ۇكىمەت باسشىسى ماراپاتتاۋ راسىمىنە قاتىسۋشىلار الدىندا سويلەگەن سوزىندە قازاقستاندى الەمدىك ەنەرگەتيكا نارىعىنداعى جەتەكشى ويىنشىلار قاتارىنا قوسقان سالا ارداگەرلەرى, مۇنايشىلار, ينجەنەرلەر مەن عالىمداردىڭ جانقيارلىق ەڭبەگى مەن قاجىر-قايراتىنا العىسىن ءبىلدىردى.
پرەمەر-مينيستر مۇناي-گاز سەكتورىن دامىتۋعا قوسقان ۇلەسى ءۇشىن مەملەكەت باسشىسىنىڭ اتىنان ەڭبەگىمەن ەرەكشە كوزگە تۇسكەن مۇناي-گاز كەشەنىنىڭ 40 قىزمەتكەرىنە ماراپات تابىس ەتتى. «پاراسات» وردەنىمەن ەڭبەك ارداگەرى ماحاش راحمەتوۆ, مۇنايشى ارداگەر ولەگ گەرشتانسكي, سالا ساراپشىسى ماحامبەت دوسمۇحامبەتوۆ, «قۇرمەت» وردەنىمەن مۇنايشى ارداگەرلەر تورەمۇرات جارماعامبەتوۆ, راحمان يساەۆ, مادىحات نۇرمۇحانوۆ, ناعانعالي وتەەۆ, قۇبىرشى مارات تاعانباەۆ, شاكيمۇرات شاماروۆ, ءIىI دارەجەلى «ەڭبەك داڭقى» وردەنىمەن ارداگەر مۇنايشى كەلتىر شانەنوۆ, تەحنولوگيالىق كومپرەسسورلار ءماشينيسى احمەد شادينوۆ, «ەرەن ەڭبەگى ءۇشىن» مەدالىمەن مۇنايشى ارداگەرلەر ءابدىراحمان قازيەۆ, قادىرحان وتەسىنوۆ, سلەسار-جوندەۋشى ەسىمبەك بەرداليەۆ, مۇناي جانە گاز وپەراتورى كوشەرباي وتەباەۆ, باسقا دا قىزمەتكەرلەر ماراپاتتالدى.
ولجاس بەكتەنوۆ ەلىمىزدە «قارا التىننىڭ» ايتارلىقتاي قورى بار ەكەنىن اتاپ ءوتتى. راستالعان مۇناي قورى 4 ملرد توننادان اسادى, بۇل كولەممەن ەلىمىز الەمدىك نارىقتاعى ماڭىزدى ويىنشىلاردىڭ بىرىنە اينالادى. مۇناي ەكسپورتىنىڭ جاڭا باعىتتارى اشىلدى, ونىڭ ىشىندە كاسپي باعىتى بار. ەلىمىز ارقىلى مۇناي مەن گاز ءترانزيتىنىڭ كولەمى ارتىپ كەلەدى. قازاقستاننىڭ ۇلتتىق KEBCO مۇناي برەندى ىسكە قوسىلدى, رەسۋرستىق بازانى كەڭەيتۋ, گەولوگيالىق بارلاۋدىڭ ينۆەستيتسيالىق تارتىمدىلىعىن ارتتىرۋ, ءوندىرىستى ۇلعايتۋ, جاڭا جوبالاردى ىسكە اسىرۋ بويىنشا بەلسەندى جۇمىس جۇرگىزىلىپ جاتىر.
«مەملەكەت باسشىسى قازاقستان حالقىنا جولداۋىندا مۇناي-گاز حيمياسى سالاسىن ودان ءارى دامىتۋ مىندەتتەرىن اتاپ ءوتتى. سالاداعى جەتىستىكتەرىمىز مۇناي ءوندىرۋ جانە ونى تاسىمالداۋمەن عانا شەكتەلمەيدى. كومىرسۋتەكتەردى ىشكى وڭدەۋ سالاسىن دامىتۋعا كوپ كۇش جۇمسالادى. اتىراۋ وبلىسىندا پوليپروپيلەن وندىرەتىن زاۋىتتىڭ اشىلۋىمەن تولىققاندى مۇناي-گاز حيمياسى كلاستەرى قۇرىلدى. الدا پوليەتيلەن جانە بۋتاديەن شىعاراتىن جاڭا جوبالار تۇر. اتالعان كاسىپورىندار يمپورتتى الماستىرۋعا ىقپال ەتىپ قانا قويماي, شاعىن جانە ورتا بيزنەستى دامىتۋعا قاجەتتى جاعداي جاسايدى. الداعى جىلدارى جاڭا گاز وڭدەۋ زاۋىتتارى سالىنادى. مۇناي-گاز كەشەنى كەلەشەكتە دە ەكونوميكامىزدىڭ قوزعاۋشى كۇشىنىڭ ءبىرى بولىپ قالا بەرمەك. ءبىز سالانى يننوۆاتسيالىق تەحنولوگيالاردى ەنگىزۋ ارقىلى جانە ەكولوگيالىق قاۋىپسىزدىكتى قامتاماسىز ەتە وتىرىپ, ودان ءارى دامىتۋدى كوزدەيمىز», دەپ اتاپ ءوتتى ولجاس بەكتەنوۆ.
وتاندىق مۇناي-گاز حيمياسىن دامىتۋ, پوليەتيلەن, پوليەتيلەنتەرەفتالات جانە كارباميد ءوندىرۋ جوبالارىن ىسكە اسىرۋ ىشكى سۇرانىستى قاناعاتتاندىرۋعا, قوسىلعان قۇنى جوعارى وتاندىق تەحنولوگيالىق ءونىم ەكسپورتىن ارتتىرۋعا مۇمكىندىك بەرەدى.
