سۋدان ەنەرگيا وندىرەيىك دەسەك, ەلدە تاۋلار مەن ودان سارقىراعان بۇلاقتار, وزەندەر تىم از. نەگىزىنەن جازىق جەردە ورنالاسقان ەل بولعان سوڭ جاڭا ءارى «جاسىل ەنەرگيا» كوزىنە ۇمتىلامىز. بۇگىنگى كۇندە ول – اەس. ەنەرگيانىڭ بۇل ءتۇرى كومىر, گاز, گيدروەنەرگەتيكا, جەل جانە كۇن سياقتى باسقا ەنەرگيا كوزدەرىنە قاراعاندا دا بىرقاتار ارتىقشىلىققا يە.
ەڭ الدىمەن, اەس ەلەكتر ەنەرگياسىنىڭ تۇراقتى جانە قۋاتتى ءوندىرىسىن قامتاماسىز ەتەدى. ول جەلىنىڭ نەگىزگى جۇكتەمەسىن ءۇزىلىسسىز ساقتاي الادى. سونداي-اق تيىمدىلىگى كليماتتىق جاعدايلارعا بايلانبايدى. ناقتىراق ايتقاندا, جەل مەن كۇن سياقتى جاڭارتىلاتىن كوزدەردەن ايىرماشىلىعى, اەس تۇراقتى جانە سىرتقى فاكتورلارعا تاۋەلسىز جۇمىس ىستەيدى.
سونىمەن قاتار اتوم ەلەكتر ستانساسىندا كومىرقىشقىل گازى شىعارىندىلارىنىڭ مينيمالدى دەڭگەيى بار. بۇل ونىڭ ءداستۇرلى كومىر جانە گاز ستانسالارىمەن سالىستىرعاندا, ەكولوگيالىق تازا نۇسقا ەكەنىن كورسەتەدى.
تاعى ءبىر ماڭىزدى ارتىقشىلىعى – يادرولىق وتىننىڭ جوعارى ەنەرگيا سىيىمدىلىعى. ول كومىر نەمەسە گازبەن سالىستىرعاندا, شيكىزاتتىڭ از كولەمىندە ايتارلىقتاي كوپ ەلەكتر ەنەرگياسىن وندىرۋگە مۇمكىندىك بەرەدى. بۇل قازبا رەسۋرستارىنا تاۋەلدىلىكتى ازايتادى جانە ەنەرگيا ءوندىرۋدى ۇنەمدى ەتەدى.
اەس بەرىكتىگى جانە سەنىمدىلىگىمەن دە ەرەكشەلەنەدى. ونى پايدالانۋ ونداعان جىل بويى جالعاسۋى مۇمكىن. قازىرگى رەاكتورلاردى پايدالانۋ مەرزىمى 20-60 جىل دەپ سانالادى. بۇل 80 جىلدى بىلدىرەدى. ءىشىنارا جاڭعىرتۋمەن تاعى 20 جىلعا دەيىن ۇزارتۋعا بولادى. سوندا ءبىر اەس ەلدى ەنەرگيامەن 100 جىلعا دەيىن تاپجىلماي قامتاماسىز ەتەدى. بۇل ەنەرگيامەن جابدىقتاۋدىڭ ۇزاق مەرزىمدى تۇراقتىلىعىن قامتاماسىز ەتەدى.
بۇلاردان بولەك, اەس-ءتى ورنالاستىرۋ ءۇشىن كۇن نەمەسە جەل ەلەكتر ستانسالارىنا قاراعاندا ەداۋىر از اۋماق جەتكىلىكتى. بۇل قۋاتتى ەنەرگەتيكالىق نىسانداردى قۇرۋ كەزىندە جەر رەسۋرستارىن دۇرىس پايدالانۋدى وڭتايلاندىرادى.
تيمۋر جانتيكين,
«قازاقستان اتوم ەلەكتر ستانسالارى» جشس باس ديرەكتورى
