فوتو:كولىك مينيسترلىگى
كولىك مينيسترلىگىنىڭ مالىمەتىنشە, بۇل جۇيە جۇك كولىكتەرىنىڭ سالماعىن باقىلاۋعا, وزگە دە كولىكتەردىڭ كەدەرگىسىز ءجۇرۋى ءۇشىن نەعۇرلىم قولايلى جاعدايلار جاساۋعا مۇمكىندىك بەرەدى. اۆتوماتتاندىرىلعان جۇيە بيىلعى جىلدىڭ قىركۇيەك ايىنان باستاپ ىسكە قوسىلدى. اۆتوكولىكتىڭ شامادان تىس سالماعى انىقتالعان كەزدە جۇيە اۆتوماتتى تۇردە فوتوفيكساتسيا جاساپ, اقپارات كولىك دەرەكقورىنىڭ اقپاراتتىق-اناليتيكالىق جۇيەسىنە بەرىلەدى. بۇل كولىك كوميتەتىنە سالماق نورمالارىنان اسىپ كەتۋگە بايلانىستى قۇقىق بۇزۋشىلىقتار تۋرالى حابارلامالاردى جەدەل جىبەرۋگە مۇمكىندىك بەرەدى.
ايتا كەتەيىك, اۆتوماتتاندىرىلعان ولشەۋ جۇيەسى قالاعا نەگىزگى كىرەبەرىستەردە: پاۆلودار, قاراعاندى, قوستاناي, كوكشەتاۋ, قوسشى قالالارى, سونداي-اق قاراوتكەل جانە مالوتيموفەەۆكا كەنتتەرى تاراپىنان ورناتىلعان.
ەسكە سالا كەتەيىك, ايىپپۇلداردىڭ مولشەرى وسكە شاققانداعى سالماقتىڭ ارتۋ دارەجەسىنە بايلانىستى جانە كاسىپكەرلىك تۇرىنە بايلانىستى – شاعىن, ورتا نەمەسە ءىرى – 40 اەك-تەن (147 مىڭ 680 تەڭگە) 1000 اەك-كە (3 ملن 692 مىڭ تەڭگە) دەيىن وزگەرۋى مۇمكىن.
وسىلايشا, كولىك قۇرالدارىنىڭ رۇقسات ەتىلگەن ماسساسى تومەندە كەلتىرىلگەن نورمادان (توننامەن) اسپاۋى ءتيىس:
- ءۇش ءوستى (م3 ساناتىنداعى بۋىندى اۆتوبۋستاردى قوسپاعاندا) – 25 توننا;
- ءتورت ءوستى, ونىڭ ىشىندە ەكى باسقارىلاتىن ءوسى بار – 32 توننا;
- بەس ءوستى – 38 توننا - التى نەمەسە ودان دا كوپ وستەرى بار – 44 توننا.
«ساراپتاماعا سايكەس اۋىر جۇك كولىكتەرى (ساموسۆالدار) تاسىمالداۋ بارىسىندا قولدانىستاعى نورمادان 1,5-2 ەسە ارتىق جۇك تاسىمالدايدى. دەمەك, نورماعا سايكەس 25 توننا جۇك تاسىمالداۋعا رۇقسات بولسا, 35-40 توننا جۇك تيىلگەن فاكتىلەر تىركەلىپ وتىر. 2023 جىلدىن باسىنان كولىك مينيسترلىگى استانا اكىمشىلىگىمەن بىرلەسە ارنايى اۆتوماتتاندىرىلعان ولشەۋ جۇيەلەرىن ورناتۋ بويىنشا جۇمىس باستاپ كەتتى. ولار قالاعا كىرەبەرىس جولداردا 7 جەردەن ورناتىلعان. ەلوردا ماڭىنداعى 29 كارەردەن جۇك تاسىمالدايتىن 6300 اۋىر جۇك ساموسۆال كولىگى تىركەلىپ وتىر. بۇل رەتتەگى ءبىزدىڭ باستى ماقساتىمىز — بار جولداردى مەزگىلسىز بۇزىلۋىنا جول بەرمەۋ», دەدى كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ توراعاسى التاي ءالى.
بۇل جۇيە سىبايلاس جەمقورلىق تاۋەكەلدەرىن بارىنشا ازايتۋعا جانە ادامي فاكتوردى بولدىرماۋعا مۇمكىندىك بەرەدى. جىل سوڭىنا دەيىن بۇل جۇيەنى ەلىمىزدىڭ باسقا وڭىرلەرىندە ەنگىزۋ جوسپارلانعان.
