جىل سايىن جازۋشىلار وداعىنا مۇشەلىككە قابىلداۋدا جاستارعا باسىمدىق بەرىلۋى, جاس اقىن-جازۋشىلار كىتابىن مەملەكەت تاراپىنان شىعارۋعا مۇرىندىق بولۋى, ءتىپتى «جازۋشىلار وداعىنا ۇمىتكەر» جوباسىنىڭ قولعا الىنۋى – ءسوزىمىزدىڭ ايقىن دالەلى. اۋقىمدى جۇمىستاردىڭ تاعى ءبىرى – بيىل شىعارماشىلىق ۇيىم مەن مادەنيەت جانە اقپارات مينيسترلىگى اراسىنداعى ستراتەگيالىق ارىپتەستىك اياسىندا قولا الىنعان «جازۋشىلاردىڭ ادەبي شەبەرلىك مەكتەبى» اتتى جاڭا جوبا.
اتالعان جوبادا شىعارماشىلىق ورتادان جىراقتا, شالعاي ايماقتار مەن شاعىن قالالاردا جۇرگەن 20 جاستىڭ باسىن قاسيەتتى قاراشاڭىراق استىندا قوسىپ قانا قويماي, ولارعا ءمۇيىزى قاراعايداي اقىن-جازۋشىلار, ادەبيەتتانۋشىلاردىڭ ءدارىسىن تىڭداتۋ, بەلگىلى قالامگەرلەردىڭ شەبەرلىك ساعاتتارىن ۇيىمداستىرۋ, شىنىمەن دە, تىڭ باستاما. ەرەكشە اتاپ وتەرلىگى – بۇل جوباعا قاتىسۋشىلاردى ىرىكتەۋگە ارنايى ساراپتاما كوميسسياسى قۇرىلىپ, الدىمەن تالاپكەرلەر ىرىكتەۋدەن ءوتتى.
ەكىنشىدەن, اتالعان جوبا جاس اقىن-جازۋشىلارعا جاڭا مۇمكىندىك سىيلاعانى داۋسىز. ويتكەنى ساكەن, بەيىمبەت, ءىلياس, مۇحتار, ابدىجامىلدەي تاۋ تۇلعالاردىڭ ءىزى قالعان قاراشاڭىراقتا جاستار 10 كۇن بويى بەلگىلى قالامگەرلەرمەن ەتەنە ءجۇرىپ سويلەسۋى, بىلمەگەنىن سۇراپ-ءبىلۋى دە ءبىر عانيبەت. جاس تالاپتىڭ كەۋدەسىنە سەنىم ۇيالاتىپ, قيالىنا قانات بىتىرەدى. «مەن دە سول كىسى سەكىلدى اتاقتى شىعارمالار جازۋىم مۇمكىن ەكەن عوي» دەگەن ءۇمىت پەن جىگەر سىيلايدى. سونداي-اق ەلىمىزدىڭ ءار تۇكپىرىنەن كەلگەن جاستار ءبىر-بىرىمەن ارالاسىپ, ءوزارا پىكىر الماسۋ ارقىلى كوكجيەگى كەڭەيەدى, جاڭا تاقىرىپتارعا قالام تارتادى. «جاڭا مۇمكىندىك اشىلادى» دەپ وتىرعانىمىز – وسى.
وتىز بەس جاسقا دەيىنگى جاس قالامگەرلەرگە ارنالعان شەبەرلىك مەكتەبىندە پروزا مەن پوەزيا جانرىنداعى ادەبي ءۇردىس, كاسىبي شەبەرلىك, ادەبي سىننىڭ دامۋى, ادەبيەتتەگى تاۋەلسىزدىك رۋحى, حالىقارالىق بايلانىس, اۋدارما, كىتاپ تاراتۋ باعىتتارى مەن جازۋشىلار وداعىنىڭ ەلىمىزدىڭ ادەبي ومىرىندەگى الاتىن ورنى تۋرالى تاعىلىمدى اڭگىمەلەر ايتىلىپ, كۇن سايىن قازاقستاننىڭ ەڭبەك ەرى دۋلات يسابەكوۆ, ادەبيەت سىنشىسى جانعارا دادەباەۆ, اقىندار باقىتجان قاناپيانوۆ, ادىلعازى قايىربەكوۆ, بەكجان اشىرباەۆ, جازۋشى جۇسىپبەك قورعاسبەك, قازاقستان جازۋشىلار وداعىنىڭ توراعاسى مەرەكە قۇلكەنوۆ, دراماتۋرگ اسىلبەك يحسان, تانىمال اۋدارماشى ءلايلا مۇسالى ءدارىس وقىپ, تاجىريبەلەرىمەن ءبولىستى. وسى جوباعا شەتەلدەن ارنايى شاقىرتىلعان تۇركيالىق ەكرەم ايان, كورشى قىرعىز ەلىنەن كەلگەن ابدىلداجان اقماتاليەۆ, اقش-تاعى كولۋمبيا ۋنيۆەرسيتەتى شىعىستانۋ ينستيتۋتىنىڭ ايماقتىق ديرەكتورى رافيس ابازوۆ, رەسەيلىك جازۋشى, اۋدارماشى گۋزەل ياحينا شەبەرلىك مەكتەبىنە وزىندىك ءار بەردى.
ارينە, شەبەرلىك مەكتەبىندە ءدارىس وقىعان قالامگەرلەر مەن ولاردىڭ قاۋزاعان تاقىرىپتارى تۋرالى تاڭدى تاڭعا ۇرىپ ايتۋعا بولادى. دەگەنمەن بەلگىلى قازاق جازۋشىسى, ەكى بۋىننىڭ دا كوزىن كورگەن جۇسىپبەك قورعاسبەكتىڭ دارىستەرىن ەرەكشە اتاپ وتۋگە ءتيىسپىز. وتكەن عاسىر كلاسسيكتەرىنىڭ دە, قازىرگى بۋىننىڭ دا شىعارماشىلىعىمەن جاقسى تانىس قالامگەردىڭ دارىستەرىنە بولىنگەن ۋاقىت ازدىق ەتىپ, جوباعا قاتىسۋشىلاردىڭ قوسىمشا ۋاقىت سۇراعانى كوپ نارسەنى اڭعارتسا كەرەك. سول سەكىلدى, تانىمال رەسەيلىك جازۋشى, كاسىبي اۋدارماشى, اتاقتى «زۋلەيحا وتكرىۆاەت گلازا», «دەتي موي», «ەشەلون نا ساماركاند» روماندارىنىڭ اۆتورى گۋزەل ياحينانىڭ شىعارماشىلىق زەرتحاناسى ءبارىمىزدى لەزدە قىزىقتىرىپ اكەتتى. جالعىز-اق «زۋلەيحا وتكرىۆاەت گلازا» رومانىنا ءبىر مەزگىلدە 5 بەدەلدى الەمدىك ادەبي سىيلىقتى يەلەنگەن جازۋشىنىڭ ءدارىسى ەرەكشە ۇناعاندىعى سونشالىق, قادىرلى قوناققا بىرنەشە ساعات بويى سۇراق قويدىق. ادەبيەتتەگى وتە وزەكتى تاقىرىپ – اۋدارما ماسەلەسى تۋرالى ءسوز قوزعاعان تۇركيانىڭ مۋگلا سىتكى كوشمان ۋنيۆەرسيتەتىنىڭ پروفەسسورى, PhD ەكرەم ايان بىرنەشە كۇن بويى ءتارجىمالاناتىن شىعارمالاردىڭ ءتىزىمىن جاساۋ كەرەگىن, ورتاق تەرمينولوگيا قۇراستىرۋدىڭ ءمانى زور ەكەنىن ايتىپ, قوس ەلدىڭ ادەبي بايلانىسىن نىعايتۋ تەتىكتەرى تۋرالى وي تولعادى. اۋدارما تۋرالى ايتقاندا, ءال-فارابي اتىنداعى قازاق ۇلتتىق ۋنيۆەرسيتەتىندەگى «جاس اۋدارماشىلار ۇيىمىنىڭ» عىلىمي جەتەكشىسى, پروفەسسور ءلايلا مۇسالى دارىستەرىن ايرىقشا اتاپ وتكەن ءجون. ونىڭ ناقتى مىسالدار كەلتىرە وتىرىپ, بارلىق قاتىسۋشىعا پوەزيا مەن پروزادان اۋدارما جاساتىپ ۇيرەتۋى, ءوز بەتىنشە ءتارجىما جاساۋعا داعدىلاندىرۋى, وسى سالانىڭ قىر-سىرىمەن ءبولىسۋى – بىزگە قۇندى دۇنيە بولدى. اۆتورلىق قۇقىق, باسپا ماسەلەسى, باق-تاعى ۇلتتىق مۇددە مەن قايشىلىقتار, قالامگەردىڭ ازاماتتىق ۇستانىمى تۋرالى اڭگىمەلەگەن بەكجان اشىرباەۆتىڭ دارىستەرى – دايىن تۇرعان وقۋ باعدارلاماسى.
شىعارمالارى الەمنىڭ 11 تىلىنە اۋدارىلعان ادەبيەتتانۋشى, اكادەميك ابدىلداجان اقماتاليەۆتىڭ شىڭعىس ايتماتوۆ تۋرالى ەستەلىكتەرى ءبارىمىزدى ءا دەگەننەن-اق باۋراپ الدى. كەمەڭگەر جازۋشىنىڭ جانىندا جاس كەزىنەن باستاپ سوڭعى كۇندەرىنە دەيىن بىرگە بولعان ول ايتماتوۆتىڭ كوپشىلىك بىلە بەرمەيتىن تاعدىرى مەن ادامي قاسيەتتەرى, مۇحتار اۋەزوۆپەن دوستىعى تۋرالى تىڭ دەرەكتەردى اسەرلى جەتكىزدى.
شەبەرلىك مەكتەبى بارىسىندا جوباعا قاتىسۋشىلاردىڭ سۇراۋىمەن قازاقستاننىڭ حالىق جازۋشىسى بەكسۇلتان نۇرجەكە ۇلى, اقىن, دراماتۋرگ يران-عايىپتىڭ دا دارىستەرى ءوتتى. شەبەرلىك مەكتەبىنە قاتىسۋشىلاردىڭ ءوتىنىش-تىلەگىنە وراي جازۋشىلار وداعى توراعاسىنىڭ ورىنباسارى باۋىرجان جاقىپ دەمالىس كۇندەرى ءبارىمىزدى ءسابيت مۇقانوۆ پەن عابيت مۇسىرەپوۆتىڭ مۋزەيىنە, «كەڭسايداعى» ءىلياس ەسەنبەرلين, ءازىلحان نۇرشايىقوۆ, مۇقاعالي ماقاتاەۆ, ورالحان بوكەي, قادىر مىرزا ءالي سەكىلدى ادەبيەت الىپتارىنىڭ باسىنا اپارىپ, زيارات جاساتتى.
مادەنيەت جانە اقپارات مينيسترلىگى مەن قازاقستان جازۋشىلار وداعىنىڭ «جازۋشىلاردىڭ ادەبي شەبەرلىك مەكتەبى» جوباسى جاس قالامگەرلەرگە ۇلكەن تاجىريبە, بىرەگەي تاعىلىم الاڭىنا اينالدى. مۇنداي باستاما جالعاسىن تاپسا, تالاي جاس دارىنعا جاڭا مۇمكىندىك سىيلايتىنى انىق. بولاشاقتا ۇلكەن ادەبي مەكتەپكە اينالاتىن ءۇردىس بولاتىنى ءسوزسىز.
نۇرسۇلتان مىقتىباي,
«جازۋشىلاردىڭ ادەبي شەبەرلىك مەكتەبى» جوباسىنىڭ قاتىسۋشىسى
