پاۆلودار باسشىلىعى كۇننىڭ سۋىتۋىنا بايلانىستى جيىن وتكىزدى

پاۆلودار. 24 قاڭتار. پاۆلودار وبلىسىنىڭ اكىمى قانات بوزىمباەۆ قاتتى ايازعا بايلانىستى اۋدان اكىمدەرى جانە بارلىق باسقارما باسشىلارىمەن شۇعىل جيىن وتكىزدى. بۇل تۋرالى egemen.kz حابارلادى. اۋا رايىن باقىلاۋشىلاردىڭ مالىمەتتەرىنشە, 24-27 قاڭتار ارالىعىندا وبلىستا اۋا تەمپەراتۋراسى 30-35 گرادۋسقا دەيىن تومەندەيدى, كەيبىر جەرلەردە 38 گرادۋس اياز بولادى. وبلىستا توتەنشە جاعدايدىڭ الدىن الۋ ماقساتىندا جەدەل شتاب قۇرىلدى. ەنەرگەتيكا, تۇرعىن ءۇي-كوممۋنالدى شارۋاشىلىق باسقارماسىنىڭ باسشىسى ج.تۇياقوۆتىڭ ايتۋىنشا, بارلىق اۋداندار مەن قالالارداعى جىلۋ بەرۋ كوزدەرى تۇراقتى جۇمىس جاساۋدا. وتىن جەتكىلىكتى, تۇرعىن ۇيلەردە جىلۋ بار. بارلىق قالالار مەن اۋدانداردىڭ تۇرعىن ءۇي كوممۋنالدىق بولىمدەرى تاۋلىك بويى كەزەكشىلىك اتقارۋدا. وبلىس اۋماعىنداعى اۆتوموبيل جولدارى باقىلاۋدا. ءبىلىم بەرۋ باسقارماسى اۋدان جانە قالا اكىمدەرىمەن بىرلەسە وتىرىپ, مەكتەپتەردە ساباقتاردىڭ بولماۋى تۋرالى اتا-انالاردى ۋاقىتىندا تەلەارنالار مەن راديو ارقىلى حابارلاۋدا. قۇتقارۋ قىزمەتتەرى ارنايى تەحنيكالاردى ازىرلەپ, جولداردى تازالاپ, رەسپۋبليكالىق, وبلىستىق جانە اۋداندىق ماڭىزى بار جولدار بويىندا قاجەت بولعان جاعدايدا جىلى ورىندار جۇمىسىن ۇيىمداستىرادى. فاريدا بىقاي. دەرەك: egemen.kz. سۋرەت: time.kz.