فوتو: ارمان مۋحاتوۆ
ستيپەنديالاردىڭ ۇشتەن ەكىسىنەن استامى جاراتىلىستانۋ-تەحنيكالىق پاندەر بويىنشا ءبولىندى. جەڭىلدىككە يە ساناتتار بويىنشا 22 ادام شەتەلدە ءبىلىم الادى.
جالپى 20 ادام – ماگيستراتۋرا, 6 ادام - دوكتورانتۋرا باعدارلامالارى بويىنشا ءبىلىم كوكجيەگىن كەڭەيتسە, 24 وتانداسىمىز الەمنىڭ جەتەكشى جوعارى وقۋ ورىندارى مەن وندىرىستىك ورتالىقتارىندا كاسىبي تاعىلىمدامادان وتەدى.
ۇمىتكەرلەر Harvard University, Imperial College London, University of Pennsylvania, University of Melbourne, Columbia University, Johns Hopkins University, University of Bristol سياقتى الەم بويىنشا الدىڭعى قاتارلى ۋنيۆەرسيتەتتەرگە ءتۇستى. ولار اقپاراتتىق تەحنولوگيالار مەن جۇيەلەر, جاساندى ينتەللەكت جانە كيبەرقاۋىپسىزدىك, كولىك تەحنولوگيالار جانە لوگيستيكا, قوعامدىق دەنساۋلىق ساقتاۋ, نەوناتولوگيا جانە حيرۋرگيا, ۇلكەن دەرەكتەردى تالداۋ, قۇرىلىس, گەولوگيا جانە تاۋ-كەن ءىسى, مەتاللۋرگيا, قارجى تەحنولوگياسى, ۋربانيستيكا جانە ماتەماتيكا سالاسى بويىنشا ءبىلىم-بىلىگىن جەتىلدىرەدى.
«حالىقارالىق باعدارلامالار ورتالىعى» اق باسقارما توراعاسى ءاليا وسپانوۆا ورتالىق الەمدىك ستاندارتتارعا سايكەس كەلەتىن مامانداردى دايارلاۋدىڭ جوعارى ساپاسىن قامتاماسىز ەتۋ ءۇشىن ۇمىتكەرلەردى كونكۋرستىق ىرىكتەۋگە ەرەكشە نازار اۋداراتىنىن ايتتى.
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جولداۋىندا عىلىمي تاعىلىمدامالار بويىنشا ساپالى ىرىكتەۋدى قامتاماسىز ەتۋ قاجەتتىگى ايتىلدى. كونكۋرستىق ىرىكتەۋ پروتسەسى قايتا قارالدى, ۇمىتكەرلەرگە قويىلاتىن تالاپتار كۇشەيتىلدى. حالىقارالىق باعدارلامالار ورتالىعى عالىمداردى قولداۋعا ارنالعان بولەك باسقارمانى قۇردى, ول جەڭىلدىك ساناتتارى بويىنشا الەمنىڭ جەتەكشى عىلىمي ورتالىقتارىنان بايلانىس ورناتۋعا جانە تەگىن شاقىرتۋلار الۋعا كومەكتەسەدى. بۇل شارالار عىلىم مەن زەرتتەۋلەردى قولداۋ جونىندەگى ستراتەگيالىق جوبا اياسىندا عالىمداردى قولداۋعا مۇمكىندىك بەرەدى», دەدى ول .
سونداي-اق, 33 وتانداسىمىز الەمنىڭ جەتەكشى عىلىمي-زەرتتەۋ ورتالىقتارىندا, اتاپ ايتقاندا University of Oxford, King’s College London, University of California, Davis, University of Illinois at Urbana-Champaign, University of Minnesota, Twin Cities, CNRS, University of Sussex, Technische Universitat Dresden سىندى جەتەكشى ۋنيۆەرسيتەتتەر مەن ۇيىمداردا ەكونوميكا ءۇشىن اسا ماڭىزدى باعىتتار بويىنشا عىلىمي تاعىلىمدامادان وتۋگە گرانت جەڭىپ الدى.
«بولاشاق» ستيپەندياسى يەگەرلەرىنىڭ ءتىزىمىن مىنا جەردەن كورۋگە بولادى. ال شەتەلدە عىلىمي تاعلىمدامادان وتۋگە مۇمكىندىك العانداردىڭ اتى-ءجونى مۇندا جاريالانعان.
