپحاناشى بولعان. بۇگىندە 8 پەرزەنتتى جەتىلدىرىپ, ولاردان 26 نەمەرە, 8 شوبەرە ءسۇيىپ وتىرعان, تامىرلى اۋليەت. سىدىقوۆتار جاڭا عاسىردا دا ۇلتتىق سالت-داستۇردەن اجىراماعان. ۇل-قىز تاربيلەۋدەگى ۇستانىمى سالتپەن ساباقتاسىپ, داستۇرمەن استاسىپ جاتىر. شىمكەنتتەن شىققان ۇزدىك وتباسى حالىقارالىق بايگەلەردە قازاق حالقىنىڭ باي قۇندىلىقتارىن تورگە شىعارىپ كەلەدى.
«ۇلتتىق قۇندىلىق ساقتالماسا ەل, جۇرت بولمايدى. بىزگە بۇل وسيەتتى انا-انامىز ءسىڭىردى. وسى ۇستانىمدى ابىرويمەن جالعاي الساق, وتباسىمىز ءۇشىن مەرەيلى مارتەبە. ءبىز دە ءوز كەزەگىمىزدە ءىزىمىزدى باسقان ۇرپاقتارىمىزعا ادالدىق پەن قازاقىلىقتى ناسيحاتتاۋدان تالمايمىز», دەيدى انارباي سىدىقوۆ.
اتا-اجەسىنىڭ بالعىن شاقتان قۇلاققا قۇيعان ونەگەلى وسيەتىمەن بويجەتكەن اۋليەتتىڭ تۇڭعىش نەمەرەسى جامال انارباي – كيىم ديزاينەرى. بۇگىنگى مارتەبەلى ساتتە دە وتباسى مۇشەلەرىن اسپەتتەپ تۇرعان ۇلتتىق وبرازدار جامالدىڭ قولىنان شىققان. ىسمەر ارۋ سىدىقوۆتار تەك مەرەكە نە ناۋرىزدا عانا ەمەس ۇلتتىق كيىمدى كۇندەلىكتى كيۋدى ادەتكە اينالدىرعانىن ايتتى. 20 جاسار ارۋ ەتنو ەرەكشەلىكتەردى مەڭگەرۋگە بالا كەزدەن دەن قويعان.
«وتباسىمىز مادەنيەت ءمانىن ۇقتىرۋعا ءاردايىم ىقىلاستى. ونىڭ ۇستىنە اجەم دە, انام دا – كىتاپحاناشى. انام مۋزەيدە دە قىزمەت اتقارعان. ۇلتتىق تاريحىمىزدى كىشكەنتاي كەزىمىزدەن انامنىڭ قاسىندا ءجۇرىپ ساناعا سىڭىردىك. سوندا وقىپ-توقىعان كىتاپتار مەن كورگەن-بىلگەن جادىگەرلەر مەنىڭ شىعارماشىلىعىمنىڭ باستاۋى», دەدى جامال انارباي.
بيىلعى لاۋرەاتتار اراسىندا ەڭ جاس وتباسى سولتۇستىك قازاقستان وبلىسى اقجار اۋدانى, تالشىق اۋىلىنان كەلگەن – حاسەنوۆتەر.
وتاعاسى نۇرقاسىم مەن وتاناسى اقمارال حاسەنوۆتەردىڭ بيىل شاڭىراق كوتەرگەنىنە – 11 جىل. نۇرقاسىم وراز ۇلى مادەنيەت سالاسىندا تەر توكسە, اقمارال قۋاتقىزى مەكتەپتە پەداگوگ-پسيحولوگ قىزمەتىن اتقارادى. وبلىستاعى وتباسىلار اراسىندا وق بويى وزا شىققان حاسەنوۆتەر 4 قىز تاربيەلەپ وتىر. قىزىعى بۇعان دەيىن نۇرقاسىم حاسەنوۆتىڭ اتا-اناسى دا «مەرەيلى وتباسى» بايقاۋىندا باق سىناعان ەكەن. قوعامدىق, قايىرىمدىلىق شارالاردىڭ ورتاسىنان تابىلاتىن وتباسى الەۋمەتتىك جەلىدە دە بەلسەندى.
«زامان تالابىنا ساي الەۋمەتتىك جەلى قولدانۋشىسىمىن. جەلىلەردە وتباسىلىق قۇندىلىقتاردى ناسيحاتتاۋعا كۇش سالامىن. ءبىز بۇل ءۇردىستى تانىمال بولۋ ماقساتىندا ەمەس, شاڭىراقتاعى بەرەكەلى تىنىس-تىرشىلىكتى ۇگىتتەۋ ماقساتىندا جۇرگىزەمىز. وبلىستاعى مادەني, سپورتتىق شارالاردىڭ باس-قاسىنان تابىلۋ ارقىلى دا ميسسيامىزدى جۇزەگە اسىرىپ كەلەمىز», دەدى نۇرقاسىم حاسەنوۆ.
جالىنداپ تۇرعان جاس وتباسىنىڭ جاراسىمدى ءومىر سۇرۋدەگى قاعيدالارىنا دا قۇلاق تۇردىك.
«ەر ادام قاي سالادا بولسىن جەتىستىككە ۇيدەگى بەرەكە ارقىلى قول جەتكىزەدى. ال شاڭىراقتىڭ ۇيتقىسى – ايەل. سوندىقتان جۇبايىمنىڭ مارتەبەسىن ءاردايىم بيىكتەتىپ, قۇرمەتتەپ وتىرامىن. ۇيدەگى جىلۋلىق, مەيىرىم قىزعالداق قىزدارىمنىڭ دا بويىنا دارىعانىن قالايمىن», دەدى نۇرقاسىم حاسەنوۆ.
«مەرەيلى وتباسى – 2024» بايقاۋىندا توپ جارعان 20 وتباسى ارنايى العىس حاتتارمەن ماراپاتتالىپ, 1 ميلليون تەڭگە سىياقىعا يە بولدى. مەيىرىم سالتانات قۇرعان وتباسى مەرەيلى بولارى ءسوزسىز.
