باق وكىلدەرى الدىندا «Green Kazakhstan» قوعامدىق قورىنىڭ قۇرىلاتىنىن رەسمي جاريالاعان ازاماتحان امىرتاەۆ بۇل شەشىم وزەكتى ەكولوگيالىق سىن-قاتەرلەرگە بەرىلەر جاۋاپ جانە مەملەكەت باسشىسىنىڭ جاقىندا حالىققا ارناعان جولداۋىندا ايتىلعان تاپسىرمالارىمەن تىعىز بايلانىستى ەكەنىن اتاپ ءوتتى.
«Green Kazakhstan» قورى ەلىمىزدىڭ ەكولوگيالىق ساياساتىن ىسكە اسىرۋدا, ورنىقتى دامۋ قاعيداتتارىن ىلگەرىلەتۋدە نەگىزگى قۇرال بولۋعا ارنالعان. قوردىڭ نەگىزگى ماقساتتارى مەن مىندەتتەرىنە مىنالار جاتادى. بىرىنشىدەن, ەكولوگيالىق باستامالاردى قارجىلاندىرادى. ول ءۇشىن قور ەلدەگى ەكولوگيالىق جاعدايدى جاقسارتۋعا باعىتتالعان جوبالاردى قولداۋ ءۇشىن ءارتۇرلى كوزدەن قاراجات جينايدى. ەكىنشىدەن, ەكولوگيالىق قۇزىرەتتەر ورتالىعىن قۇرۋ ارقىلى «Green Kazakhstan» ەكولوگيا سالاسىنداعى جەتىستىكتەر, ءبىلىم جانە الەمدىك ۇزدىك تاجىريبەلەرمەن الماسۋ الاڭىنا اينالادى. ۇشىنشىدەن, ەكولوگيالىق اقپاراتتىق كۇن ءتارتىبىن باسقارۋ جولىمەن قور ەكولوگيا ماسەلەلەرى بويىنشا قوعامدىق پىكىردى بەلسەندى قالىپتاستىرادى جانە حالىق اراسىندا ەكولوگيالىق مادەنيەتتى ىلگەرىلەتەدى. ءتورتىنشى, «Green Kazakhstan» ۇلتتىق ESG-پلاتفورماسىن دامىتۋ ەلىمىزدىڭ ينۆەستيتسيالىق تارتىمدىلىعىن ارتتىرۋعا ىقپال ەتە وتىرىپ, ۇلتتىق ESG-ستاندارتتارىن ازىرلەيدى جانە ەنگىزەدى. بەسىنشىسى, ەكونوميكانى دەكاربونيزاتسيالاۋعا جاردەمدەسۋ. ياعني قور قازاقستاننىڭ 2060 جىلعا دەيىنگى كومىرتەگى بەيتاراپتىعىنا قول جەتكىزۋ ستراتەگياسىن ىسكە اسىرۋعا بەلسەندى قاتىسقالى وتىر.
پارتيا توراعاسىنىڭ ايتۋىنشا, «Green Kazakhstan» قورىن قۇرۋ – جاھاندىق ەكولوگيالىق سىن-قاتەرلەر مەن دامۋدىڭ ۇلتتىق باسىمدىقتارى كونتەكستىندە ۋاقتىلى جانە قاجەتتى قادام بولىپ وتىر.
سونداي-اق قور ەكولوگيالىق پروبلەمالاردى شەشۋدە مەملەكەتتىڭ, بيزنەستىڭ جانە قوعامنىڭ كۇش-جىگەرىن شوعىرلاندىرۋعا, ەكولوگيالىق جوبالاردى قارجىلاندىرۋ مەن ىسكە اسىرۋدىڭ اشىق تەتىگىن قامتاماسىز ەتۋگە, ەلىمىزدىڭ «جاسىل» ەكونوميكاعا جانە تۇراقتى دامۋعا كوشۋىن جەدەلدەتۋگە ءارى ەكولوگيالىق احۋالدى, ازاماتتاردىڭ ءومىر ءسۇرۋ ساپاسىن جاقسارتۋعا, سونىمەن قاتار ەكولوگيا جانە ورنىقتى دامۋ ماسەلەلەرىنە جاۋاپكەرشىلىكپەن قارايتىن ەل رەتىندە قازاقستاننىڭ حالىقارالىق بەدەلىن ارتتىرۋعا مۇمكىندىك بەرمەك.
جولداۋ جۇكتەگەن مىندەتتى ارقالاعان قور ءوز جۇمىسىن جاقىن ارادا باستاعالى وتىر. پارتيا اتالعان قوردىڭ العا قويىلعان ماقساتتارعا جەتۋى ءۇشىن مەملەكەتتىك ورگاندارمەن, بيزنەس-قۇرىلىمدارمەن, حالىقارالىق ۇيىمدارمەن جانە جۇرتشىلىقپەن تىعىز ىنتىماقتاسا جۇمىس ىستەۋدى جوسپارلاعان.
