فوتو: ortcom.kz
زاڭ جوبالارى تۇتىنۋشىلاردىڭ قۇقىقتارىن قورعاۋدىڭ قولدانىستاعى ادىستەرىن جەتىلدىرۋ ءۇشىن ازىرلەنگەن.
نەگىزگى زاڭ جوباسى ارقىلى تۇتىنۋشىلاردىڭ قۇقىقتارىن قورعاۋ جونىندەگى ومبۋدسمەن ينستيتۋتى ەنگىزىلەدى. ول تۇتىنۋشىلارعا كونسۋلتاتسيالىق كومەك كورسەتۋگە, ولاردىڭ قۇقىقتارى مەن زاڭدى مۇددەلەرىن قورعاۋ ءۇشىن سوتقا تالاپ قويۋعا, سونداي-اق وزگە دە فۋنكتسيالاردى ورىنداۋعا قۇقىلى. ونى قىزمەتكە تاعايىنداۋ جانە قىزمەتتەن بوساتۋ ۋاكىلەتتى ورگان (ساۋدا جانە ينتەگراتسيا مينيسترلىگى) باسشىسىنىڭ قۇزىرىنا بەرىلەدى. ومبۋدسمەن 4 جىل مەرزىمگە سايلانادى جانە ءوز قىزمەتىن ەرىكتى نەگىزدە (اقىسىز) جۇزەگە اسىرادى.
سونىمەن قاتار سوتقا دەيىنگى ساتىدا تۇتىنۋشىلاردىڭ تالاپتارىن ورىنداماعان كاسىپكەرلەرگە ايىپپۇل سالىنادى.
جاڭا زاڭ جوباسى تۇتىنۋشىلاردىڭ شاعىمدارىمەن جۇمىس ىستەۋدى جەڭىلدەتەدى. ەندى ولار ءوز قۇقىقتارىن قورعاۋ, تىكەلەي سوتقا تالاپ ارىز بەرۋ, ساتۋشىنى جاۋاپقا تارتۋ ءۇشىن مەملەكەتتىك ورگانعا حابارلاسۋ نەمەسە اربيتراجعا, مەدياتورعا نەمەسە قوعامدىق تۇتىنۋشىلار بىرلەستىكتەرىنە, قاۋىمداستىقتارعا, ومبۋدسمەنگە جۇگىنۋ بويىنشا تاڭداۋ جاساي الادى.
كاسىپكەر تۇتىنۋشىنىڭ تالاپتارىن ءوز ەركىمەن ورىنداماسا, سوت ساتۋشىدان (دايىنداۋشىدان, ورىنداۋشىدان) ايىپپۇل وندىرە الادى. ايىپپۇل تالاپ ارىز سوماسىنىڭ 10 پايىزىنان 50 پايىزىنا دەيىنگى مولشەردە قاراستىرىلادى (تالاپ سوماسى نەعۇرلىم از بولسا, ايىپپۇل سوعۇرلىم كوپ بولادى).
