وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا اباي وبلىسىنىڭ ەڭبەك موبيلدىلىگى ورتالىعىنىڭ ديرەكتورى ەركەبۇلان تۇرسىن جاڭا بيزنەس-يدەيالاردى ىسكە اسىرۋعا 400 اەك كولەمىندە مەملەكەتتىك قايتارىمسىز گرانتتى 204 ادامعا بەرۋ, سونداي-اق 10 مىڭ تۇرعىنعا شاققاندا 100 جۇمىس ورنى كورسەتكىشى بويىنشا 9 313 جۇمىس ورنىن جانە ينفراقۇرىلىمدىق جوبالار اياسىندا 1 695 جۇمىس ورنىن قۇرۋ, جۇمىس بەرۋشىلەردىڭ جەكە وتىنىشتەرىنە سايكەس 276 ادامدى كاسىپتىك وقىتۋعا جولداۋ جوسپارلانىپ وتىرعانىن مالىمدەدى.
1 قىركۇيەكتەگى دەرەككە سۇيەنەر بولساق, وبلىس بويىنشا 5 307 ادام تۇراقتى جۇمىس ورنىن تاپسا, 6 115 ادام سۋبسيديالاناتىن جۇمىس ورىندارىنا جۇمىسقا تۇرعان ەكەن. بۇل رەتتە 3 938 ادام قوعامدىق جۇمىسقا تارتىلسا, 308 ادام الەۋمەتتىك جۇمىس ورنىنا قىزمەتكە تۇرعان. «جاستار پراكتيكاسى», «العاشقى جۇمىس ورنى», «ۇرپاقتار كەلىسىمشارتى», «كۇمىس جاس» جوبالارى اياسىندا 1 860 ادام جۇمىس ورىندارىنا جولدانعان. سونداي-اق حالىقتىڭ الەۋمەتتىك وسال توبىن قولداۋعا ارنالعان جاڭا بيزنەس-يدەيالاردى ىسكە اسىرۋ ءۇشىن 203 قايتارىمسىز گرانت بولىنگەن.
«14 تامىز بەن 13 قىركۇيەك ارالىعىندا كاسىپكەرلىك باستاماعا جاردەمدەسۋ جونىندەگى شارالاردى ۇيىمداستىرۋ جانە قارجىلاندىرۋ قاعيدالارىنىڭ 24 تارماعىنا سايكەس 2023 جىلعى ۇسىنىلعان 400 اەك كولەمىندەگى قايتارىمسىز گرانتتاردى ماقساتتى پايدالانۋدىڭ مونيتورينگى وتكىزىلەدى. مونيتورينگ جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى, ەڭبەك موبيلدىلىگى ورتالىعى جانە قوعامدىق بىرلەستىكتەر وكىلدەرىمەن جۇرگىزىلەدى. بۇگىنگە دەيىن سەمەي, كۋرچاتوۆ قالالارى, اباي, بەسقاراعاي, بورودۋليحا اۋداندارىندا گرانت قاراجاتىن ماقساتتى پايدالانۋ بويىنشا مونيتورينگ جۇرىگىزىلدى. ونىڭ بارىسىندا 91 كاسىپكەرگە مونيتورينگ جاسالدى. 57 كاسىپكەردىڭ كاسىبىن جۇرگىزىپ جاتقانى انىقتالسا, ال قالعان كاسىپكەرلەردىڭ ءىسى ءارتۇرلى سەبەپتەرگە بايلانىستى توقتاپ تۇرعانى انىقتالدى. قازىر اباي وبلىسىنىڭ قالا مەن اۋداندارىندا مونيتورينگ جۇمىستارى جالعاسىپ جاتىر», دەدى ەڭبەك موبيلدىلىگى ورتالىعىنىڭ ديرەكتورى ەركەبۇلان سەرىكقالي ۇلى.
سۋرەتتى تۇسىرگەن – ەرلان ومار, «EQ»
جۇمىسپەن قامتۋ باعدارلامالارى اياسىندا جاڭادان مامانداردى وقىتۋ باستى نازاردا ەكەنى انىق. كاسىپتىك وقىتۋ جۇمىسسىزدىقپەن كۇرەسكە كوپ ۇلەس قوسادى. ايماقتا جىل باسىنان بەرى 200 ادام كاسىپتىك وقىتۋعا جولدانعان. ونىڭ ىشىندە وقۋدى اياقتاعان 104 مامان ومىردەن ءوز ورنىن تاپقان كورىنەدى. ءبىلىم الىپ, قايتا دايارلاۋدان وتكەن جانداردىڭ ىشىندە بيزنەس-يدەيالاردى ىسكە اسىرۋعا ارنالعان قايتارىمسىز گرانت الىپ, ءوزىنىڭ جەكە كاسىبىن دوڭگەلەتىپ كەتكەن كاسىپكەرلەر دە بار. قىركۇيەكتە اتقارىلعان جۇمىس ناتيجەسىندە 112 بوس جۇمىس ورىن جارمەڭكەسى وتكەن. 400-گە تارتا جۇمىس بەرۋشى قاتىسقان بوس ورىندار جارمەڭكەسىندە 700-دەن اسا ادام جۇمىسپەن قامتىلعان.
اباي وبلىسىنىڭ ەڭبەك موبيلدىلىگى ورتالىعىنىڭ ۇيىمداستىرۋىمەن «Tanda.enbek.kz» پورتالىندا بوس جۇمىس ورىندارىنىڭ ونلاين-جارمەڭكەسى وتكىزىلىپ كەلەدى. ونلاين-جارمەڭكەگە سەمەي قالاسى بويىنشا 35 جۇمىس بەرۋشى تىركەلىپ, 8 ادام تۇراقتى جۇمىسقا ورنالاستى. الداعى ۋاقىتتا دا حالىقتىڭ ءال-اۋقات قورىن جاقسارتۋ, حالىقتى جۇمىسپەن قامتۋ جۇمىستارى دا قارقىندى جۇزەگە اسىرىلادى.
اباي وبلىسى
