«NKOK» كومپانياسىنىڭ قارجىلاندىرۋىمەن بىلتىر مامىر ايىندا قازىعى قاعىلعان مەكتەپتىڭ قۇرىلىسى بيىل جاڭا وقۋ جىلى قارساڭىندا تولىقتاي اياقتالىپ, پايدالانۋعا بەرىلدى. ءبىلىم كۇنىندە اۋىلدىڭ 62 وقۋشىسى جاڭا مەكتەپ تابالدىرىعىن اتتادى. ءبىلىم وشاعى 100 وقۋشىعا ارنالعان. وندا 11 وقۋ كابينەتى, 2 ينفورماتيكا, 1 لينگافون كابينەتى, اكت جانە سپورت زالى بار. ەكىقاباتتى مەكتەپ عيماراتىندا مۇمكىندىگى شەكتەۋلى جاندارعا ارنالعان مۇگەدەكتەر كوتەرگىشى ورناتىلعان. ءبىلىم ورداسىنىڭ اۋماعى زامانعا ساي اباتتاندىرىلىپ, سپورت الاڭى سالىنعان.
– بۇگىن بەكى اۋىلىنىڭ تۇرعىندارى كوپتەن كۇتكەن قۋانىشتى جاڭالىقپەن قاۋىشىپ وتىر. اۋىلىمىزدا پايدالانۋعا بەرىلگەن جاڭا مەكتەپ زامان تالابىنا ساي جابدىقتالعان. سىنىپ بولمەلەرىندە ساباق بەرۋگە قاجەتتى قۇرالداردىڭ ءبارى بار. ماسەلەن, قىز بالالارعا اس ءپىسىرىپ ۇيرەتەتىن ارنايى بولمە, ەر بالالارعا ارنالعان ەڭبەك كابينەتى, سپورتزال – ءبارى دە كوز تارتادى. سونداي-اق مەكتەپ اۋلاسى تولىقتاي اباتتاندىرىلعان. بىزگە وسىنداي زاماناۋي مەكتەپ سالىپ بەرگەن ماڭعىستاۋ وبلىسى مەن ماڭعىستاۋ اۋدانى اكىمدىگىنە, وبلىستىق ءبىلىم باسقارماسىنا جانە «NKOK» كومپانياسىنا اۋىل تۇرعىندارى مەن مەكتەپ ۇجىمى اتىنان العىسىمىز شەكسىز, دەيدى مەكتەپ باسشىسىنىڭ مىندەتىن اتقارۋشى ايجان مولداشەۆا.
بۇعان دەيىن باستاۋىش سىنىپ قانا وقىپ كەلگەن مەكتەپتە ەندى 1–9 سىنىپ وقۋشىلارى ءبىلىم الادى.
بيىل ماڭعىستاۋ وبلىسى بويىنشا اقتاۋ قالاسىنان – 10, جاڭاوزەن قالاسىنان – 2, مۇنايلى اۋدانىنان 2, بارلىعى 6 120 ورىندىق 14 جەكەمەنشىك مەكتەپ اشىلدى.
ال جاڭا وقۋ جىلىندا پايدالانۋعا بەرىلىپ, ءبىلىم كۇنى شاكىرتتەرىن قابىلدايدى دەپ ەسەپتەلگەنىمەن, ءتۇرلى ماسەلەلەرگە بايلانىستى اشىلۋى كەيىنگە قالدىرىلعان مەكتەپتەر دە جوق ەمەس. ء«بىلىم بەرۋ ينفراقۇرىلىمىن قولداۋ قورى» ارقىلى سالىنعان 4 800 ورىندىق 4 مەكتەپ, ياعني اقتاۋ قالاسىنىڭ 18-شاعىن اۋدانىندا 1 200 ورىنعا ارنالعان جالپى ءبىلىم بەرۋ مەكتەبى, اقتاۋ قالاسىنىڭ 19ا شاعىن اۋدانىندا 1 200 ورىنعا ارنالعان جالپى ءبىلىم بەرۋ مەكتەبى, مۇنايلى اۋدانى باسقۇدىق اۋىلدىق وكرۋگىنىڭ الاۋ تۇرعىن الابىندا 1 200 ورىندىق جالپى ءبىلىم بەرۋ مەكتەبى مەن وسى اۋدانداعى قىزىلتوبە اۋىلدىق وكرۋگىنىڭ قىزىلتوبە-2 تۇرعىن الابىندا 1 200 ورىنعا ارنالعان جالپى ءبىلىم بەرۋ مەكتەبى بالا قابىلداۋعا دايىن بولماي شىقتى. ءبىلىم باسقارماسى قىزمەتكەرلەرىنىڭ ايتۋىنشا, اتالعان مەكتەپتەردىڭ قۇجاتىنا بايلانىستى جۇمىستار اياقتالسا, قىركۇيەك ايىنىڭ ىشىندە بالالاردى قابىلدايدى.
سونداي-اق اقتاۋ قالاسىنا كوشىپ كەلۋشى تۇرعىنداردىڭ قاتارى ارتقان سايىن, وقۋشىلاردىڭ دا سانى كوبەيىپ وتىر. مىسالى, بيىلعى جاڭا وقۋ جىلىندا ماڭعىستاۋ وبلىسى بويىنشا 188 مىڭعا جۋىق وقۋشى مەكتەپكە ءبىلىم الۋعا كەلسە, سونىڭ ىشىندە 1-سىنىپقا 19 مىڭعا جۋىق بالا قابىلدانعان. ءبىلىم باسقارماسىنىڭ مالىمەتىنشە, مەكتەپ وقۋشىلارى بيىل وتكەن جىلمەن سالىستىرعاندا 3 پايىزعا, ال سوڭعى ءۇش جىلدا 7 پايىزعا ارتقان.
ماڭعىستاۋ وبلىسى
