ءبىلىم سالاسىندا سىناق, نەشە ءتۇرلى سايىس, تەست كومپيۋتەر ارقىلى وتەدى, مەكتەپتەرگە مۇعالىمدەر كونكۋرس ارقىلى كىرەدى. دەگەنمەن, مۇعالىمدەر بۇل كەدەرگىلەردى دە اينالىپ وتەتىن جولدى تاۋىپ العان دەگەنگە سەنەسىز بە؟ بارلىق مۇعالىمدى كىنالاي المايمىز, ايتسە دە اۋىردىڭ ۇستىمەن, جەڭىلدىڭ استىمەن جۇرەتىن قۋلار بۇل سالادا دا ازايماي تۇر.
جاڭا وقۋ جىلى قارساڭىندا ماڭعىستاۋ وبلىسىندا 60 مۇعالىم جالعان ديپلوممەن جۇمىس ىستەگەندىگى انىقتالدى. ولار ءبىر ەمەس, بىرنەشە جىل بويى وقۋشىلارعا ساباق بەرىپ كەلگەن. قازىرگى تاڭدا جالعان قۇجات جاساتىپ, ايلىق الىپ كەلگەن 60 مۇعالىمنىڭ بارلىعى جۇمىستان قۋىلدى. جالعان قۇجاتتى «مۇعالىمدەرمەن» ەندى تەرگەۋ ورىندارى اينالىسىپ جاتىر, ولارعا ايلىققا تولەنگەن قاراجات مەملەكەت بيۋدجەتىنە قايتارىلاتىن بولادى.
– وبلىستاعى مۇعالىمدەردىڭ ديپلومىن انىقتاۋ ءۇشىن جوعارى وقۋ ورىندارى مەن تەحنيكالىق جانە كاسىپتىك ءبىلىم بەرۋ ۇيىمدارىنا سۇرانىس جىبەرىلدى. بۇل رەتتە ولاردىڭ جۇمىس ىستەگەن ۋاقىتىنداعى قارجىنى مەملەكەتتىك بيۋدجەتكە قايتارۋ تۋرالى سوت ورگاندارىنا شاعىم جولداندى. بۇل باعىتتاعى جۇمىستار جالعاسىپ جاتىر, – دەپ حابارلادى ماڭعىستاۋ وبلىسىنىڭ ءبىلىم باسقارماسى.
مۇعالىم مەن مەكتەپ – ءبىلىم مەن تاربيەنىڭ قاينارى. اقشا تابۋ ءۇشىن قىلمىس جاساي العان مۇعالىم وقۋشىعا قانداي ءبىلىم, قانداي تاربيە بەرە الادى؟ بۇل مۇعالىمدەردەن وقىپ كەتكەن وقۋشىلاردىڭ الا الماعان ءبىلىمىنىڭ ورنى تولار ما؟
بويىندا ءوز ىسىنە ماحاببات, ەل, ۇرپاق بولاشاعىنا دەگەن جاۋاپكەرشىلىك بولماسا, اقشا ءۇشىن جۇرگەندەر مۇعالىم دەگەن اتتان ساداعا. مۇعالىمدىككە تەك جالاقى ءۇشىن نەمەسە بولىنگەن گرانت ءۇشىن قىزىعاتىندارعا ۇرپاق تىزگىنىن ۇستاتۋ قيىن.
ماڭعىستاۋ وبلىسى
